കൊച്ചി : കോണ്ഗ്രസ് രാഷ്ട്രീയത്തില് നിന്ന് അകന്നെങ്കിലും സോണിയ ഗാന്ധിയോടുള്ള വ്യക്തിപരമായ ആദരവിനും സൗഹൃദത്തിനും ഇന്നും യാതൊരു കുറവുമില്ലെന്ന് മുന് കേന്ദ്രമന്ത്രി കെ.വി.
തോമസ്. എങ്കിലും, സോണിയ ഗാന്ധി നാളെ നേരിട്ട് വിളിച്ചാല് പോലും കോണ്ഗ്രസിലേക്ക് ഇനിയൊരു തിരിച്ചുപോക്കില്ലെന്ന് അദ്ദേഹം തീര്ത്തുപറയുന്നു. സോണിയ ഗാന്ധിയുടെ ആത്മകഥ വായിച്ച അനുഭവം പങ്കുവെച്ചുകൊണ്ടുള്ള ഫേസ്ബുക്ക് കുറിപ്പിലാണ് കെ.വി. തോമസ് തന്റെ രാഷ്ട്രീയ നിലപാട് വീണ്ടും വ്യക്തമാക്കിയത്.
എല്ലാ കാര്യങ്ങള്ക്കും ഒരു പരിധിയുണ്ടെന്ന ഓര്മ്മപ്പെടുത്തലോടെയാണ് അദ്ദേഹം തിരിച്ചുവരവ് സാധ്യതകളെ പൂര്ണ്ണമായും തള്ളിക്കളയുന്നത്. സോണിയ ഗാന്ധി വിളിക്കുകയാണെങ്കില് തന്നോടുള്ള സ്നേഹത്തിന്റെ പേരില് സംസാരിക്കുമെന്നും, എന്നാല് അന്നത്തെ സംഭവവികാസങ്ങളെക്കുറിച്ച് അവരോട് തുറന്നുപറയുമെന്നും കെ.വി. തോമസ് വ്യക്തമാക്കി.
രാഹുല് ഗാന്ധിയുമായുള്ള അഭിപ്രായവ്യത്യാസങ്ങളാണ് തന്നെ കോണ്ഗ്രസില് നിന്ന് അകറ്റിയതെന്ന് അദ്ദേഹം തുറന്നടിച്ചു. ദീര്ഘകാലം പാര്ട്ടിയില് പ്രവര്ത്തിച്ച തന്നെ എന്ത് തെറ്റിന്റെ പേരിലാണ് പുറത്താക്കിയതെന്ന് ഇന്നും വ്യക്തമല്ലെന്നും അദ്ദേഹം കുറിപ്പില് ചോദിക്കുന്നു.
എഐസിസി അംഗമായിരുന്നിട്ടും തൃക്കാക്കര ഉപതിരഞ്ഞെടുപ്പ് വേളയില് നേരിട്ട അവഗണന വലിയ വേദനയുണ്ടാക്കിയെന്ന് കെ.വി. തോമസ് ഓര്ക്കുന്നു. അടുത്ത സുഹൃത്തായിരുന്ന പി.ടി. തോമസിന് വേണ്ടി പ്രചാരണത്തിനിറങ്ങാന് പോലും ഉത്തരവാദിത്തപ്പെട്ടവര് തന്നെ അനുവദിച്ചില്ല.
തൃക്കാക്കരയിലെ ആ അനുഭവത്തോടെയാണ് കോണ്ഗ്രസിനുള്ളില് തനിക്കുള്ള യഥാര്ത്ഥ സ്ഥാനം എന്താണെന്ന് ബോധ്യപ്പെട്ടതെന്ന് അദ്ദേഹം പറയുന്നു. നിവൃത്തിയില്ലാത്ത സാഹചര്യത്തിലാണ് പതിറ്റാണ്ടുകള് നീണ്ട കോണ്ഗ്രസ് ബന്ധം അവസാനിപ്പിക്കാന് തീരുമാനിച്ചത്.
തന്നെ പാര്ട്ടിയില് നിന്ന് മാറ്റേണ്ടതില്ലായിരുന്നുവെന്ന് പിന്നീട് പല മുതിര്ന്ന കോണ്ഗ്രസ് നേതാക്കളും സുഹൃത്തുക്കളും സ്വകാര്യമായി പറഞ്ഞിട്ടുണ്ടെന്നും കെ.വി. തോമസ് വെളിപ്പെടുത്തി. എന്നാല് അപ്പോഴേക്കും കാര്യങ്ങള് കൈവിട്ടുപോയിരുന്നു.
രാഷ്ട്രീയമായി ഒറ്റപ്പെട്ട ആ പ്രതിസന്ധി ഘട്ടത്തില് തനിക്ക് തണലായി നിന്നത് ഇടതുപക്ഷ പ്രസ്ഥാനവും സിപിഎമ്മും മുഖ്യമന്ത്രി പിണറായി വിജയനുമാണെന്ന് അദ്ദേഹം നന്ദിയോടെ സ്മരിക്കുന്നു. പുതിയ രാഷ്ട്രീയ സാഹചര്യത്തില് താന് സംതൃപ്തനാണെന്ന സൂചനയാണ് അദ്ദേഹം നല്കുന്നത്.
അതേസമയം, സോണിയ ഗാന്ധിയുടെ ആത്മകഥയിലൂടെയുള്ള വായന ഹൃദ്യമായ ഒരനുഭവമായിരുന്നുവെന്ന് കെ.വി. തോമസ് കുറിച്ചു. നെഹ്റു കുടുംബത്തിലെ ഊഷ്മളമായ ബന്ധങ്ങളുടെ നേര്ച്ചിത്രമാണ് പുസ്തകത്തിലുള്ളതെന്ന് അദ്ദേഹം വിലയിരുത്തുന്നു.





