കോട്ടയം : അനധികൃത സ്വത്ത് സമ്പാദന കേസില് മുൻ ഡിജിപി ടോമിന് ജെ തച്ചങ്കരി കുറ്റക്കാരനാണെന്ന് കോടതി. കോട്ടയം വിജിലന്സ് കോടതിയാണ് ഇത് സംബന്ധിച്ച വിധി പറഞ്ഞത്. 2013ലാണ് കേസില് അന്വേഷണം പൂര്ത്തിയാക്കി കുറ്റപത്രം സമര്പ്പിച്ചത്. സമയബന്ധിതമായി വിചാരണ പൂര്ത്തിയാക്കണമെന്ന ഹൈക്കോടതി ഉത്തരവിന്റ പശ്ചാത്തലത്തിലാണ് വിജിലന്സ് കോടതി നടപടികള് പൂര്ത്തിയാക്കിയത്.
2003 മുതല് 2007 ജൂലൈ വരെയുള്ള ഔദ്യോഗിക കാലയളവില് 64 ലക്ഷം രൂപയുടെ അനധികൃത സ്വത്ത് സമ്പാദിച്ചു എന്നായിരുന്നു കേസ്. 13 വര്ഷങ്ങള്ക്ക് ശേഷമാണ് നിര്ണായക വിധി പുറത്തു വരുന്നത്. കേസില് വിധി ഉച്ചയ്ക്ക് ശേഷം 2.30ന് പറയും.
ശാരീരിക ബുദ്ധിമുട്ടുകള് ഉള്ള വ്യക്തിയാണെന്ന് തച്ചങ്കരി പറഞ്ഞു. ഓപ്പണ് ഹാര്ട്ട് സര്ജറി കഴിഞ്ഞതാണെന്നും അറിയിച്ചു. രണ്ടുദിവസം മുമ്പ് നെഞ്ചു വേദന ഉണ്ടായെന്നും ശിക്ഷയില് ഇളവ് നല്കണമെന്നും ആവശ്യപ്പെടുന്നു. പരമാവധി ശിക്ഷ നല്കണം എന്ന് പ്രോസിക്യൂഷന് ആവശ്യപ്പെട്ടു.
