ചെന്നൈ: തമിഴ്‌നാട്ടിലെ മധുരയിലുള്ള പാലങ്കാനത്തം ബൈപ്പാസ് റോഡിലെ തനിഷ്ക് ജ്വല്ലറി ഷോറൂമില്‍ നടന്ന വൻ സ്വർണ്ണ മോഷണത്തില്‍ ഒരു യുവതിയടക്കം രണ്ട് പേർ അറസ്റ്റില്‍.
മുഖ്യപ്രതി നിശാന്തിന്റെ അച്ഛൻ സുരേഷ്, ഇൻസ്റ്റാ ഇൻഫ്ലുവൻസർ മീനാക്ഷി എന്നിവരാണ് അറസ്റ്റിലായത്. മുഖ്യപ്രതി നിശാന്തിനായി തെരച്ചില്‍ ഊർജിതമായി തുടരുകയാണെന്ന് പൊലീസ് അറിയിച്ചു.
ബൈക്ക്-ടാക്സി ഡ്രൈവറും യൂട്യൂബറുമാണ് നിശാന്ത്. മോഷണത്തിന് മുൻപ് നിശാന്ത് ഒരു ഉപഭോക്താവെന്ന വ്യാജേന മൂന്ന് തവണ ജ്വല്ലറി സന്ദർശിച്ചതായി സിസിടിവി ദൃശ്യങ്ങളില്‍ നിന്ന് പൊലീസ് കണ്ടെത്തുകയും, വീടടക്കം പരിശോധിക്കുകയും ചെയ്തിട്ടുണ്ട്.
എന്നാല്‍ സ്വർണം കണ്ടെത്താനായിട്ടില്ല. മൂന്ന് തവണ എത്തിയത് വ്യത്യസ്ത ഷർട്ടുകള്‍ ധരിച്ചാണെങ്കിലും ഒരേ തൊപ്പി ആണ് മൂന്ന് തവണയും ധരിച്ചതെന്ന് പൊലീസ് കണ്ടെത്തി.
നവംബർ 5ന് പുലർച്ചെ ഇയാള്‍ ജ്വല്ലറിയില്‍ എത്തിയത് ട്രയല്‍ റണ്ണിനാണോ എന്നും പൊലീസ് സംശയിക്കുന്നു.
മധുരയില്‍ പുതുതായി പ്രവർത്തനം ആരംഭിച്ച തനിഷ്ക് ഷോറൂമില്‍ നിന്ന് 20 കിലോഗ്രാം സ്വർണ്ണാഭരണങ്ങള്‍ ആണ് മോഷണം പോയത്. വയറിംഗ് ഉള്‍പ്പെടെയുള്ള ചില നിർമ്മാണ പ്രവൃത്തികള്‍ നടക്കുന്ന കടയില്‍ മുഖംമൂടി ധരിച്ച മോഷ്ടാവ് ലിഫ്റ്റിന്റെ ഭാഗത്തുകൂടി ഷോറൂമിനുള്ളില്‍ കടന്നതാകാമെന്നാണ് പൊലീസ് സംശയിക്കുന്നത്.
മോഷണം പോയ ആഭരണങ്ങളെല്ലാം ഡിസ്‌പ്ലേ വിഭാഗത്തില്‍ നിന്നുള്ളതാണെന്നും ലോക്കറുകള്‍ക്കുള്ളിലെ ആഭരണങ്ങള്‍ സുരക്ഷിതമാണെന്നും പൊലീസ് അറിയിച്ചു. വ്യാഴാഴ്ച രാവിലെ ബൈപാസ് റോഡിലുള്ള ഔട്ട്‌ലെറ്റില്‍ ജോലിക്കെത്തിയ ജീവനക്കാരാണ് മോഷണ വിവരം അറിഞ്ഞത്.
ഏതാനും ആഴ്ചകള്‍ക്ക് മുമ്പ് മാത്രമാണ് ഈ ഷോറൂം തുറന്നത്. കെട്ടിടത്തിന്റെ ചില ഭാഗങ്ങളില്‍ ഇപ്പോഴും നിർമ്മാണ പ്രവർത്തനങ്ങള്‍ നടന്നുവരികയാണ്.
പുറത്ത് സുരക്ഷാ ജീവനക്കാർ ഉണ്ടായിരുന്നിട്ടും മോഷ്ടാവ് എങ്ങനെ അകത്തുകടന്നു എന്നതിനെക്കുറിച്ച്‌ പൊലീസ് അന്വേഷിക്കുന്നുണ്ട്.
