തിരുവനന്തപുരം: തിരുവനന്തപുരം ശ്രീകാര്യത്ത് പതിനേഴ് വയസുള്ള അഭിറാമിനെ കൊലപ്പെടുത്തിയതില്‍ രണ്ട് പ്രതികളുടെ അറസ്റ്റ് രേഖപ്പെടുത്തി.
പ്രായപൂർത്തിയാകാത്ത 17കാരന്റെയും ഇയാളുടെ സുഹൃത്ത് ഉമറിന്റെയും അറസ്റ്റാണ് രേഖപ്പെടുത്തിയത്. അഭിറാമിനെ കൊന്നത് താൻ ഒറ്റയ്ക്കാണെന്നാണ് 17കാരൻ പൊലീസിന് നല്‍കിയ മൊഴി.
എന്നാല്‍ ഇത് പൊലീസ് വിശ്വാസത്തിലെടുത്തിട്ടില്ല. ഇരുവരെയും ഇന്ന് കോടതിയില്‍ ഹാജരാക്കും.
അതിനിടെ കസ്റ്റഡിയിലുള്ള മണക്കാട് സ്വദേശിയായ പെണ്‍കുട്ടിക്ക് 18 വയസ്സ് പൂർത്തിയായിട്ടുണ്ടെന്നാണ് പൊലീസിന്റെ കണ്ടത്തല്‍. അഭിറാമിനെ ഈ പെണ്‍കുട്ടിയാണ് ആളൊഴിഞ്ഞ സ്ഥലത്തേക്ക് വിളിച്ചുവരുത്തിയത്.
വിശദമായി ചോദ്യം ചെയ്ത ശേഷം പെണ്‍കുട്ടിയെയും കേസില്‍ പ്രതിചേർക്കാനാണ് പൊലീസിന്റെ തീരുമാനം. കൂടുതല്‍ പേർക്ക് കൊലപാതകത്തിലും ഗൂഢാലോചനയിലും പങ്കുണ്ടോ എന്നും പൊലീസ് പരിശോധിക്കുന്നുണ്ട്.
അഭിരാമിന്റെ മൃതദേഹം ഇന്ന് പോസ്റ്റുമോർട്ടത്തിന് ശേഷം ബന്ധുക്കള്‍ക്ക് കൈമാറും.
കൊലപാതകത്തിന് പിന്നില്‍ പ്രണയത്തെ ചൊല്ലിയുള്ള തർക്കമെന്നാണ് പൊലീസ് പറയുന്നത്. പെണ്‍കുട്ടിയും കൊലപാതകം നടത്തിയ 17കാരനും പ്രണയത്തിലായിരുന്നുവെന്നും കൊല്ലപ്പെട്ട അഭിറാം പെണ്‍കുട്ടിക്ക് മെസ്സേജ് അയച്ചതാണ് കൊലപാതത്തിന് കാരണമെന്നും പൊലീസ് പറയുന്നു.
അതിനിടെ പൊലീസിനെതിരെ ബന്ധുക്കള്‍ രംഗത്തെത്തി. പരാതി നല്‍കിയിട്ടും കാര്യക്ഷമമായി അന്വേഷിച്ചില്ലെന്നാണ് ഇവരുടെ ആരോപണം.
