കൊച്ചി: എഡിജിപി പി. വിജയനെതിരെ സമൂഹമാധ്യമങ്ങളില്‍ അധിക്ഷേപകരമായ കമന്റിട്ടയാള്‍ എറണാകുളത്ത് അറസ്റ്റില്‍.
നോര്‍ത്ത് പറവൂര്‍ സ്വദേശിയായ രാഹുല്‍ രാജുവിനെയാണ് എറണാകുളം റൂറല്‍ സൈബര്‍ പൊലീസ് അറസ്റ്റ് ചെയ്തത്.
ചേരാനല്ലൂരിലുണ്ടായ വാഹനാപകടത്തില്‍ മരണപ്പെട്ട വ്യക്തിയുടെ വീട് എഡിജിപി സന്ദര്‍ശിച്ച വാര്‍ത്തയ്ക്ക് താഴെയായിരുന്നു രാഹുല്‍ മോശം കമന്റിട്ടത്.
കേസില്‍ പൊലീസിന്റെ ഭാഗത്ത് നിന്നുണ്ടായ വീഴ്ച കണക്കിലെടുത്തുകൊണ്ട്, ആഭ്യന്തരമന്ത്രിയുടെ പ്രത്യേക നിര്‍ദേശത്തെ തുടര്‍ന്നാണ് എഡിജിപി പി.വിജയന്‍ മരിച്ച ജയബാലകൃഷ്ണന്റെ വീട് സന്ദര്‍ശിച്ചിരുന്നത്.
ഈ സന്ദര്‍ശനവുമായി ബന്ധപ്പെടുത്തി അപകീര്‍ത്തികരമായ കമന്റിട്ടത് ചൂണ്ടിക്കാട്ടിയാണ് എഫ്‌ഐആര്‍ രജിസ്റ്റര്‍ ചെയ്തിരിക്കുന്നത്.
കമന്റിന് പിന്നാലെ സൈബര്‍ പൊലീസിന്റെ സര്‍വൈലന്‍സ് ടീം ഇയാളെ കണ്ടെത്തുകയും അറസ്റ്റ് രേഖപ്പെടുത്തുകയുമായിരുന്നു.
പ്രതിയെ മജിസ്‌ട്രേറ്റിന് മുന്നില്‍ ഹാജരാക്കി റിമാന്‍ഡ് ചെയ്യുമെന്ന് പൊലീസ് അറിയിച്ചു.
