തിരുവനന്തപുരം: കേരള-കർണാടക-ലക്ഷദ്വീപ് തീരങ്ങളില് ഇന്ന് മത്സ്യബന്ധനത്തിന് തടസ്സമില്ലെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
ഈ തീരങ്ങളില് പ്രത്യേക കാലാവസ്ഥാ മുന്നറിയിപ്പുകള് ഒന്നും തന്നെ ബാധകമല്ല. അതേസമയം, ബംഗാള് ഉള്ക്കടലില് രൂപപ്പെട്ട പുതിയ ന്യൂനമർദ്ദത്തിന്റെ സ്വാധീനഫലമായി ശക്തമായ കാറ്റിനും മോശം കാലാവസ്ഥയ്ക്കും സാധ്യതയുള്ളതിനാല് കനത്ത ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്.ബംഗാള് ഉള്ക്കടലിലെ പ്രക്ഷുബ്ധമായ അന്തരീക്ഷത്തിന്റെയും കാലാവസ്ഥാ വ്യതിയാനത്തിന്റെയും പശ്ചാത്തലത്തില്, നവംബർ 16 മുതല് 20 വരെ യാതൊരു കാരണവശാലും ബംഗാള് ഉള്ക്കടലില് മത്സ്യബന്ധനത്തിനായി പോകാൻ പാടില്ലെന്നാണ് കാലാവസ്ഥാ വകുപ്പ് നല്കിയിരിക്കുന്ന കർശന നിർദ്ദേശം. ആഴക്കടലില് മത്സ്യബന്ധനത്തിലേർപ്പെട്ടിരിക്കുന്ന തൊഴിലാളികള് എത്രയും പെട്ടെന്ന് സുരക്ഷിതമായ തീരങ്ങളിലേക്ക് മടങ്ങണമെന്നും അധികൃതർ അഭ്യർത്ഥിച്ചു.കടലില് ശക്തമായ കാറ്റും തിരമാലകളും ഉയരാൻ സാധ്യതയുള്ളതിനാല് മത്സ്യത്തൊഴിലാളികളും തീരദേശവാസികളും അതീവ ജാഗ്രത പാലിക്കണം. കാലാവസ്ഥാ മുന്നറിയിപ്പുകള് പൂർണ്ണമായും പാലിച്ചുകൊണ്ട് മാത്രമേ അടുത്ത ദിവസങ്ങളില് തൊഴിലാളികള് കടലില് പോകാവൂ എന്നും ദുരന്തനിവാരണ വിഭാഗം മുന്നറിയിപ്പ് നല്കിയിട്ടുണ്ട്.






