തിരുവനന്തപുരം: മെസിയെയും അർജന്റീന ടീമിനെയും കേരളത്തില് എത്തിക്കുമെന്ന് വാഗ്ദാനം ചെയ്ത് കോടികളുടെ തട്ടിപ്പ് നടത്തിയ കേസില് മുൻ കായിക മന്ത്രി വി അബ്ദുറഹ്മാനെ തള്ളിപ്പറഞ്ഞ് കൂടുതല് സ്റ്റാഫ് അംഗങ്ങള്.
ചട്ടലംഘനങ്ങള് ചൂണ്ടിക്കാട്ടിയിട്ടും അബ്ദുറഹ്മാൻ തിരുത്തിയില്ലെന്ന് പ്രൈവറ്റ് സെക്രട്ടറിയായിരുന്ന ജി ആർ രമേശ് എസ്ഐടിക്ക് മൊഴി നല്കി. തന്നിഷ്ടപ്രകാരം വകുപ്പിലെ കാര്യങ്ങള് തീരുമാനിച്ചെന്നും രമേശ് എസ്ഐടിയുടെ ചോദ്യം ചെയ്യലില് ആരോപിച്ചു.
ടെൻഡറില്ലാതെ സ്പോണ്സറെ വയ്ക്കരുതെന്ന മുന്നറിയിപ്പ് അബ്ദുറഹ്മാൻ അവഗണിച്ചു. എയ്ഡഡ് കോളേജ് അദ്ധ്യാപികയുടെ സേവനത്തിനെതിരെ മുന്നറിയിപ്പ് നല്കിയിട്ടും മുൻമന്ത്രി ചെവികൊണ്ടില്ല. മന്ത്രിയുടെ സുഹൃത്തെന്ന നിലയില് മെയിലുകള് കൈകാര്യം ചെയ്യാൻ അനുവദിച്ചുവെന്നും മൊഴിയില് പറയുന്നു.
മറ്റൊരു പ്രൈവറ്റ് സെക്രട്ടറിയായ സത്യപാലും അബ്ദുറഹ്മാനെതിരെ എസ്ഐടിക്ക് മൊഴി നല്കിയിരുന്നു. റിപ്പോർട്ടർ ചാനലിനെ സ്പോണ്സറാക്കാനുള്ള തീരുമാനം മന്ത്രിയുടേതായിരുന്നു. ടെൻഡറില്ലാതെ സ്പോണ്സറെ വയ്ക്കരുതെന്ന് ഉദ്യോഗസ്ഥർ മുന്നറിയിപ്പ് നല്കിയിട്ടും മുൻ മന്ത്രി തന്നിഷ്ടം പോലെ പ്രവർത്തിച്ചു. ആന്റോയുടെ ക്രിമിനല് പശ്ചാത്തലവും മന്ത്രി അവഗണിച്ചതാണ് സത്യപാല് മൊഴി നല്കി.
തട്ടിപ്പ് കേസില് മാനേജിംഗ് എഡിറ്റർ ആന്റോ അഗസ്റ്റിൻ ഒന്നാം പ്രതിയും റിപ്പോർട്ടർ ബ്രോഡ്കാസ്റ്റിംഗ് കമ്പനി രണ്ടാം പ്രതിയുമാണ്. വഞ്ചന, തട്ടിപ്പ്, ഗൂഢാലോചന എന്നിവയാണ് കുറ്റങ്ങള്. പ്രാഥമിക അന്വേഷണത്തെ തുടർന്ന് എസ്ഐടി അംഗമായ പി വിക്രമന്റെ പരാതിയിലാണ് കേസ്. ആന്റോയും മറ്റും 2024 ഡിസംബർ മുതല് ഗൂഢാലോചന നടത്തി. വ്യാജവും നിയമവിരുദ്ധവുമായ വ്യവസ്ഥകള് അർജന്റീന ഫുട്ബാള് അസോസിയേഷനുമായി ഉണ്ടാക്കിയ കരാറില് എഴുതിച്ചേർത്ത് സർക്കാരിനെയും മറ്റുള്ളവരെയും വഞ്ചിക്കുകയും അന്യായലാഭം ഉണ്ടാക്കുകയും ചെയ്തു എന്നിങ്ങനെയുള്ള കുറ്റങ്ങളാണ് എഫ്ഐആറിലുള്ളത്.
