കൊല്ലം: കള്ളനോട്ട് കേസിലെ പ്രതിയുടെ ഉടമസ്ഥതയിലുള്ള മത്സ്യബന്ധനസാമഗ്രികള്‍ സൂക്ഷിക്കുന്ന ലോക്കറില്‍ നിന്ന് വന്‍തോതില്‍ തിമിംഗിലഛര്‍ദ്ദി പിടികൂടി.
കൊല്ലം വെസ്റ്റ് കൈക്കുളങ്ങര കല്ലേലിവയല്‍ പുരയിടത്തില്‍ സിബിയോണിന്റെ (37) ഉടമസ്ഥതയിലുള്ള വാടി ഹാര്‍ബറിലെ ലോക്കറില്‍ നിന്നാണ് 22.460 കിലോഗ്രാം തിമിംഗിലച്ചര്‍ദ്ദി പള്ളിത്തോട്ടം പോലീസ് കണ്ടെടുത്തത്. അന്താരാഷ്ട്ര വിപണിയില്‍ ഇതിന് 25 കോടിയോളം രൂപ വിലവരുമെന്നാണ് കണക്കാക്കുന്നത്.
ഞായറാഴ്ച രാത്രി ഒന്‍പതരയോടെ പള്ളിത്തോട്ടം എസ്.എച്ച്‌.ഒ. പ്രതിഭ.ജി. നായരുടെ നേതൃത്വത്തിലുള്ള പോലീസ് സംഘമാണ് വാടിയിലെത്തി പരിശോധന നടത്തിയത്. സിബിയോണിന്റെ ഉടമസ്ഥതയിലുള്ള പത്താം നമ്പര്‍ ലോക്കറിന്റെ പൂട്ട് പൊളിച്ച്‌ നടത്തിയ പരിശോധനയില്‍ ചാക്കുകെട്ടില്‍ നാല് കവറുകളിലാക്കിയ നിലയിലാണ് ഇവ കണ്ടെത്തിയത്. തുടര്‍ന്ന് ഇവ സ്റ്റേഷനിലേക്ക് എത്തിച്ച ശേഷം അഞ്ചലില്‍ നിന്നുള്ള ഫോറസ്റ്റ് ഉദ്യോഗസ്ഥര്‍ക്ക് കൈമാറി. വിദഗ്ധ പരിശോധനയ്ക്ക് ശേഷമേ ഇത് തിമിംഗിലച്ചര്‍ദ്ദി തന്നെയാണോ എന്ന് ഔദ്യോഗികമായി സ്ഥിരീകരിക്കുകയുള്ളൂ
വെള്ളിയാഴ്ച രാത്രിയാണ് സിബിയോണിന്റെ വീട്ടില്‍ നിന്ന് കള്ളനോട്ട് അച്ചടിക്കുന്ന പ്രിന്ററുകളും 500 രൂപയുടെ നോട്ടുകള്‍ അച്ചടിക്കാനായി മുറിച്ചുവെച്ച 892 പേപ്പര്‍ കെട്ടുകളും നോട്ട് എണ്ണുന്ന മെഷീനുകളും പോലീസ് പിടികൂടിയത്. സംഭവത്തില്‍ അറസ്റ്റിലായ ഇയാള്‍ നിലവില്‍ റിമാന്‍ഡിലാണ്. കേസിന്റെ ഗൗരവം കണക്കിലെടുത്ത് കള്ളനോട്ട് കേസിന്റെ അന്വേഷണം പിന്നീട് ജില്ലാ ക്രൈംബ്രാഞ്ചിന് കൈമാറുകയായിരുന്നു.
