തിരുവനന്തപുരം: ശ്രീകാര്യത്ത് 17 വയസുകാരനായ അഭിരാമിനെ കൊലപ്പെടുത്തിയ കേസില്‍ ചോദ്യം ചെയ്യലിനോട് സഹകരിക്കാതെ പ്രതികള്‍.
ഉമര്‍, ആനന്ദ എന്നിവരില്‍ നിന്ന് കൂടുതല്‍ വിവരങ്ങള്‍ കണ്ടെത്താനുള്ള ശ്രമത്തിലാണ് അന്വേഷണസംഘം. ഇവരുടെ ചോദ്യം ചെയ്യല്‍ ഇന്നും തുടരും.
കൊലപാതകത്തിന് ഉപയോഗിച്ച ബെല്‍റ്റും അഭിരാമിന്റെ ഫോണും പ്രതികള്‍ ഒളിപ്പിച്ചെന്നാണ് വിവരം.
ഇത് കണ്ടെത്താനുള്ള ശ്രമം പൊലീസ് തുടരുകയാണ്. കേസിലെ പ്രതികളായ 17 വയസുകാരനെയും ഉമറിന്റെ സുഹൃത്ത് ഐശ്വര്യയെയും വൈകാതെ കസ്റ്റഡിയില്‍ വാങ്ങി ചോദ്യം ചെയ്യും.
നാലുപേരും ചേര്‍ന്നാണ് ആക്രമണത്തിന്റെ ഗൂഢാലോചന നടത്തിയത് എന്നാണ് കസ്റ്റഡിയിലുള്ള പ്രതികള്‍ നല്‍കിയിരിക്കുന്ന മൊഴി.
പ്രണയപ്പകയെത്തുടർന്ന് ആസൂത്രണം ചെയ്ത കൊലപാതകത്തിൽ, യഥാർത്ഥത്തിൽ പ്രതികൾ ലക്ഷ്യമിട്ടിരുന്നത് അഭിരാമിനെയല്ല, മറിച്ച് അവന്റെ ഉറ്റസുഹൃത്തിനെയായിരുന്നു എന്ന് പോലീസ് അന്വേഷണത്തിൽ കണ്ടെത്തിയിട്ടുണ്ട്.
ഒന്നാം പ്രതിയായ പതിനേഴുകാരന്റെ മുൻകാമുകി അഭിരാമിന്റെ ഈ സുഹൃത്തുമായി പ്രണയത്തിലായതിലുള്ള വ്യക്തിവൈരാഗ്യമാണ് ആക്രമണത്തിന് കാരണമായത്.
നേരിട്ട് വിളിച്ചാൽ സുഹൃത്ത് വരില്ലെന്ന് ഉറപ്പുള്ളതിനാൽ, പ്രതികൾ തങ്ങളുടെ സുഹൃത്തായ ആനന്ദ (18) എന്ന പെൺകുട്ടിയുടെ ഇൻസ്റ്റാഗ്രാം അക്കൗണ്ട് ഉപയോഗിച്ച് പെൺകുട്ടിയെന്ന വ്യാജേന സന്ദേശങ്ങൾ അയച്ച് അഭിരാമിനെ പാങ്ങപ്പാറയിലെ വിജനമായ സ്ഥലത്തേക്ക് വിളിച്ചുവരുത്തുകയായിരുന്നു.
അവിടെയെത്തിയ അഭിരാമിനോട് സുഹൃത്തിനെ അങ്ങോട്ട് വിളിച്ചുവരുത്താൻ പ്രതികൾ ആവശ്യപ്പെട്ടു. എന്നാൽ അപകടം മണത്ത സുഹൃത്ത് അങ്ങോട്ട് വരാൻ കൂട്ടാക്കിയില്ല.
സുഹൃത്ത് വരാത്തതിനെത്തുടർന്ന് അവിടെവെച്ച് തർക്കമുണ്ടാകുകയും, രക്ഷപ്പെടാൻ ശ്രമിച്ച അഭിരാമിനെ പ്രതികൾ ക്രൂരമായി മർദ്ദിക്കുകയും ബെൽറ്റ് ഉപയോഗിച്ച് കഴുത്തുഞെരിച്ച് കൊലപ്പെടുത്തുകയുമായിരുന്നു.
