തേനി: തമിഴ്നാട്ടിലെ തേനി തേക്കാംപെട്ടി സബ് ജയിലില്‍ നിന്ന് രക്ഷപ്പെട്ട 17 തടവുകാരില്‍ 13 പേരും പിടിയിലായി.
ബാക്കിയുള്ള നാല് തടവുകാരെ കണ്ടെത്താനായി തെരച്ചില്‍ തുടരുകയാണ്. ഇവർ കേരളത്തിലേക്ക് കടക്കാൻ സാധ്യതയുള്ളതിനാല്‍ തമിഴ്നാട്-കേരള അതിർത്തിയില്‍ നിരീക്ഷണം ശക്തമാക്കി. കേരള പൊലീസിന്റെ സഹായവും തേടിയിട്ടുണ്ട്.
തിങ്കളാഴ്ച രാത്രിയാണ് സബ് ജയിലിലെ 17 തടവുകാർ കൂട്ടത്തോടെ ജയില്‍ ചാടിയത്. മൂന്നുപതിറ്റാണ്ടിനിടെ തമിഴ്നാട്ടിലെ ഏറ്റവും വലിയ ജയില്‍ച്ചാട്ടമാണിത്.
രക്ഷപ്പെട്ടവരില്‍ അഞ്ചുപേർ കൊലക്കേസ് പ്രതികളാണ്. വൻ ആസൂത്രണത്തോടെയാണ് തടവുകാർ ജയില്‍ചാടിയതെന്നാണ് റിപ്പോർട്ടുകളില്‍ പറയുന്നത്.
സിനിമയെ വെല്ലുന്ന രംഗങ്ങളാണ് ജയിലില്‍ അരങ്ങേറിയത്. തിങ്കളാഴ്ച രാത്രി പത്തരയോടെ തടവുകാരില്‍ ഒരാള്‍ അപസ്മാരം അഭിനയിച്ചു. ഈ വിവരമറിഞ്ഞ് ജയില്‍ ഉദ്യോഗസ്ഥൻ സെല്ലിലെത്തി.
ഈ സമയം മറ്റുതടവുകാർ ഉദ്യോഗസ്ഥനെ പുതപ്പ് കൊണ്ട് മൂടുകയും മർദിച്ച്‌ താക്കോല്‍ കൈക്കലാക്കി കടന്നുകളയുകയുമായിരുന്നു.
സെല്ലിന് പുറത്തെത്തിയ തടവുകാർ മറ്റു ജീവനക്കാരെയും ആക്രമിച്ചു. തുടർന്ന് പ്രധാന ഗേറ്റിലൂടെയാണ് 17 തടവുകാരും രക്ഷപ്പെട്ടത്. തടവുകാരുടെ ആക്രമണത്തില്‍ ഒരു ജീവനക്കാരന് ഗുരുതരമായി പരിക്കേറ്റിട്ടുണ്ട്.
