തിരുവനന്തപുരം: മുഖ്യമന്ത്രി വിഡി സതീശനെതിരെ പരസ്യ വിമര്‍ശനം ഉന്നയിച്ച്‌ രംഗത്തുവന്ന യുഡിഎഫ് കണ്‍വീനര്‍ അടൂര്‍ പ്രകാശ് കോണ്‍ഗ്രസിലും മുന്നണിയിലും ഒറ്റപ്പെട്ടു.
അടൂര്‍ പ്രകാശിനെ പിന്തുണയ്ക്കാന്‍ ആകെപ്പാടെ അങ്ങിങ്ങ് ഒറ്റപ്പെട്ട ചില ദുര്‍ബല ശബ്ദങ്ങള്‍ മാത്രം ഉയര്‍ന്നപ്പോള്‍ പാര്‍ട്ടിയിലെയും പൊതു സമൂഹത്തിലെയും പൊതുവികാരം മുഖ്യമന്ത്രിക്ക് അനുകൂലമായി ഉയര്‍ന്നതാണ് മുതിര്‍ന്ന നേതാക്കളെ പിന്നോട്ട് വലിയാന്‍ പ്രേരിപ്പിച്ചത്.
കെപിസിസി മുന്‍ പ്രസിഡന്‍റ് കെ സുധാകരന്‍ അടൂര്‍ പ്രകാശിനെ പിന്തുണച്ചെങ്കിലും അദ്ദേഹത്തിന്‍റെ ആരോഗ്യാവസ്ഥ അറിയുന്നതിനാല്‍ ആരും അതിനത്ര പ്രാധാന്യം കല്പിച്ചതുമില്ല.
അടൂര്‍ പ്രകാശിന്റെ വിമര്‍ശനങ്ങള്‍ക്കു പിന്നില്‍ കോണ്‍ഗ്രസിന് അപ്രിയരായ മറ്റ് ചില കേന്ദ്രങ്ങള്‍ ആണെന്ന അഭ്യൂഹങ്ങളും അദ്ദേഹത്തിന് തിരിച്ചടിയായി.
സംഘടനാ ചുമതലയുള്ള എഐസിസി ജനറല്‍ സെക്രട്ടറി കെസി വേണുഗോപാലിനെയാണ് തുടക്കത്തില്‍ ചിലര്‍ സംശയിച്ചതെങ്കിലും അദ്ദേഹം ആരംഭത്തില്‍ തന്നെ അടൂര്‍ പ്രകാശിനെ പരസ്യമായി തള്ളിയിരുന്നു.
എന്നാല്‍ എസ്‌എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശനും പ്രകാശിന്റെ അടുത്ത ബന്ധുവും വ്യവസായിയുമായ ബിജു രമേശുമാണ് അടൂര്‍ പ്രകാശിന് പിന്നിലെന്ന അഭ്യൂഹങ്ങള്‍ പിന്നാലെ പുറത്തുവന്നു.
സര്‍ക്കാര്‍ മാറിയതോടെ സംസ്ഥാനത്തെ പൊതുമേഖലാ സ്ഥാപനങ്ങളുടെയും അക്കാദമികളുടെയും തലപ്പത്തേയ്ക്ക് വെള്ളാപ്പള്ളിയുടെയും ബിജു രമേശിന്‍റെയും ബിനാമികളുടെ ലിസ്റ്റുമായി അടൂര്‍ പ്രകാശ് മുഖ്യമന്ത്രി വിഡി സതീശനെയും കെപിസിസി പ്രസിഡന്‍റ് സണ്ണി ജോസഫിനെയും സമീപിച്ചിരുന്നു.
അക്കാദമികളുടെ വിവിധ ഭാരവാഹിത്വങ്ങളിലേയ്ക്ക് അടൂര്‍ പ്രകാശ് നല്‍കിയ ലിസ്റ്റില്‍ ഉണ്ടായിരുന്ന പലരും കോണ്‍ഗ്രസ് ബന്ധം പോലും ഉള്ളവരായിരുന്നില്ലെന്ന സംശയം ഉയര്‍ന്നതോടെയാണ് ഈ പേരുകള്‍ എങ്ങിനെ നിര്‍ദേശിക്കപ്പെട്ടെന്ന സംശയും ഉയര്‍ന്നത്.
തുടര്‍ന്ന് നേതാക്കള്‍ നടത്തിയ അന്വേഷണത്തിലാണ് അടൂര്‍ പ്രകാശിന്റെ ലിസ്റ്റിലെ യഥാര്‍ഥ സ്പോണ്‍സര്‍മാരെ മനസിലാകുന്നത്.
സാംസ്കാരിക വകുപ്പിനു കീഴിലെ വിവിധ അക്കാദമികളുടെ തലപ്പത്തേയ്ക്ക് നോട്ടമിട്ടിരുന്ന ചില സാംസ്കാരിക പ്രമുഖര്‍ ഇത്തവണയും പതിവുപോലെ ഈ പദവികള്‍ക്കായി വെള്ളാപ്പള്ളി നടേശനെ സമീപിക്കുകയായിരുന്നു.
എന്നാല്‍ കഴിഞ്ഞ ഭരണം അവസാനിക്കുന്നതിനു തലേ ദിവസം വരെ പിണറായി വിജയനുവേണ്ടി വെള്ളംകോരുകയായിരുന്ന വെള്ളാപ്പള്ളിയെ യുഡിഎഫ് ഭരണത്തിന്‍റെ ഏഴയലത്ത് അടുപ്പിക്കരുതെന്നത് നേരത്തെ തന്നെ നേതൃതലത്തില്‍ തീരുമാനമുണ്ടായിരുന്നു.
പകരം ശിവഗിരി മഠം നേരിട്ടായിരുന്നു ഈഴവ സമുദായത്തിന്‍റെ താല്‍പര്യങ്ങള്‍ സര്‍ക്കാരുമായി പങ്കുവച്ചത്.
ഈ സാഹചര്യത്തിലാണ് യുഡിഎഫ് കണ്‍വീനര്‍ സ്ഥാനത്തുള്ള അടൂര്‍ പ്രകാശുമായി വെള്ളാപ്പള്ളി കൈകോര്‍ക്കുകയും വളഞ്ഞ വഴിയിലൂടെ കാര്യസാധ്യത്തിന് ശ്രമം നടത്തുകയും ചെയ്തത്.
ഇതേ തന്ത്രമായിരുന്നു പ്രകാശിന്റെ അടുത്ത ബന്ധുവും വിവാദ വ്യവസായിയുമായ ബിജു രമേശും പയറ്റിയത്. അടൂര്‍ പ്രകാശിന്റെ മകന്‍റെ ഭാര്യാപിതാവാണ് ബിജു രമേശ്. ഉമ്മന്‍ ചാണ്ടി സര്ക്കാരിന്റെ തുടര്‍ഭരണം ഇല്ലാതാക്കിയതില്‍ നിര്‍ണായക റോള്‍ വഹിച്ച ആളാണ് ഇദ്ദേഹം.
ബിജു രമേശിന്‍റെ ആവശ്യം ചില ഐഎഎസ്, ഐപിഎസ് ഉദ്യോഗസ്ഥരുടെ പോസ്റ്റിംങ്ങും ചില ബോര്‍ഡുകളിലും കോര്‍പ്പറേഷനുകളിലും ഭരണസമിതികളില്‍ വേണ്ടപ്പെട്ടവരെ തിരുകി കയറ്റലുമായിരുന്നു. യുഡിഎഫ് കണ്‍വീനര്‍ പോക്കറ്റില്‍ ഉള്ളപ്പോള്‍ ഭരണത്തില്‍ ചില ചരട് വലികള്‍ നടത്താന്‍ തനിക്കും കഴിയും എന്നായിരുന്നു ബിജുവിന്റെ കണക്കുകൂട്ടല്‍.
എന്നാല്‍ സര്ക്കാരിന്റെ ആരംഭം മുതല്‍ അടൂര്‍ പ്രകാശ് നല്‍കുന്ന ശുപാര്‍ശകളില്‍ പാര്‍ട്ടിക്കതീതമായ ചില സവിശേഷതകള്‍ ശ്രദ്ധയില്‍പെട്ടതോടെ അതെല്ലാം തുടര്‍ച്ചയായി അവഗണിക്കപ്പെടുകയായിരുന്നു. ഇത്തരം കുതന്ത്രങ്ങള്‍ എല്ലാം ഒരു മുഴം മുന്‍പെ തിരിച്ചറിയാന്‍ കഴിയുന്ന ആളാണ് കെ കരുണാകരന്‍റെ കൂര്‍മ്മബുദ്ധിയുള്ള വി ഡി സതീശന്‍. അക്കാദമികളുടെ തലപ്പത്തെ നിയമനങ്ങളിലും ഇത് ആവര്‍ത്തിക്കപ്പെട്ടു.
ഇതോടെയാണ് തന്‍റെ വഴിക്ക് കാര്യങ്ങള്‍ പോകുന്നില്ലെന്ന് ബോധ്യമായ അടൂര്‍ പ്രകാശ് പരസ്യ വിമര്‍ശനങ്ങള്‍ക്ക് ഒരുമ്പെട്ടിറങ്ങുന്നത്.
പരസ്യ വിമര്‍ശനം നടത്തിയാല്‍ മുഖ്യമന്ത്രിയും നേതൃത്വവും അനുനയത്തിന് തയ്യാറാകുകയും എഐസിസി ജനറല്‍ സെക്രട്ടറി കെസി വേണുഗോപാലിന്‍റെ പിന്തുണ തനിക്കു കിട്ടുകയും ചെയ്യുമെന്നായിരുന്നു അടൂര്‍ പ്രകാശിന്റെ തന്ത്രം. മാത്രമല്ല ബദല്‍ നീക്കങ്ങളില്‍ കെസി പക്ഷത്തിന്‍റെ ചുക്കാന്‍ പിടിക്കാന്‍ കഴിയുമെന്നും പ്രതീക്ഷിച്ചു.
ഈ ഉപദേശം അദ്ദേഹത്തിന് നല്‍കിയത് ബാര്‍കോഴ ആരോപണം മുതല്‍ ഇത്തരം കാര്യങ്ങളില്‍ പരിണതപ്രജ്ഞനായ ബിജു രമേശാണെന്നാണ് നിഗമനം.
ഭരണ നേതൃത്വത്തെ വിരട്ടി കാര്യങ്ങള്‍ നേടണമെന്നായിരുന്നു ബിജു രമേശിന്‍റെ ഉപദേശം. പക്ഷേ എല്ലാം പിഴച്ചു. കെസി ആദ്യമേ തള്ളി. പാര്‍ട്ടി അധ്യക്ഷന്‍ മല്ലികാര്‍ജുന ഖാര്‍ഗെയെ കണ്ട് പരാതി പറഞ്ഞെങ്കിലും അദ്ദേഹം കേട്ടതായി മാത്രം ഭാവിച്ചു എന്നാണറിവ്.
ഇപ്പോള്‍ പാര്‍ട്ടിയില്‍ ഏതാണ്ട് ഒറ്റപ്പെട്ട അവസ്ഥയിലാണ് അടൂര്‍ പ്രകാശ്. യുഡിഎഫ് കണ്‍വീനര്‍ സ്ഥാനത്ത് തുടരും എന്ന കാര്യത്തിലും ഉറപ്പില്ലെന്നതാണ് നിലവിലെ സ്ഥിതി.
