കോട്ടയം: ഓട്ടോ ചാർജ് വർദ്ധിപ്പിക്കാമെങ്കില്‍ ബസ് ചാർജ് എന്തുകൊണ്ട് വർദ്ധിപ്പിച്ചു കൂടാ. ബസ് ചാർജ് വർദ്ധിപ്പിക്കില്ലെന്ന ഗതാഗത മന്ത്രിയുടെ പ്രസ്താവനയ്‌ക്കെതിരെ പ്രതിഷേധവുമായി സ്വകാര്യ ബസ്സുടമകള്‍ രംഗത്ത്..
നിരക്ക് വർദ്ധനവില്ലാതെ ഇനി ഒരു ദിവസം പോലും സർവീസ് മുന്നോട്ട് കൊണ്ടുപോകാൻ കഴിയില്ലെന്നും, സർക്കാരിന്റെ ഭാഗത്തുനിന്ന് അനുകൂലമായ തീരുമാനം ഉണ്ടായില്ലെങ്കില്‍ എല്ലാ ബസ് ഉടമ സംഘടനകളും ചേർന്ന് സംയുക്തമായി സമരരംഗത്തേക്ക് ഇറങ്ങുമെന്നും ബസ് ഉടമകള്‍ വ്യക്തമാക്കി.
നാല് വർഷം മുൻപ് നിരക്ക് കൂട്ടിയ ഓട്ടോ-ടാക്സി തൊഴിലാളികള്‍ക്ക് പ്രവർത്തനച്ചെലവ് പരിഗണിച്ച്‌ വീണ്ടും ചാർജ് വർദ്ധിപ്പിക്കാൻ സർക്കാർ തയ്യാറാകുമ്പോള്‍, നാലര വർഷം മുൻപ് നിരക്ക് കൂട്ടിയ സ്വകാര്യ ബസ്സുകളെ അവഗണിക്കുന്നത് എന്തിനാണെന്നാണ് ബസ്സുടമകളുടെ ചോദ്യം.
ഇന്ധനവില, ഓയില്‍, സ്പെയർ പാർട്സ്, ടയർ, ബസ്സിന്റെയും ഷാസിയുടെയും വില തുടങ്ങി ബസ് നടത്തിപ്പിന്റെ എല്ലാ മേഖലകളിലും ഭീമമായ വിലവർദ്ധനവാണ് ഉണ്ടായിരിക്കുന്നത്. ഈ സാഹചര്യത്തില്‍ നിലവിലെ നഷ്ടം നികത്താൻ യാത്രാനിരക്ക് വർദ്ധിപ്പിക്കുകയല്ലാതെ മറ്റ് മാർഗ്ഗങ്ങളില്ലെന്നും ഉടമകള്‍ ചൂണ്ടിക്കാട്ടുന്നു.
വർദ്ധിച്ചുവരുന്ന പ്രവർത്തനച്ചെലവിന് ആനുപാതികമായി സ്വകാര്യ ബസ്സുകളുടെ യാത്രാനിരക്ക് അടിയന്തരമായി വർദ്ധിപ്പിക്കുക.
കഴിഞ്ഞ 15 വർഷമായി തുടരുന്ന കണ്‍സെഷൻ സമ്പ്രദായത്തില്‍ കാലോചിതമായ മാറ്റം വരുത്തുക.
നിലവിലെ ഒരു രൂപ നിരക്ക് മാറ്റി, വിവിധ കമ്മീഷനുകള്‍ ശുപാർശ ചെയ്തതുപോലെ വിദ്യാർത്ഥികളുടെ മിനിമം ചാർജ് 5 രൂപയാക്കുകയും, യാത്രാനിരക്കിന്റെ 50 ശതമാനം കണ്‍സെഷൻ നിരക്കായി നിശ്ചയിക്കുകയും ചെയ്യുക എന്നിവയാണ് ബസ് ഉടമകള്‍ മുന്നോട്ടുവെക്കുന്ന പ്രധാന ആവശ്യങ്ങള്‍.
ഈ രണ്ട് പ്രധാന വിഷയങ്ങളിലും സർക്കാരിന്റെ ഭാഗത്തുനിന്ന് അടിയന്തര ഇടപെടല്‍ ഉണ്ടായില്ലെങ്കില്‍ സംസ്ഥാനത്തെ സ്വകാര്യ ബസ് സർവീസുകള്‍ പൂർണ്ണമായും സ്തംഭിക്കുന്ന രീതിയിലുള്ള സമരത്തിലേക്ക് നീങ്ങേണ്ടി വരുമെന്ന് ഓള്‍ കേരള ബസ് ഓപ്പറേറ്റേഴ്സ് ഓർഗനൈസേഷൻ മുന്നറിയിപ്പ് നല്‍കി
