തിരുവനന്തപുരം: സൂപ്പർ ലീഗ് കേരളയില്‍ തൃശൂർ മാജിക് എഫ്സിക്ക് ആദ്യ ജയം. ആവേശകരമായ മത്സരത്തില്‍ തിരുവനന്തപുരം കൊമ്പൻസ് എഫ്സിയെ ഷൂട്ടൗട്ടില്‍ 4-3 ന് തോല്‍പ്പിച്ചു.
നിശ്ചിതസമയത്ത് മത്സരം ഗോള്‍രഹിത സമനില ആയിരുന്നു. ഷൂട്ടൗട്ടിനായി പകരക്കാരനായി എത്തിയ പാർഥിവ് നടത്തിയ രണ്ട് സേവുകള്‍ ആണ് തൃശൂരിന് ആദ്യ ജയം നല്‍കിയത്. മുഹമ്മദ്‌ നിഷാം, ജംഷിദ് അലി എന്നിവരുടെ കിക്കുകള്‍ ആണ് പാർഥിവ് തടുത്തിട്ടത്. അഞ്ച് കളികളില്‍ മൂന്നു പോയന്റുമായി തൃശൂർ ആറാമതാണ്. അഞ്ചു പോയന്റുള്ള കൊമ്പൻസ് അഞ്ചാമത്.
മത്സരത്തിലെ ആദ്യ അവസരം പത്താം മിനിറ്റില്‍ കോർണർ കിക്കിലൂടെ കൊമ്പൻസിന്. തൃശൂരിന്റെ പ്രതിരോധം മറികടന്ന ഷിനുവിന് മുന്നില്‍ തുറന്ന പോസ്റ്റുണ്ടായിരുന്നു. പക്ഷെ, ഹെഡ്ഡർ ലക്ഷ്യം കണ്ടില്ല.കളി അരമണിക്കൂർ തികയും മുൻപ് തൃശൂർ ഏറെ പ്രതീക്ഷയോടെ ടീമിലെത്തിച്ച പരിചയസമ്പന്നനായ ബ്രസീലിയൻ താരം മെയില്‍സണ്‍ ആല്‍വസ് പരിക്കേറ്റ് മടങ്ങി. പകരക്കാരനായി പമ്പിത്ര മണ്ഡി കളത്തിലിറങ്ങി.
വേഗക്കാരൻ പൗളോ സാന്റോസിനെ തുടർച്ചയായി ഓഫ്‌സൈഡ് കെണിയില്‍ വീഴ്ത്താൻ തൃശൂർ പ്രതിരോധത്തിനായി. കൊമ്പൻസിനായി 25-ാം മത്സരം കളിക്കുന്ന പാട്രിക് മോട്ടയുടെ 40-ാം മിനിറ്റിലെ ഫ്രീകിക്ക് ക്രോസ്‌ ബാറിലിടിച്ച്‌ മടങ്ങി. ഗോള്‍ കണ്ടെത്താനാകാതെ ഇരുടീമുകളും ആദ്യ പകുതി അവസാനിപ്പിച്ചു.53-ാം മിനിറ്റില്‍ ആദിലിനും പിന്നാലെ പൗളോ സാന്റോസിനും ലഭിച്ച അവസരങ്ങള്‍ തൃശൂർ പോസ്റ്റില്‍ കയറിയില്ല. 59-ാം മിനിറ്റില്‍ ഷാനുവിനെയും ഹൃതിക്കിനെയും പകരക്കാരായി ഇറക്കി കൊമ്പൻസ് ആക്രമണത്തിന് മൂർച്ച കൂട്ടി. കളി അവസാനിക്കാനിരിക്കെ ഷിഹാസിന്റെ ലോങ് റേഞ്ചർ കൊമ്പൻസ് പോസ്റ്റിനെ തൊട്ടുരുമ്മി പുറത്തേക്ക് പോയതോടെ നിശ്ചിതസമയം ഗോള്‍രഹിതമായി അവസാനിച്ചു. പിന്നാലെ വിധി നിർണയിക്കാൻ ഷൂട്ടൗട്ട്.
അഞ്ചാം റൗണ്ടിലെ രണ്ടാം മത്സരത്തില്‍ ശനിയാഴ്ച (ഒക്ടോബർ 24) കാലിക്കറ്റ്‌ എഫ്സി, ഫോഴ്‌സ കൊച്ചി എഫ്സിയുമായി മത്സരിക്കും. കോഴിക്കോട് ഇ എം എസ് കോർപറേഷൻ സ്റ്റേഡിയമാണ് വേദി. കിക്കോഫ് വൈകുന്നേരം 6.30ന്.
മത്സരം തത്സമയം കാണാൻ: സീ5 (ഇന്ത്യ), ഇത്തിസാലാത്ത് ടിവി (യുഎഇ), സ്റ്റാർസ്പ്ലേ (മിഡില്‍ ഈസ്റ്റ് & വടക്കേ ആഫ്രിക്ക മേഖല)
ടിക്കറ്റുകള്‍ക്ക് https://www.superleaguekerala.com/tickets സന്ദർശിക്കുക. സ്റ്റേഡിയത്തിലെ ബോക്സ് ഓഫീസുകളിലും ടിക്കറ്റ് ലഭിക്കും.
