കുമ്പള: വായ്പ നല്കിയ തുക തിരികെ നല്കാമെന്ന് വിശ്വസിപ്പിച്ച് വ്യാപാരിയെ വീട്ടിലേക്ക് വിളിച്ചുവരുത്തി ഹണി ട്രാപ്പില് കുടുക്കിയതായി പരാതി.
സംഭവവുമായി ബന്ധപ്പെട്ട് മുട്ടം ബങ്കര സ്വദേശിയായ അറുപത്തിനാലുകാരന്റെ
പരാതിയില് ദമ്പതിമാര് ഉള്പ്പെടെ മൂന്നുപേര്ക്കെതിരെ കുമ്പള പോലീസ് കേസെടുത്തു. മംഗല്പ്പാടി കുബണൂരിലെ റിസ്വാന (28), ഭര്ത്താവ് ഹസന് ആസിഫ് (33), ബന്ധുവായ മൊഗ്രാല് മുഹമ്മദ് സിറാജ് (32) എന്നിവര്ക്കെതിരെയാണ് കേസ്. ഇതില് ഹസന് ആസിഫിനെയും പ്രതിയായ മുഹമ്മദ് സിറാജിനെയും പോലീസ് അറസ്റ്റ് ചെയ്തു.
മുന്പ് വൈദ്യുതിബില് അടയ്ക്കാനായി വ്യാപാരിയില്നിന്ന് റിസ്വാന 5000 രൂപ വായ്പ വാങ്ങിയിരുന്നു. ഈ തുക തിരികെ തരാമെന്ന് പറഞ്ഞ് ഓഗസ്റ്റ് 16-ന് രാത്രി ഏഴരയോടെ വ്യാപാരിയെ യുവതി സ്വന്തം വീട്ടിലേക്ക് വിളിച്ചുവരുത്തി. കാറിലെത്തിയ ഇയാളെ റിസ്വാനയുടെ ഭര്ത്താവും ബന്ധുവും ചേര്ന്ന് ബലമായി കിടപ്പുമുറിയിലേക്ക് പിടിച്ചുകൊണ്ടുപോകുകയായിരുന്നു. തുടര്ന്ന് വ്യാപാരിയെ നഗ്നനാക്കി യുവതിക്കൊപ്പം നിര്ത്തി ഫോട്ടോകളും വീഡിയോകളും പകര്ത്തി.
ഇതിനുശേഷം വ്യാപാരിയുടെ കൈവശമുണ്ടായിരുന്ന 1500 രൂപയും മൊബൈല്ഫോണും കാറിന്റെ താക്കോലും കവര്ന്നു. കൂടാതെ കാറിലുണ്ടായിരുന്ന 25,000 രൂപയും രണ്ട് എ.ടി.എം. കാര്ഡുകളും തട്ടിയെടുത്തു. ഭീഷണിപ്പെടുത്തി എ.ടി.എം. പിന്നമ്പര് മനസ്സിലാക്കി 7,200 രൂപ പിന്വലിക്കുകയും ചെയ്തു. സംഭവത്തിന്റെ അടുത്തദിവസം ഹസന് ആസിഫ് വ്യാപാരിയുടെ കടയിലെത്തി ഭീഷണിപ്പെടുത്തി 5000 രൂപ കൂടി പിടിച്ചുവാങ്ങി. രണ്ടുലക്ഷം രൂപകൂടി നല്കിയില്ലെങ്കില് ഭാര്യക്കൊപ്പമുള്ള നഗ്നദൃശ്യങ്ങള് സാമൂഹികമാധ്യമങ്ങളിലൂടെ പുറത്തുവിടുമെന്നും ഇയാള് ഭീഷണിപ്പെടുത്തി.
ശല്യം സഹിക്കവയ്യാതായതോടെയാണ് നാണക്കേട് ഭയന്ന് മടിച്ച വ്യാപാരി പോലീസില് പരാതി നല്കിയത്. കുമ്പള എസ്.ഐ. എസ്. അനൂപ്, എ.എസ്.ഐ.മാരായ അജയ്, അതുല്റാം, സിവില് പോലീസ് ഓഫീസര്മാരായ കൃഷോഭ്, സുധീഷ് എന്നിവരടങ്ങുന്ന സംഘമാണ് പ്രതികളെ വലയിലാക്കിയത്.
