തിരുവനന്തപുരം: യുഡിഎഫ് അധികാരത്തിലെത്തി കൃത്യം ആറുമാസം പിന്നിടുന്ന ഇന്നേ ദിവസം തന്നെ മന്ത്രിസഭാ യോഗത്തില് വലിയ പൊട്ടിത്തെറി.
മുഖ്യമന്ത്രി വിഡി സതീശനെതിരെ രൂക്ഷവിമർശനവുമായി മന്ത്രിമാർ രംഗത്തെത്തിയതായാണ് വിവരം. എ.പി. അനില്കുമാറാണ് എതിർപ്പിന് തുടക്കം കുറിച്ചത്. പുതിയ പി.എസ്.സി അംഗങ്ങളുടെ പട്ടിക മുഖ്യമന്ത്രി മുന്നോട്ടുവെച്ചതിന് പിന്നാലെയാണ് അനില്കുമാർ നിലപാട് വ്യക്തമാക്കി രംഗത്തെത്തിയത്. ചർച്ച നടത്താതെ മുഖ്യമന്ത്രി സ്വയം തീരുമാനങ്ങള് എടുത്തുവെന്നും, പട്ടിക തീരുമാനിച്ചുവെന്നും അദ്ദേഹം വിമർശിച്ചു. എന്നാല് ഉടൻ നിയമനം വേണ്ടതായതുകൊണ്ടാണ് തീരുമാനമെടുത്തതെനന്നായിരുന്നു മുഖ്യമന്ത്രിയുടെ മറുപടി. പി.എസ്.സിയില് മാത്രമല്ല, ഗുരുവായൂർ ദേവസ്വം നിയമനത്തിലും ചർച്ച നടന്നില്ലെന്ന് അനില്കുമാർ പറഞ്ഞു. ഇതിനിടെ ഇടപെട്ട കെ. മുരളീധരൻ, താനും മുഖ്യമന്ത്രിയുമായി ആലോചിച്ചാണ് പട്ടിക തയ്യാറാക്കിയതെന്ന് വിശദീകരിച്ചതോടെ എതിർപ്പുമായി വൈദ്യുതി മന്ത്രി സണ്ണി ജോസഫും രംഗത്തെത്തി.
കെപിസിസി അധ്യക്ഷനായ താൻ പല കാര്യങ്ങളും അറിയുന്നില്ലെന്ന് യോഗത്തില് മന്ത്രി സണ്ണി ജോസഫും വിമർശനമുയർത്തി. ചില കാര്യങ്ങളില് പെട്ടെന്ന് തീരുമാനമെടുക്കേണ്ടതുണ്ടെന്നായിരുന്നു ഇതിന് മുഖ്യമന്ത്രി നല്കിയ മറുപടി. ബോർഡ്-കോർപ്പറേഷൻ വിഭജനത്തില് ആർഎസ്പിക്ക് പരിഗണന നല്കുന്നില്ലെന്ന് ചൂണ്ടിക്കാട്ടി ഷിബു ബേബി ജോണും രംഗത്തെത്തി. കൂട്ടായ ചർച്ചയില്ലാത്ത മുഖ്യമന്ത്രിയുടെ ശൈലിക്കെതിരെ മന്ത്രിസഭാ യോഗത്തില് മന്ത്രിമാർ വിമർശനം ഉയർത്തി. സർക്കാർ അധികാരത്തില് വന്ന ആറാം മാസമാണ് മന്ത്രിസഭയില് ഇത്തരത്തില് അസാധാരണമായ വിമർശനമുണ്ടായത്. രണ്ടര മണിക്കൂറോളം നീണ്ട വിശാലമായ ചർച്ചയാണ് നടന്നത്.






