ഗാന്ധിനഗർ: കോടനാട് അഭയാരണ്യത്തില്‍നിന്ന് വിദഗ്ധ ചികിത്സയ്‌ക്കായി ഗുജറാത്തിലെ വൻതാരയിലെത്തിച്ച ആനക്കുട്ടി മായയുടെ ആരോഗ്യനിലയില്‍ പുരോഗതി.
മായ സാധാരണ നിലയില്‍ തീറ്റയെടുത്തുതുടങ്ങിയതായി ചികിത്സിക്കുന്ന ഡോക്ടർമാർ അറിയിച്ചു. കാലുകളിലെ പൊട്ടലുകള്‍ ഉള്‍പ്പെടെയുള്ള പരിക്കുകള്‍ക്ക് ചികിത്സ തുടരുകയാണ്.
ഏകദേശം ഒന്നര വയസുള്ള മായയെ ജനിച്ചയുടൻ ആനക്കൂട്ടം ഉപേക്ഷിച്ചതിനെ തുടർന്ന് കോടനാട് അഭയാരണ്യത്തിലാണ് വളർത്തിയിരുന്നത്. ജനിതകപരമായ അസ്ഥിബലക്കുറവും (Genetic Osteopenia) മായയെ അലട്ടിയിരുന്നു. മാസങ്ങള്‍ക്ക് മുമ്പ് കളിക്കുന്നതിനിടെ വീണ് വലതുതോളിന് ഗുരുതരമായി പരിക്കേറ്റതോടെ എഴുന്നേല്‍ക്കാനും നടക്കാനും കഴിയാത്ത അവസ്ഥയിലായി.
ആരോഗ്യനില മോശമായതിനെ തുടർന്ന് കേരളത്തിലെ വിദഗ്ധ സമിതി മായയ്‌ക്ക് ദയാവധമാണ് നിർദ്ദേശിച്ചത്. ഒടുവില്‍ അനന്ത് അംബാനിയുടെ വൻതാര ചികിത്സ ഏറ്റെടുക്കുകയായിരുന്നു. ഏകദേശം 125-130 കിലോഗ്രാം ഭാരമുള്ള മായയെ ക്രെയിനിന്റെയും ജീവനക്കാരുടെയും സഹായത്തോടെ ആംബുലൻസില്‍ കോടനാട് നിന്ന് നെടുമ്പാശേരിയിലെത്തിച്ചു. തുടർന്ന് പ്രത്യേക ചാർട്ടേഡ് വിമാനത്തിലാണ് ഗുജറാത്തിലെ ജാംനഗറിലുള്ള വൻതാരയിലേക്ക് മാറ്റിയത്.
വൻതാരയിലെ വിദഗ്ധ ചികിത്സയ്‌ക്കിടെ മായയുടെ രണ്ട് മുൻകാലുകള്‍ക്ക് പുറമെ ഒരു പിൻകാലിലും പൊട്ടലുണ്ടെന്ന് കണ്ടെത്തിയിട്ടുണ്ട്. മുൻകാലുകളില്‍ ഫൈബർ കാസ്റ്റ് ഇട്ടു. പിൻകാലിലെ പരിക്കിന് പ്രഷർ ബാൻഡേജ് ഇടാനാണ് ഡോക്ടർമാരുടെ തീരുമാനം.
മായയുടെ രക്തസാമ്പിളുകള്‍ പരിശോധനയ്‌ക്ക് അയച്ചിട്ടുണ്ട്. പരിശോധനാഫലം നാളെയോടെ ലഭിക്കുമെന്നാണ് പ്രതീക്ഷ. ഇതിന്റെ അടിസ്ഥാനത്തിലായിരിക്കും തുടർചികിത്സ തീരുമാനിക്കുക. ഹോർമോണ്‍ ചികിത്സയും ഹൈഡ്രോതെറാപ്പിയും ഉള്‍പ്പെടെയുള്ള ചികിത്സകള്‍ക്ക് ഡോക്ടർമാർ പദ്ധതിയിട്ടിട്ടുണ്ട്.
നിലവില്‍ മായ സാധാരണപോലെ തീറ്റയെടുത്തുതുടങ്ങിയത് ചികിത്സാ സംഘത്തിന് ആശ്വാസമായിട്ടുണ്ട്. കാലുകളിലെ പരിക്കുകള്‍ ഭേദമാക്കുന്നതിനും ആരോഗ്യനില മെച്ചപ്പെടുത്തുന്നതിനുമായി വിദഗ്ധ ഡോക്ടർമാരുടെ നേതൃത്വത്തില്‍ ചികിത്സയും നിരീക്ഷണവും തുടരുകയാണ്. മായയുടെ ചികിത്സാചെലവുകള്‍ വൻതാരയാണ് വഹിക്കുന്നത്.
