കോട്ടയം: വേൾഡ് പീസ് കൗൺസിലിന്റെ ഇന്ത്യൻ ചാപ്റ്ററായ അഖിലേന്ത്യ സമാധാന ഐക്യദാർഢ്യ സമിതി (ഐപ്സോ)യുടെ സംസ്ഥാന ക്യാമ്പ് ജൂലൈ 25, 26 തീയതികളിൽ കോട്ടയം തെള്ളകം ചൈതന്യ ഹാളിൽ നടക്കും. ക്യാമ്പിന്റെ വിശദാംശങ്ങൾ ഐപ്സോ ഭാരവാഹികൾ കോട്ടയം പ്രസ് ക്ലബ്ബിൽ വാർത്താസമ്മേളനത്തിൽ അറിയിച്ചു.
ലോകത്തിന്റെ വിവിധ ഭാഗങ്ങളിൽ തുടരുന്ന യുദ്ധങ്ങളും സൈനിക ഇടപെടലുകളും മൂലം നിരപരാധികളായ ആയിരക്കണക്കിന് സ്ത്രീകളും കുട്ടികളും കൊല്ലപ്പെടുന്ന സാഹചര്യത്തിൽ സമാധാനത്തിനും ജനാധിപത്യ മൂല്യങ്ങൾ സംരക്ഷിക്കുന്നതിനും ശക്തമായ ജനകീയ ഇടപെടൽ അനിവാര്യമാണെന്ന് ഭാരവാഹികൾ പറഞ്ഞു. യുദ്ധങ്ങൾക്കെതിരെ വിവിധ രാജ്യങ്ങളിൽ ഉയരുന്ന സമാധാന റാലികളും പ്രതിഷേധങ്ങളും പ്രതീക്ഷ നൽകുന്നതായും അവർ ചൂണ്ടിക്കാട്ടി.
ജൂലൈ 25-ന് നടക്കുന്ന ഉദ്ഘാടന സമ്മേളനം കേരള നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ ഉദ്ഘാടനം ചെയ്യും. ഐപ്സോ പ്രിസീഡിയം അംഗം ഡോ. പി.കെ. ജനാർദ്ദനക്കുറുപ്പ് പതാക ഉയർത്തും. മുൻ മന്ത്രിയും ഐപ്സോ സംസ്ഥാന ജനറൽ സെക്രട്ടറിയുമായ എം.ബി . രാജേഷ് അധ്യക്ഷത വഹിക്കും. മുൻ മന്ത്രിയും സിപിഐ നേതാവുമായ മുല്ലക്കര രത്നാകരൻ "ഇന്ത്യൻ ജനാധിപത്യം നേരിടുന്ന വെല്ലുവിളികൾ" എന്ന വിഷയത്തിൽ മുഖ്യപ്രഭാഷണം നടത്തും.
സി.പി. നാരായണൻ (മുൻ എംപി), അഡ്വ. കെ. അനിൽകുമാർ, കെ. ദേവിക, ഇ. വേലായുധൻ, ഡോ. എ ജോസ്, ഡോ. ബൈജു വയലത്ത് എന്നിവർ സംസാരിക്കും. ഉച്ചകഴിഞ്ഞ് നടക്കുന്ന ക്യാമ്പിൽ ഡോ. കെ.എം.സീതി പശ്ചിമേഷ്യൻ സംഘർഷങ്ങളെക്കുറിച്ച് പ്രഭാഷണം നടത്തും. അഡ്വ. വി. ജയപ്രകാശ്, അനിയൻ മാത്യു എന്നിവർ പങ്കെടുക്കും. സംസ്ഥാന സെക്രട്ടറി സി.ആർ. ജോസ് ഭാവി പ്രവർത്തന പരിപാടികൾ അവതരിപ്പിക്കും. തുടർന്ന് ക്യാമ്പ് അംഗങ്ങളുടെ പൊതുചർച്ചയും മറുപടിയും നടക്കും.
ജൂലൈ 26-ന് രാവിലെ 9.30-ന് ആരംഭിക്കുന്ന ക്യൂബൻ ഐക്യദാർഢ്യ സമ്മേളനം സിപിഎ(എം) ദേശീയ നേതാവ് എം.എ. ബേബി ഉദ്ഘാടനം ചെയ്യും. സി.പി.ഐ . സംസ്ഥാന സെക്രട്ടറി ബിനോയ് വിശ്വം അധ്യക്ഷത വഹിക്കും. കെപിസിസി രാഷ്ട്രീയകാര്യ സമിതി അംഗം കെ.സി. ജോസഫ്, ഡോ. എൻ. രമാകാന്തൻ, അഡ്വ. എം.എ. ഫ്രാൻസിസ്, ആറ്റിങ്ങൽ സുഗുണൻ, ബാബു ജോസഫ്, അഡ്വ. കെ.ആർ. ശ്രീനിവാസൻ എന്നിവർ വിവിധ വിഷയങ്ങളിൽ സംസാരിക്കും. ക്യാമ്പിന്റെ അവലോകനം ഡോ. സി. ഉദയകല അവതരിപ്പിക്കും.
