ഡല്ഹി: വന്ധ്യതാ പരിശോധനയ്ക്കായി ആശുപത്രിയിലെത്തിയ 24 കാരനായ യുവാവിൻ്റെ ശരീരത്തില് ഗർഭപാത്രവും ഫാലോപ്യൻ ട്യൂബും കണ്ടെത്തി.
ഡല്ഹിയിലാണ് മെഡിക്കല് ലോകത്തെ അത്ഭുതപ്പെടുത്തിയ ഈ അപൂർവ സംഭവം റിപ്പോർട്ട് ചെയ്തിരിക്കുന്നത്. കുട്ടികളുണ്ടാകാത്തതിനെ തുടർന്ന് നടത്തിയ പതിവ് പരിശോധനകള്ക്കിടയിലാണ് യുവാവിന് ശരീരത്തിനുള്ളില് സ്ത്രീകളുടെ പ്രത്യുത്പാദന അവയവങ്ങള് ഉണ്ടെന്ന കാര്യം തിരിച്ചറിഞ്ഞത്.
യുവാവിൻ്റെ ശുക്ലത്തില് ബീജങ്ങളുടെ സാന്നിധ്യമില്ലാത്ത ‘അസൂസ്പെർമിയ’ എന്ന അവസ്ഥ കണ്ടെത്തിയിരുന്നു. തുടർന്ന് നടത്തിയ വിശദമായ പരിശോധനയിലാണ് വൃഷണങ്ങള് വൃഷ്ണ സഞ്ചിയിലേക്ക് ഇറങ്ങാതെ അടിവയറ്റില് തന്നെയാണുള്ളതെന്നും ശരീരത്തിനുള്ളില് ഗർഭപാത്രം ഉള്പ്പെടെയുള്ള അവയവങ്ങള് ഉണ്ടെന്നും ഡോക്ടർമാർ സ്ഥിരീകരിച്ചത്.
വൈദ്യശാസ്ത്ര രംഗത്ത് വളരെ അപൂർവമായി മാത്രം കാണപ്പെടുന്ന ‘പെർസിസ്റ്റന്റ് മുള്ളേരിയൻ ഡക്ട് സിൻഡ്രോം’ (Persistent Mullerian Duct Syndrome – PMDS) എന്ന ജന്മനായുള്ള അവസ്ഥയാണിതെന്ന് ഡോക്ടർമാർ വ്യക്തമാക്കി.
എന്താണ് പെർസിസ്റ്റന്റ് മുള്ളേരിയൻ ഡക്ട് സിൻഡ്രോം (PMDS)?
പുരുഷന്മാരുടെ ബാഹ്യ ലൈംഗികാവയവങ്ങളോടെ ജീവിക്കുന്ന വ്യക്തികളില് തന്നെ ആന്തരികമായി ഗർഭപാത്രം പോലുള്ള സ്ത്രീ അവയവങ്ങള് കാണപ്പെടുന്ന അവസ്ഥയാണിതെന്ന് പ്രമുഖ ആൻഡ്രോളജിസ്റ്റും ഐ.എ.എസ്.എച്ച് (IASH) ഇൻസ്റ്റിറ്റ്യൂട്ട് സ്ഥാപകനുമായ ഡോ. ചിരാഗ് ഭണ്ഡാരി വിശദീകരിച്ചു.
ഒരു കുഞ്ഞ് ഗർഭപാത്രത്തില് വളരുന്ന ഘട്ടത്തില് മുള്ളേരിയൻ ഡക്ടുകള് സാധാരണയായി പുരുഷ ഹോർമോണായ എ.എം.എച്ചിന്റെ (AMH) സ്വാധീനത്താല് ഇല്ലാതാകാറുണ്ട്. എന്നാല്, ഈ ഹോർമോണിന്റെ ഉത്പാദനം കുറയുകയോ ശരീരം ഇതിനോട് പ്രതികരിക്കാതിരിക്കുകയോ ചെയ്യുമ്പോള് ഈ അവയവങ്ങള് ഉള്ളില് അവശേഷിക്കുന്നു. പുറമെ സാധാരണ പുരുഷനായി കാണപ്പെടുമ്പോഴും ഉള്ളില് ഗർഭപാത്രം അവശേഷിക്കുന്നത് ഇതിനാലാണ്.
ആണ്കുട്ടികള് അമ്മയുടെ ഗർഭപാത്രത്തില് വളരുന്ന ഘട്ടത്തില് വൃഷണങ്ങള് അടിവയറ്റിലാണ് ഉണ്ടാകുന്നത്. പ്രസവത്തിന് തൊട്ടുമുൻപോ പ്രസവിച്ച ശേഷമോ ആണ് ഇവ താഴെയുള്ള സഞ്ചിയിലേക്ക് ഇറങ്ങിവരുന്നത്. വൃഷണങ്ങള് സാധാരണ സ്ഥാനത്തല്ലാതെ അടിവയറ്റിലോ മറ്റ് ഭാഗങ്ങളിലോ തങ്ങിനില്ക്കുന്നത് ബീജ ഉത്പാദനത്തെ ബാധിക്കും. ബീജങ്ങള് ആരോഗ്യത്തോടെ വളരാൻ ശരീരത്തിന്റെ സാധാരണ താപനിലയേക്കാള് കുറഞ്ഞ താപനില (ഏകദേശം 2 മുതല് 3 ഡിഗ്രി വരെ കുറവ്) ആവശ്യമാണ്. ഇതുകൊണ്ടാണ് വൃഷണങ്ങള് ശരീരത്തിന് പുറത്തുള്ള ഒരു സഞ്ചിയില് സ്ഥിതി ചെയ്യുന്നത്.
എന്നിരുന്നാലും, ഈ അവസ്ഥയുള്ള എല്ലാവർക്കും വന്ധ്യത ഉണ്ടാകണമെന്നില്ല. വൃഷണങ്ങളുടെ വലിപ്പവും പ്രവർത്തനവും സാധാരണ നിലയിലാണെങ്കില് ഇവർക്ക് സ്വാഭാവികമായി കുട്ടികളുണ്ടാകാൻ സാധ്യതയുണ്ടെന്നും ഡോക്ടർമാർ പറയുന്നു.
ചികിത്സാ സാധ്യതകള് ശുക്ലത്തില് ബീജമില്ലാത്ത അവസ്ഥയില്, വൃഷണങ്ങളില് നിന്ന് നേരിട്ട് ബീജം വേർതിരിച്ചെടുക്കാൻ സാധിക്കുമോ എന്ന് ഡോക്ടർമാർ പരിശോധിക്കും. ബീജങ്ങള് ലഭ്യമാണെങ്കില് ഐവിഎഫ് പോലുള്ള ആധുനിക വന്ധ്യതാ ചികിത്സാ മാർഗ്ഗങ്ങളിലൂടെ കുട്ടികളുണ്ടാകാൻ സാധിക്കും. വൃഷണങ്ങള് പൂർണ്ണമായും പ്രവർത്തനരഹിതമാണെങ്കില് ഡോണർ ബീജം സ്വീകരിക്കുന്നതും പരിഗണിക്കാറുണ്ട്.
ലോക മെഡിക്കല് ചരിത്രത്തില് തന്നെ വളരെ കുറച്ചു കേസുകള് മാത്രം രേഖപ്പെടുത്തിയിട്ടുള്ള അത്യപൂർവമായ അവസ്ഥയാണിത്. കൃത്യമായ ഹോർമോണ്, ജനിതക പരിശോധനകളിലൂടെ മാത്രമേ ഇത്തരം അവസ്ഥകള് കണ്ടെത്താനും അനുയോജ്യമായ ചികിത്സ നിശ്ചയിക്കാനും സാധിക്കൂ എന്ന് വിദഗ്ദ്ധർ ചൂണ്ടിക്കാണിക്കുന്നു.
