കോട്ടയം: കോട്ടയം വൈക്കത്തും പരിസരപ്രദേശങ്ങളിലും വ്യാപാരികളെ കബളിപ്പിച്ച്‌ 500 രൂപയുടെ കള്ളനോട്ടുകള്‍ നല്‍കി തട്ടിപ്പ് നടത്തിവന്ന പ്രതി വൈക്കം പൊലീസിന്റെ പിടിയിലായി.
കൊല്ലം പത്തനാപുരം സ്വദേശി അബ്ദുല്‍ റഷീദ് (65) ആണ് വെള്ളിയാഴ്ച രാവിലെ അറസ്റ്റിലായത്.
കുമരകത്തിന് സമീപം ഇല്ലിക്കലില്‍ ഇയാള്‍ വാടകയ്ക്ക് താമസിക്കുന്ന വീട്ടില്‍ പൊലീസ് നടത്തിയ മിന്നല്‍ പരിശോധനയില്‍ കള്ളനോട്ട് അച്ചടിക്കാന്‍ ഉപയോഗിച്ച പ്രിന്റര്‍, ലാപ്ടോപ്പ്, ലാമിനേറ്റര്‍, മഷി എന്നിവയ്ക്കൊപ്പം 500 രൂപയുടെ 37 കള്ളനോട്ടുകളും മറ്റ് ഉപകരണങ്ങളും പിടിച്ചെടുത്തു.
കള്ളനോട്ട് നിര്‍മ്മാണവും വിപണനവുമായി ബന്ധപ്പെട്ട് ഇയാള്‍ക്കെതിരെ സംസ്ഥാനത്തിന്റെ വിവിധ ഭാഗങ്ങളിലായി പത്തോളം കേസുകള്‍ നിലവിലുണ്ടെന്ന് പൊലീസ് വ്യക്തമാക്കി.
വൈക്കം, തലയാഴം, വെച്ചൂര്‍ മേഖലകളിലെ വിവിധ വ്യാപാര സ്ഥാപനങ്ങളില്‍ കാറിലെത്തിയായിരുന്നു ഇയാളുടെ തട്ടിപ്പ്. തിരക്കുള്ള കടകളില്‍ കയറി 100 രൂപയില്‍ താഴെ വിലയുള്ള ചെറിയ സാധനങ്ങള്‍ വാങ്ങിയ ശേഷം 500 രൂപയുടെ കള്ളനോട്ട് നല്‍കി ബാക്കി തുക ചില്ലറയായി വാങ്ങി മടങ്ങുന്നതായിരുന്നു ഇയാളുടെ രീതി.
നോട്ടില്‍ എന്തെങ്കിലും സംശയം വ്യാപാരികള്‍ പ്രകടിപ്പിച്ചാല്‍, വാങ്ങിയ സാധനത്തിന്റെ വില സ്വന്തം കൈയില്‍ നിന്ന് നല്‍കി തന്ത്രപരമായി അവിടെനിന്നും രക്ഷപ്പെടുകയും ചെയ്യും. കൂടാതെ, ആള്‍മാറാട്ടം നടത്തി ആളുകള്‍ തിരിച്ചറിയാതിരിക്കാന്‍ വിഗ് (Wig) ധരിച്ചാണ് ഇയാള്‍ പല കടകളിലും കള്ളനോട്ടുകള്‍ മാറ്റിയിരുന്നത്.
വിവിധ കടകളിലെ സിസിടിവി ദൃശ്യങ്ങള്‍ കേന്ദ്രീകരിച്ച്‌ വൈക്കം പൊലീസ് നടത്തിയ ശക്തമായ അന്വേഷണമാണ് പ്രതിയെ കുടുക്കിയത്. ദൃശ്യങ്ങള്‍ പരിശോധിച്ചുള്ള തുടരന്വേഷണത്തിലാണ് ഇല്ലിക്കലിലെ വാടകവീട്ടില്‍ വെച്ച്‌ പ്രതി പിടിയിലായത്.
ചോദ്യം ചെയ്യലിലൂടെ കൂടുതല്‍ വിവരങ്ങള്‍ ശേഖരിച്ചശേഷം കേസ് കൂടുതല്‍ അന്വേഷണത്തിനായി ക്രൈംബ്രാഞ്ചിന് കൈമാറാനാണ് പൊലീസിന്റെ നീക്കം.
