പാമ്പാടി: അയർക്കുന്നത്ത് സ്വകാര്യ ബസ് കാറിലും പാർക്ക് ചെയ്തിരുന്ന ആംബുലൻസിലും ഇടിച്ച് അപകടം. ഇന്ന് രാവിലെ 6.30ഓടെയാണ് അയർക്കുന്നം ഇല്ലിമൂലയിൽ അപകടമുണ്ടായത്.
കോട്ടയത്തുനിന്ന് തൊടുപുഴയിലേക്ക് പോകുകയായിരുന്ന എവസ്റ്റ് സ്വകാര്യ ബസാണ് ആദ്യം കാറിൽ ഇടിച്ചത്. തുടർന്ന് റോഡരികിൽ പാർക്ക് ചെയ്തിരുന്ന ആംബുലൻസിലും സമീപത്തെ കടയിലും ഇടിച്ച ശേഷമാണ് ബസ് നിന്നത്.
ഇടിയുടെ ആഘാതത്തിൽ ആംബുലൻസിന്റെ മുൻവശത്തെ ചില്ലുകൾ തകർന്നു. ഡോറുകൾക്കും കേടുപാടുകൾ സംഭവിച്ചു. അപകടത്തിൽ ആർക്കും പരുക്കേറ്റിട്ടില്ല. വിവരമറിഞ്ഞ് അയർക്കുന്നം പൊലീസ് സ്ഥലത്തെത്തി തുടർനടപടികൾ സ്വീകരിച്ചു.
