ഡല്ഹി: നേപ്പാളിലെ വൻ ദുരന്തത്തിന് പിന്നാലെ 288 ഇന്ത്യക്കാരെക്കുറിച്ച് വിവരമില്ലെന്ന് വിദേശകാര്യ മന്ത്രാലയം.
വിദേശകാര്യ മന്ത്രാലയ വക്താവ് രണ്ധീർ ജയ്സ്വാള് നടത്തിയ വാർത്താസമ്മേളനത്തിലാണ് ഇക്കാര്യം വ്യക്തമാക്കിയത്. കാണാതായവരില് കേരളത്തില് നിന്നുള്ള 33 പേരും പശ്ചിമ ബംഗാളില് നിന്നുള്ള 32 പേരും തമിഴ്നാട്ടില് നിന്നുള്ള 85 പേരുമുണ്ടെന്നാണ് നിലവിലെ വിവരം.
നേപ്പാള്-ടിബറ്റ് അതിർത്തി മേഖലയില് ഉണ്ടായ പ്രകൃതിദുരന്തത്തെ തുടർന്ന് കോസി നദിയില് അപ്രതീക്ഷിതമായ വെള്ളപ്പൊക്കമുണ്ടാകുകയായിരുന്നു. നദീതീരത്തെ കെട്ടിടങ്ങളും പാലങ്ങളും വാഹനങ്ങളും അടക്കമുള്ളവ വെള്ളത്തിന്റെ കുത്തൊഴുക്കില് ഒഴുകിപ്പോയി. ദുരന്തത്തില് മരണസംഖ്യ 270 കടന്നതായാണ് പുറത്തുവരുന്ന റിപ്പോർട്ടുകള്. നിരവധി പേരെ കാണാതായിട്ടുണ്ട്. രക്ഷാപ്രവർത്തനവും തിരച്ചിലും തുടരുകയാണ്.
കാണാതായ ഇന്ത്യക്കാരില് ത്രിശൂലി വണ് ജലവൈദ്യുത പദ്ധതിയുമായി ബന്ധപ്പെട്ട് പ്രവർത്തിച്ചിരുന്നവരും ഉള്പ്പെടുന്നു. മന്ത്രാലയത്തിന്റെ കണക്കുപ്രകാരം 78 ഇന്ത്യക്കാർ പദ്ധതിയുടെ ഭാഗമായിരുന്നു. പദ്ധതിയുടെ തലവനുമായി ഇന്ത്യൻ എംബസി ബന്ധപ്പെട്ടിട്ടുണ്ടെന്നും ഇവരെക്കുറിച്ചുള്ള വിവരങ്ങള് ശേഖരിച്ചുവരികയാണെന്നും രണ്ധീർ ജയ്സ്വാള് അറിയിച്ചു.
നേപ്പാളിലെ ചൈനീസ് ഭാഗത്തും നിരവധി ഇന്ത്യക്കാർ കുടുങ്ങിക്കിടക്കുന്നുണ്ട്. ഏകദേശം 200 ഇന്ത്യക്കാർ ഇന്ത്യൻ എംബസിയെ ബന്ധപ്പെട്ടു. ഇവരുടെ വിശദാംശങ്ങളും ശേഖരിച്ചുവരികയാണ്. ഇഷ ഫൗണ്ടേഷനുമായി ബന്ധപ്പെട്ട സംഘത്തിലും ഇന്ത്യക്കാരുണ്ടെന്നാണ് വിവരം. എന്നാല് ഈ സംഘത്തില് കൂടുതല് വിദേശികളാണുള്ളതെന്നും വിദേശകാര്യ മന്ത്രാലയം വ്യക്തമാക്കി.
അതേസമയം, നേപ്പാളില് നിന്ന് 21 തമിഴ്നാട് സ്വദേശികളെ രക്ഷപ്പെടുത്തിയിട്ടുണ്ട്. ഇവരെ ആദ്യം കാഠ്മണ്ഡുവിലെത്തിച്ച ശേഷം ഇന്ത്യയിലേക്ക് കൊണ്ടുവരാനുള്ള നടപടികള് സ്വീകരിക്കും.
ദുരന്തബാധിത നേപ്പാളിന് സഹായവുമായി ഇന്ത്യ ഇതിനകം രണ്ട് വിമാനങ്ങള് അയച്ചിട്ടുണ്ട്. 47 ടണ് ദുരിതാശ്വാസ സാമഗ്രികള് നേപ്പാളിലെത്തിച്ചു. ആവശ്യാനുസരണം കൂടുതല് സഹായം നല്കാനും ഇന്ത്യ തയ്യാറാണ്. നേപ്പാളില് ബെയ്ലി പാലങ്ങള് നിർമിക്കുന്നതിനും ഇന്ത്യ സഹായം നല്കും.
വിദേശകാര്യ മന്ത്രാലയത്തിലും കണ്ട്രോള് റൂം തുറന്നിട്ടുണ്ട്. ഇന്ത്യക്കാരുടെ വിവരങ്ങള് ശേഖരിക്കുന്നതിനും സഹായം ഏകോപിപ്പിക്കുന്നതിനുമായി ഹെല്പ്ലൈൻ സംവിധാനവും ഏർപ്പെടുത്തിയിട്ടുണ്ട്. നേപ്പാളിലും ചൈനയിലുമുള്ള ഇന്ത്യൻ നയതന്ത്രകാര്യാലയങ്ങളും 24 മണിക്കൂറും പ്രവർത്തിക്കുന്ന ഹെല്പ്ലൈൻ നമ്പറുകള് തുറന്നിട്ടുണ്ട്.
ദുരന്തത്തില് ഇന്ത്യക്കാരുടെ മരണം സ്ഥിരീകരിച്ചിട്ടുണ്ടോ എന്ന ചോദ്യത്തിന് നിലവില് ഔദ്യോഗിക സ്ഥിരീകരണമൊന്നുമില്ലെന്ന് ജയ്സ്വാള് വ്യക്തമാക്കി. 'മാറിക്കൊണ്ടിരിക്കുന്ന സാഹചര്യമാണ്. നിലവില് വിവരമില്ല' എന്നായിരുന്നു അദ്ദേഹത്തിന്റെ പ്രതികരണം.
നേപ്പാളിന് ആവശ്യമായ എല്ലാ സഹായവും നല്കുമെന്ന് ഇന്ത്യ ആവർത്തിച്ചു. നേരിട്ടുള്ള രക്ഷാപ്രവർത്തനത്തിന് ഇന്ത്യ ഉടൻ രംഗത്തിറങ്ങുമോയെന്ന ചോദ്യത്തിന്, നിലവില് നേപ്പാളിന് ആവശ്യമായ സഹായങ്ങള് എത്തിക്കുന്നതിനാണ് ശ്രദ്ധ കേന്ദ്രീകരിക്കുന്നതെന്ന് വിദേശകാര്യ മന്ത്രാലയം വ്യക്തമാക്കി. സാമ്പത്തിക സഹായം സംബന്ധിച്ച ചോദ്യത്തിനും നേപ്പാളിന് തുടർന്നും ആവശ്യമായ സഹായങ്ങള് നല്കുമെന്നായിരുന്നു മറുപടി.
നേപ്പാളിന് ചൈന കൃത്യസമയത്ത് വിവരങ്ങള് കൈമാറിയോ എന്ന കാര്യത്തില് വ്യക്തമായ വിവരം ലഭിച്ചിട്ടില്ലെന്നും മന്ത്രാലയം അറിയിച്ചു. ആവശ്യമായി വന്നാല് നേപ്പാളിലുള്ള മറ്റ് വിദേശികളെയും സഹായിക്കാൻ ഇന്ത്യ തയ്യാറാണ്. നേപ്പാള് ആവശ്യപ്പെടുന്ന സഹായങ്ങളെല്ലാം നല്കുമെന്നും വിദേശകാര്യ മന്ത്രാലയം വ്യക്തമാക്കി.
ഇന്ത്യൻ ഉപഗ്രഹങ്ങളുടെ സഹായം രക്ഷാപ്രവർത്തനത്തിന് ഉപയോഗിക്കുമോയെന്ന ചോദ്യത്തിനും മന്ത്രാലയം പ്രതികരിച്ചു. നിലവിലെ സാഹചര്യത്തില് നേപ്പാളിനൊപ്പം തോളോട് തോള് ചേർന്ന് നില്ക്കുകയാണ് ഇന്ത്യയുടെ പ്രധാന ലക്ഷ്യമെന്നും ആവശ്യമായ എല്ലാ സഹായങ്ങളും തുടർന്നും നല്കുമെന്നും വിദേശകാര്യ മന്ത്രാലയം വ്യക്തമാക്കി.
