പൂനെ: ശുചിത്വമില്ലായ്മ, ഭക്ഷ്യസുരക്ഷാ മാനദണ്ഡങ്ങള് ലംഘിക്കല് തുടങ്ങിയവ കണ്ടെത്തിയതിനെത്തുടർന്ന് പൂനെ നഗരത്തിലെ സിൻഹഗഡ് റോഡില് പ്രവർത്തിക്കുന്ന ആമസോണ്, ബിഗ്ബാസ്കറ്റ് എന്നിവയുടെ ഡാർക്ക് സ്റ്റോറുകളുടെ ഭക്ഷ്യ ലൈസൻസുകള് റദ്ദാക്കി മഹാരാഷ്ട്ര ഫുഡ് ആൻഡ് ഡ്രഗ് അഡ്മിനിസ്ട്രേഷൻ.
കാലാവധി കഴിഞ്ഞ ഭക്ഷ്യവസ്തുക്കള്, വൃത്തിഹീനമായ സാഹചര്യം, ഷെഡ്യൂള് IV വ്യവസ്ഥകള് ലംഘിക്കല് തുടങ്ങിയവ കണ്ടെത്തിയതിനെത്തുടർന്ന് 2006ലെ ഭക്ഷ്യസുരക്ഷാ ഗുണനിലവാര നിയമപ്രകാരം നടപടി.
കാലാവധി കഴിഞ്ഞ ഉല്പ്പന്നങ്ങളില് പൂപ്പല് വളർന്നതും പാത്രങ്ങളില് പൊടിപടലങ്ങള് നിറഞ്ഞതും പരിശോധനയില് ഉദ്യോഗസ്ഥർ കണ്ടെത്തി. ഗജാനൻ ഇൻവെന്ററീസ് നടത്തുന്ന ആമസോണ് ഡാർക്ക് സ്റ്റോറില് നടത്തിയ പരിശോധനയില് കാലാവധി കഴിഞ്ഞതും പൂപ്പല് പിടിച്ചതുമായ ലഡു, പേഡ എന്നിവ ഉദ്യോഗസ്ഥർ കണ്ടെത്തി പിടിച്ചെടുത്തു.
ഇന്നൊവേറ്റീവ് റീട്ടെയില് കണ്സെപ്റ്റ് നടത്തുന്ന ബിഗ്ബാസ്കറ്റ് ഡാർക്ക് സ്റ്റോറില് കണ്ടെത്തിയത് കാലാവധി കഴിഞ്ഞ കേക്കുകള്, ബ്രെഡ്, മില്ക്ക് റസ്ക്, ചട്ണി എന്നിവയാണ്. ഇതും ഉദ്യോഗസ്ഥർ കണ്ടെത്തി നശിപ്പിച്ചു.
ഈ ഭക്ഷ്യവസ്തുക്കളെല്ലാം നിലത്ത് കൂട്ടിയിട്ടിരിക്കുന്ന നിലയിലായിരുന്നു. പൊട്ടിയ തറ, ചോരുന്ന എണ്ണ പാക്കറ്റുകള്, കീടങ്ങള് എന്നിവയും പരിശോധനയില് കണ്ടെത്തി.
ജോയിന്റ് കമ്മീഷണർ ശ്രീകാന്ത് കർക്കലെയുടെയും അസിസ്റ്റന്റ് കമ്മീഷണർ നാരായണ് സർക്കേറ്റിന്റെയും നിർദേശപ്രകാരമായിരുന്നു ഫുഡ് സേഫ്റ്റി ഓഫീസർ സുപ്രിയ ജഗ്താപ് പരിശോധനയും നടപടികളും സ്വീകരിച്ചത്.






