ചെന്നൈ: ടിവികെ എംഎല്‍എ വനിത കളക്ടർക്ക് അശ്ലീല സന്ദേശം അയച്ചെന്ന വിവാദത്തില്‍ ആരോപണം തള്ളി തമിഴ്നാട് സർക്കാർ.
ഡിഎംകെ എംപി കെ കനിമൊഴിയുടേത് വ്യാജ ആരോപണമാണെന്ന് നിയമമന്ത്രി സി ടി ആർ നിർമല്‍ കുമാർ പ്രതികരിച്ചു. അഭ്യൂഹങ്ങളോടെല്ലാം പ്രതികരിക്കാനാകില്ലെന്നും മന്ത്രി പറഞ്ഞു.
കള്ളക്കുറിച്ചി എംഎല്‍എ അരുള്‍ വിഗ്നേഷിനെതിരെ ഉയർന്ന ആരോപണത്തിലാണ് മന്ത്രിയുടെ പ്രതികരണം.
സമൂഹമാധ്യമങ്ങളില്‍ കണ്ടത് ഏറ്റെടുത്ത് കനിമൊഴി പറയുന്നത്‌ ശരിയാണോ? കനിമൊഴി ആണ് ഇത് തുടങ്ങിയത്. നാളെ കനിമൊഴിക്കെതിരെ സോഷ്യല്‍ മീഡിയയില്‍ എന്തെങ്കിലും വന്നാല്‍ എന്തുണ്ടാകും?
ടിവികെ എംഎല്‍എമാരെ മൂന്ന് ദിവസം റിസോർട്ടില്‍ താമസിപ്പിക്കും എന്ന് ചില മാധ്യമങ്ങള്‍ പറഞ്ഞു. അത് പോലെ വ്യാജവാർത്ത ആണ് ഇതുമെന്നും മന്ത്രി പറഞ്ഞു.
കള്ളക്കുറിച്ചി എംഎല്‍എ അരുള്‍ വിഗ്നേഷിനെതിരെ സമൂഹമാധ്യമങ്ങളില്‍ ഉയർന്ന ആരോപണം ഏറ്റെടുത്താണ് കനിമൊഴിയും രംഗത്തെത്തിയത്. ടിവികെ എംഎല്‍എമാരില്‍ നിന്ന് ജില്ലാ കളക്ടർമാക്ക് പോലും സുരക്ഷയില്ലെന്നായിരുന്നു കനിമൊഴിയുടെ പ്രതികരണം.
കള്ളക്കുറിച്ചി ജില്ലാ കളക്ടർക്ക് എംഎല്‍എയില്‍ നിന്ന് അശ്ലീല സന്ദേശം ലഭിച്ചുവെന്നും എംഎല്‍എ മദ്യലഹരിയില്‍ കളക്ടറുടെ വസതിയില്‍ എത്തിയെന്നും കനിമൊഴി ആരോപിച്ചിരുന്നു.
