ഡൽഹി: മുഖ്യമന്ത്രി വി.ഡി. സതീശനെതിരെ യുഡിഎഫ് കണ്‍വീനർ അടൂർ പ്രകാശ് കോണ്‍ഗ്രസ് അധ്യക്ഷൻ മല്ലികാർജുൻ ഖാർഗെയ്ക്ക് രേഖാമൂലം പരാതി നല്‍കി.
പാർട്ടിയും സർക്കാരും തമ്മിലുള്ള ഏകോപനമില്ലായ്മയും മുന്നണിയില്‍ ആവശ്യമായ കൂടിയാലോചനകള്‍ നടത്താതെ മുഖ്യമന്ത്രി തീരുമാനങ്ങള്‍ കൈക്കൊള്ളുന്നുവെന്നുമുള്ള ആരോപണങ്ങളാണ് പരാതിയില്‍ പ്രധാനമായും ഉന്നയിച്ചിരിക്കുന്നത്. പരാതിയില്‍ ഉറച്ചുനില്‍ക്കുന്നതായി അടൂർ പ്രകാശും വ്യക്തമാക്കി.
പ്രധാനപ്പെട്ട സർക്കാർ തീരുമാനങ്ങള്‍ പലതും യുഡിഎഫ് കണ്‍വീനറായ താൻ മാധ്യമങ്ങളിലൂടെയാണ് അറിയുന്നതെന്നാണ് അടൂർ പ്രകാശിന്റെ ആരോപണം. മുസ്ലിം ലീഗ് നേതാവ് എം.കെ. മുനീറിനെ ഭരണപരിഷ്കാര കമ്മീഷൻ ചെയർമാനായും ഫോർവേഡ് ബ്ലോക്ക് നേതാവ് ജി. ദേവരാജനെ ഡല്‍ഹിയിലെ സർക്കാരിന്റെ പ്രത്യേക പ്രതിനിധിയായും നിയമിച്ച തീരുമാനങ്ങള്‍ മുന്നണിയില്‍ ചർച്ച ചെയ്തില്ലെന്നും അദ്ദേഹം പരാതിയില്‍ ചൂണ്ടിക്കാട്ടിയിട്ടുണ്ട്. ജൂലൈയ്ക്ക് ശേഷം യുഡിഎഫ് ഏകോപന സമിതി യോഗങ്ങള്‍ കൃത്യമായി വിളിച്ചുചേർക്കുന്നതില്‍ മുഖ്യമന്ത്രിയുടെ ഭാഗത്തുനിന്ന് ആവശ്യമായ ഇടപെടലുണ്ടായില്ലെന്നും ആരോപണമുണ്ട്.
അതേസമയം, വി.ഡി. സതീശൻ ഏകപക്ഷീയമായി തീരുമാനങ്ങളെടുക്കുന്നു എന്ന നിലപാട് തനിക്കില്ലെന്ന് കെപിസിസി അധ്യക്ഷനും മന്ത്രിയുമായ സണ്ണി ജോസഫ് വ്യക്തമാക്കി. പരസ്യപ്രസ്താവനകള്‍ ഒഴിവാക്കണമെന്ന് കോണ്‍ഗ്രസ് നേതൃത്വം നേരത്തെ നിർദേശിച്ചിട്ടുണ്ടെന്നും അദ്ദേഹം പറഞ്ഞു. കേരളത്തിലെ ഭരണപരമായ വിഷയങ്ങളില്‍ ഹൈക്കമാൻഡ് നേതാക്കള്‍ വിശദീകരണം തേടിയാല്‍ സത്യസന്ധമായ നിലപാട് അറിയിക്കുമെന്നും സണ്ണി ജോസഫ് വ്യക്തമാക്കി.
അടൂർ പ്രകാശ് കോണ്‍ഗ്രസ് അധ്യക്ഷൻ മല്ലികാർജുൻ ഖാർഗെയെ കണ്ടതിന് പിന്നാലെ ലോക്സഭാ പ്രതിപക്ഷ നേതാവ് രാഹുല്‍ ഗാന്ധിയെയും കാണാൻ ശ്രമിക്കുന്നുണ്ട്. കേരളത്തിന്റെ ചുമതലയുള്ള എഐസിസി ജനറല്‍ സെക്രട്ടറി ദീപദാസ് മുൻഷിയെയും അടൂർ പ്രകാശ് കണ്ടതായി റിപ്പോർട്ടുകളുണ്ട്. പരാതിയില്‍ എഐസിസി നേതൃത്വം പരിശോധിക്കുമെന്ന് സണ്ണി ജോസഫ് അറിയിച്ചു.
കോണ്‍ഗ്രസിലെ ആഭ്യന്തര ഭിന്നത പരസ്യപ്രസ്താവനകളിലേക്ക് നീങ്ങുന്നതില്‍ നേതൃത്വത്തിന് അതൃപ്തിയുണ്ടെന്നാണ് റിപ്പോർട്ടുകള്‍. നേതാക്കള്‍ അച്ചടക്കവും മാന്യതയും പാലിക്കണമെന്നും സൈബർ ആക്രമണങ്ങള്‍ ഉള്‍പ്പെടെയുള്ള നടപടികള്‍ അംഗീകരിക്കാനാകില്ലെന്നും സണ്ണി ജോസഫ് പറഞ്ഞു. വിഷയത്തില്‍ ഹൈക്കമാൻഡ് സ്വീകരിക്കുന്ന നിലപാട് നിർണായകമാകുമെന്നാണ് സൂചന.
