വൈക്കം:നാട്ടിൻപുറത്ത് അന്യമായി കൊണ്ടിരിക്കുന്ന തഴപ്പാനെയ്ത്തിന് പുതുജീവൻ നൽകുന്നതിനായി തഴപ്പായ കൊണ്ട് വിവിധ കരകൗശല ഉൽപന്നങ്ങൾ നിർമ്മിക്കാൻ വീട്ടമ്മമാർക്കും യുവതികൾക്കും പരിശീലനം നൽകുന്നു.
കേന്ദ്ര വസ്ത്ര മന്ത്രാലയത്തിന് കീഴിലുള്ള ഹാൻ്റി ക്രാഫ്റ്റ് കമ്മീഷണറേറ്റ് കാര്യാലയം ജവഹർ സോഷ്യൽ വെൽഫയർ സെൻ്റർ മുഖേന നടത്തുന്ന രണ്ട് മാസത്തെ പരിശീലന പരിപാടിക്ക് തലയോലപറമ്പ് കോരിക്കലിൽ തുടക്കമായി.തഴ ഉപയോഗിച്ച് ബിഗ് ഷോപ്പർ, പെൻ സ്റ്റാൻഡ്,പഴ്സ്,ഫയൽ, ലേ ഡീസ് ബാഗ് തുടങ്ങി നിരവധി കര കൗശല വസ്തുക്കൾ നിർമിക്കുന്നതിനാണ് പരിശീലനം നൽകുന്നത്.തഴയിൽ കൂടുതൽ മിഴിവും മനോഹാരിതയുമുള്ള കരകൗശല ഉൽപന്നങ്ങൾ നെയ്തെടുക്കുന്നതിന് സ്വന്തം നിലയ്ക്കും യുവതികൾക്ക് ഡിസൈനുകൾ ഒരുക്കാം. ഗ്രാമപ്രദേശങ്ങളിൽ നിർധന കുടുംബങ്ങളിലെ വനിതകൾ പായനെയ്താണ് ഉപജീവനം നടത്തിയിരുന്നത്. കൈതകൾ കൊണ്ടാണ് വീടിനുവേലി തീർത്തിരുന്നത്. വാതമടക്കമുള്ള രോഗങ്ങളെ ശമിപ്പിച്ചിരുന്ന തഴപ്പായ വീടുകളിൽ നിന്ന് മാറ്റപ്പെട്ടതോടെ നാട്ടിൻപുറത്ത് തഴയും കൈതയും പായ് നെയ്ത്തും നാമമാത്രമായി. മൂല്യ വർധിത ഉൽപന്നങ്ങൾ തീർത്ത് തഴപ്പായ വ്യവസായത്തെ തിരിച്ചുപിടിക്കാനുള്ള ശ്രമത്തിൽ തലയോലപറമ്പിൽ 30പേരാണ് പരിശീലനം നേടുന്നത്. തലയോലപറമ്പ് കോരിക്കലിൽ നടന്ന പരിശീലന പരിപാടിയുടെ ഉദ്ഘാടനം തലയോലപറമ്പ് പഞ്ചായത്ത് പ്രസിഡൻ്റ് ജോസ് വേലിക്കകം നിർവ്വഹിച്ചു.കടുത്തുരുത്തി ബ്ലോക്ക് പഞ്ചായത്ത് അംഗം സീതുശശിധരൻ അധ്യക്ഷത വഹിച്ചു.
ഹാൻ്റി ക്രാഫ്റ്റ് പ്രമോഷൻ ഓഫീസർ മനീഷ്പൻവാർ പദ്ധതി വിശദീകരിച്ചു.
തലയോലപറമ്പ് പഞ്ചായത്ത് വൈസ് പ്രസിഡൻ്റ് അനിതസുഭാഷ്, മുൻ പഞ്ചായത്ത് വൈസ് പ്രസിഡൻ്റ് അനി ചെള്ളാങ്കൽ, ജവഹർ സോഷ്യൽ വെൽഫയർ സെൻ്റർ ജനറൽ സെക്രട്ടറി പി.ജി.തങ്കമ്മ,
പി.കെ.കുമാരൻ, പി.ജി. ഷാജിമോൻ , ഇ.എസ്. സാബു, കെ.ആർ.രേഖ, അനിതരാഘവൻ,
, ക്ലസ്റ്റർ മാനേജർ പി.കെ.ഷിജിമോൾ തുടങ്ങിയവർ പ്രസംഗിച്ചു.
ഡിപ്പാർട്ട്മെൻ്റിലെ പ്രഗൽഭരായ പരിശീലകരുടെ മേൽനോട്ടത്തിലാണ് വനിതകൾക്ക് പരിശീലനം നൽകുന്നത്. രണ്ട് മാസം നീളുന്ന പരിശീലന കാലയളവിൽ 50 ദിവസമാണ് പരിശീലന ക്ലാസ് നടക്കുന്നത്. പരീലനക്ലാസിൽ പങ്കെടുക്കുന്ന വനിതയ്ക്ക് പ്രതിദിനം 300രൂപ സഹായധനം ലഭിക്കും.
