തിരുവനന്തപുരം: വർക്കലയില് 108 ആംബുലൻസ് തടഞ്ഞുനിർത്തി ഡ്യൂട്ടിയിലുണ്ടായിരുന്ന മെയില് നഴ്സിനെ ആക്രമിക്കാൻ ശ്രമിച്ചതായി പരാതി.
സംഭവത്തില് കല്ലമ്പലം സ്വദേശിയും ആംബുലൻസ് നഴ്സുമായ ഷാനവാസിന്റെ പരാതിയില് വർക്കല പൊലീസ് കേസെടുത്ത് അന്വേഷണം ആരംഭിച്ചു. രോഗിയെ തിരുവനന്തപുരം മെഡിക്കല് കോളേജ് ആശുപത്രിയില് എത്തിച്ച ശേഷം വർക്കലയിലേക്ക് മടങ്ങുകയായിരുന്ന ആംബുലൻസിന് നേരെയാണ് ചെറുന്നിയൂരില് വച്ച് അക്രമം നടന്നത്. വാഹനം തടഞ്ഞുനിർത്തിയ യുവാവ് ഷാനവാസിനോട് അകാരണമായി കയർക്കുകയും അസഭ്യം പറയുകയുമായിരുന്നെന്നാണ് പരാതി.
ആംബുലൻസിന്റെ മുൻസീറ്റില് ഇരിക്കുകയായിരുന്ന ഷാനവാസിന്റെ കയ്യില് പിടിച്ചു വലിക്കുകയും മൊബൈല് ഫോണ് തട്ടിയെടുക്കാൻ ശ്രമിക്കുകയും ചെയ്തതായും പരാതിയില് പറയുന്നു. 'താൻ ഓണ് ഡ്യൂട്ടിയിലാണ്' എന്ന് വ്യക്തമാക്കിയിട്ടും യുവാവ് ആക്രമണ സ്വഭാവത്തോടെ പെരുമാറുന്നത് ദൃശ്യങ്ങളില് വ്യക്തമാണ്. ഡ്യൂട്ടിയിലാണെങ്കില് ആംബുലൻസിനുള്ളിലെ ആളെ കാണിക്കെന്ന് പറഞ്ഞായിരുന്നു ആക്രമണമെന്ന് ഷാനവാസ് പറയുന്നു. സംഭവത്തില് പൊലീസ് അന്വേഷണം ആരംഭിച്ചു.
