തിരുവനന്തപുരം: നിർമാണാവശ്യങ്ങള്ക്കായി ഖനനം ചെയ്തുനീക്കുന്ന കേരളത്തിലെ ചെങ്കല് നിക്ഷേപങ്ങളില് ഒളിഞ്ഞിരിക്കുന്നത് കോടികള് വിലമതിക്കുന്ന അപൂർവ ധാതുവിഭവങ്ങളാകാമെന്ന് പുതിയ പഠനങ്ങള്.
ലോകവിപണിയില് വലിയ മൂല്യമുള്ള സ്കാൻഡിയത്തിന്റെ സാന്നിധ്യമാണ് വടക്കൻ കേരളത്തിലെ ലാറ്ററൈറ്റ് മേഖലകളില് കണ്ടെത്തിയിരിക്കുന്നത്. കണ്ണൂർ, കാസർകോട് ജില്ലകളിലെ ചില പ്രദേശങ്ങളില് സ്കാൻഡിയത്തിന്റെ ഉയർന്ന സാന്ദ്രതയുണ്ടെന്നാണ് ജിയോളജിക്കല് സർവേ ഓഫ് ഇന്ത്യയുടെ (ജി.എസ്.ഐ) പഠനങ്ങള് സൂചിപ്പിക്കുന്നത്.
കണ്ടെത്തല് വാണിജ്യാടിസ്ഥാനത്തിലുള്ള ഖനനത്തിലേക്ക് എത്തുകയാണെങ്കില് കേരളത്തിന്റെ ധാതുസമ്പത്ത് മേഖലയില് വലിയ മാറ്റങ്ങള്ക്ക് വഴിയൊരുങ്ങും.ഭാരം കുറഞ്ഞതും കൂടുതല് കരുത്തുള്ളതുമായ അലുമിനിയം അലോയ്കള് നിർമിക്കുന്നതിന് സ്കാൻഡിയം ഉപയോഗിക്കുന്നു. ഇന്ധന സെല്ലുകള്, ബഹിരാകാശ വാഹനങ്ങള്, പ്രതിരോധ ഉപകരണങ്ങള്, നൂതന ഇലക്ട്രോണിക്സ് തുടങ്ങിയ മേഖലകളിലും ഇതിന് വലിയ പ്രാധാന്യമുണ്ട്.
പരിമിതമായ ആഗോള ലഭ്യതയും വ്യാവസായിക പ്രാധാന്യവുമാണ് സ്കാൻഡിയത്തെ നിർണായക ധാതുവാക്കി മാറ്റുന്നത്. നിലവില് ചൈനയാണ് ലോകത്തെ പ്രധാന സ്കാൻഡിയം ഉത്പാദക രാജ്യവും വിതരണക്കാരും. ടൈറ്റാനിയം, അപൂർവ ഭൂമി മൂലകങ്ങള് എന്നിവയുടെ സംസ്കരണത്തിനിടെയാണ് പ്രധാനമായും സ്കാൻഡിയം വേർതിരിച്ചെടുക്കുന്നത്. ഇന്ത്യയില് ഇതുവരെ വാണിജ്യാടിസ്ഥാനത്തിലുള്ള ഉത്പാദനം ആരംഭിച്ചിട്ടില്ല.കേരളത്തിലെ ലാറ്ററൈറ്റ് നിക്ഷേപങ്ങള് സ്കാൻഡിയം ഉള്പ്പെടെയുള്ള നിർണായക ധാതുക്കളുടെ സാന്നിധ്യംകൊണ്ട് ശ്രദ്ധേയമാകുകയാണ്. പ്രത്യേകിച്ച് വടക്കൻ കേരളത്തിലെ ചെങ്കല് മേഖലകളില് നടത്തിയ പഠനങ്ങളാണ് പുതിയ സാധ്യതകള് തുറന്നുകാട്ടുന്നത്
കാസർകോട് ജില്ലയിലെ ഏതടക്കയിലെ അലുമിനസ് ലാറ്ററൈറ്റ് നിക്ഷേപങ്ങളിലും കാനം മേഖലയിലെ നിർണായക ധാതു സാന്നിധ്യത്തെക്കുറിച്ചുള്ള പഠനങ്ങളിലുമാണ് സ്കാൻഡിയത്തിന്റെ സാന്നിധ്യം സംബന്ധിച്ച വിവരങ്ങള് ലഭിച്ചത്. ലാറ്ററൈറ്റ് പ്രൊഫൈലുകളില് ഉയർന്ന സാന്ദ്രതയില് സ്കാൻഡിയം കണ്ടെത്തിയതായാണ് ജി.എസ്.ഐയുടെ പഠനങ്ങള് വ്യക്തമാക്കുന്നത്.നാഷണല് ക്രിട്ടിക്കല് മിനറല് മിഷന്റെ ഭാഗമായി രാജ്യത്തെ നിർണായക ധാതുസമ്പത്ത് കണ്ടെത്തുന്നതിനും വികസിപ്പിക്കുന്നതിനുമുള്ള ശ്രമങ്ങള് ശക്തമാകുന്നതിനിടെ കേരളത്തിലെ ഈ കണ്ടെത്തലിന് പ്രത്യേക പ്രാധാന്യമുണ്ട്.
ലോകവിപണിയില് സ്കാൻഡിയത്തിന് ഉയർന്ന വിലയാണ് ലഭിക്കുന്നത്. സ്കാൻഡിയം ഓക്സൈഡിന് കിലോഗ്രാമിന് ഏകദേശം 750 മുതല് 1,200 ഡോളർ വരെയാണ് വില. ഇന്ത്യൻ രൂപയില് ഏകദേശം 65,000 മുതല് 1.05 ലക്ഷം രൂപ വരെ വരും. നിർമാണാവശ്യങ്ങള്ക്കായി കേരളത്തിലെ ലാറ്ററൈറ്റ് മേഖലകളില് നടക്കുന്ന വ്യാപകമായ ഖനനം ഈ സാഹചര്യത്തില് പുതിയ ചർച്ചകള്ക്ക് വഴിയൊരുക്കുകയാണ്. ചെങ്കല്ല് എന്ന നിർമാണവസ്തുവിനപ്പുറം സ്കാൻഡിയം, ഗാലിയം, വനേഡിയം, അപൂർവ ഭൂമി മൂലകങ്ങള് തുടങ്ങിയവയുടെ ഉറവിടം കൂടിയാണ് ലാറ്ററൈറ്റ് നിക്ഷേപങ്ങള്.





