മസ്കറ്റ് : ഹോര്മുസില് എണ്ണക്കപ്പലുകള്ക്ക് നേരെയുള്ള ആക്രമണം തുടരുന്നു. ഒമാന് തീരത്തിന് സമീപം ഇന്ന് രണ്ട് കപ്പലുകള് ആക്രമിക്കപ്പെട്ടു. സൗദിക്ക് നേരെയുള്ള ഹൂതി ആക്രമണവും തുടരുകയാണ്. സൗദിയുടെ തിരിച്ചടിയുമുണ്ടായി.
ഒമാന് തീരത്ത്, ഹോര്മുസ് കടലിടുക്കില് ഇന്ന് രാവിലെ രണ്ട് എണ്ണ ടാങ്കറുകള്ക്ക് നേരെയാണ് ആക്രമണം ഉണ്ടായത്. ഖസബില് നിന്ന് 11 നോട്ടിക്കല് മൈല് അകലെ ഹോര്മുസ് കടലിടുക്കിലൂടെ പുറത്തേക്ക് പോവുകയായിരുന്ന ടാങ്കറിന്റെ പിന്നില് അജ്ഞാത പ്രോജക്ടൈല് പതിച്ചു. ഖസബില് നിന്ന് 17 നോട്ടിക്കല് മൈല് കിഴക്ക് മറ്റൊരു ടാങ്കറിന്റെ എഞ്ചിന് റൂമില് പ്രൊജക്ടൈല് പതിച്ചിരുന്നു. രണ്ട് സംഭവങ്ങളിലും ആര്ക്കും പരുക്കില്ല എന്നാണ് യുകെ മരിടൈം ട്രേഡ് ഓപ്പറേഷന്സ് അറിയിച്ചത്. പരിസ്ഥിതി നാശം ഉണ്ടായോ എന്ന് ഇതുവരെ സ്ഥിരീകരിച്ചിട്ടില്ല.
ഇന്നലെയും ഖസബിന് 8 നോട്ടിക്കല് മൈല് വടക്ക് മറ്റൊരു ടാങ്കറിന് നേരെ ആക്രമണം ഉണ്ടായി. കപ്പലില് തീപിടിത്തം റിപ്പോര്ട്ട് ചെയ്തിരുന്നു. സൗദിക്ക് നേരെ ഇന്നും ഹൂതി ആക്രമണ ശ്രമമുണ്ടായി. റിയാദില് 3 ബാലിസ്റ്റിക് മിസൈലുകളും തെക്കന് മേഖലയില് ഒരു ഡ്രോണും തകര്ത്തു.






