പറവൂര്‍: ആക്രി സാധനങ്ങള്‍ ശേഖരിക്കാനെന്ന വ്യാജേന വര്‍ക്ക്ഷോപ്പിലെത്തി വിലപിടിപ്പുള്ള ബൈക്ക് എന്‍ജിന്‍ പാര്‍ട്സുകള്‍ മോഷ്ടിച്ചു കടന്നുകളഞ്ഞ രണ്ട് അസം സ്വദേശികള്‍ പോലീസ് പിടിയിലായി.
അസം സ്വദേശികളായ സെയ്ഫുള്‍ ഇസ്ലാം (53), അനാര്‍ ഹുസൈന്‍ (37) എന്നിവരെയാണ് നോര്‍ത്ത് പറവൂര്‍ പോലീസ് അറസ്റ്റ് ചെയ്തത്.
വള്ളുവള്ളി ഭാഗത്ത് പ്രവര്‍ത്തിക്കുന്ന ടൂ വീലര്‍ വര്‍ക്ക്ഷോപ്പിലായിരുന്നു മോഷണം നടന്നത്. ശനിയാഴ്ച രാവിലെ ആക്രി സാധനങ്ങള്‍ എടുക്കാനായി വര്‍ക്ക്ഷോപ്പില്‍ എത്തിയതായിരുന്നു ഇരുവരും.
ഉപേക്ഷിക്കപ്പെട്ട ആക്രി സാധനങ്ങള്‍ ശേഖരിക്കുന്നതിനിടയില്‍ വര്‍ക്ക്ഷോപ്പ് ജീവനക്കാരുടെ കണ്ണുവെട്ടിച്ച്‌, നന്നാക്കാനായി വെച്ചിരുന്ന ബൈക്കിന്റെ എന്‍ജിന്‍ പാര്‍ട്സുകളും ഇവര്‍ തങ്ങളുടെ ചാക്കിലാക്കി കടത്തുകയായിരുന്നു.
സംഭവം ശ്രദ്ധയില്‍പ്പെട്ട വര്‍ക്ക്ഷോപ്പ് ഉടമ നല്‍കിയ പരാതിയുടെ അടിസ്ഥാനത്തില്‍ നോര്‍ത്ത് പറവൂര്‍ പോലീസ് ഉടന്‍ തന്നെ അന്വേഷണം ആരംഭിച്ചു.
പ്രദേശത്തെ സിസിടിവി ദൃശ്യങ്ങളും മറ്റും കേന്ദ്രീകരിച്ച്‌ നടത്തിയ ഊര്‍ജ്ജിതമായ തിരച്ചിലിനൊടുവില്‍ വാണിയക്കാട് ഭാഗത്തുനിന്നാണ് പ്രതികളെ പോലീസ് വലയിലാക്കിയത്.
മോഷ്ടിച്ച എന്‍ജിന്‍ ഭാഗങ്ങളും ഇവരില്‍ നിന്നും കണ്ടെത്തിയിട്ടുണ്ട്.
