തിരുവനന്തപുരം: പോലീസ് പൊളിച്ചുനീക്കിയ എല്‍പിഎസ്ടി ഉദ്യോഗാര്‍ത്ഥികളുടെ സമരപ്പന്തല്‍ പുനഃസ്ഥാപിച്ച്‌ ഡിവൈഎഫ്‌ഐ.
നേരത്തേ സമരപ്പന്തല്‍ ഉണ്ടായിരുന്ന സ്ഥലത്ത് രണ്ട് കമ്പുകള്‍ നാട്ടി ടാര്‍പോളിന്‍ വലിച്ചുകെട്ടിയാണ് താല്‍ക്കാലിക പന്തല്‍ വീണ്ടും നിര്‍മിച്ചത്. ഇതിനു പിന്നാലെ റാങ്ക് ഹോള്‍ഡര്‍മാര്‍ നിരാഹാരസമരവും പുനരാരംഭിച്ചു.
പന്തല്‍ പുനഃസ്ഥാപിക്കുന്നത് പോലീസ് തടയാന്‍ ശ്രമിച്ചതോടെ സ്ഥലത്ത് സംഘര്‍ഷാവസ്ഥയുണ്ടായി. സമരപ്പന്തലിന് സമീപമെത്തിയ പോലീസിനെ മുതിര്‍ന്ന ഉദ്യോഗസ്ഥര്‍ ഇടപെട്ട് പിന്‍വലിച്ചു.
നിലവില്‍ സെക്രട്ടേറിയറ്റിലെ സമരഗേറ്റിന് സമീപം പോലീസ് നിലയുറപ്പിച്ചിട്ടുണ്ട്.
സമരത്തിന് നേതൃത്വം നല്‍കിയ വളര്‍മതിയെ പോലീസ് അറസ്റ്റ് ചെയ്തതിനു പിന്നാലെയാണ് ഉദ്യോഗാര്‍ത്ഥികള്‍ ജയകൃഷ്ണന്റെ നേതൃത്വത്തില്‍ സമരം തുടരുന്നത്.
റാങ്ക് പട്ടികയില്‍ 10 മുതല്‍ 15 വരെ സ്ഥാനങ്ങളിലുള്ള ഉദ്യോഗാര്‍ത്ഥികളാണ് പന്തലില്‍ നിരാഹാരം ആരംഭിച്ചത്. സമരത്തിന് പൂര്‍ണ പിന്തുണ പ്രഖ്യാപിച്ച്‌ ഡിവൈഎഫ്‌ഐ പ്രവര്‍ത്തകരും വലിയതോതില്‍ സ്ഥലത്തെത്തി.
ഐക്യദാര്‍ഢ്യം അറിയിച്ച്‌ മുതിര്‍ന്ന നേതാക്കളായ സി.എസ്. സുജാത, പി.കെ. ബിജു എന്നിവരും സമരപ്പന്തലിലെത്തി. ഉദ്യോഗാര്‍ത്ഥികളുടെ സമരത്തിന് പിന്തുണ പ്രഖ്യാപിച്ച ഡിവൈഎഫ്‌ഐയുടെ ഇടപെടലോടെ സെക്രട്ടേറിയറ്റിനു മുന്നില്‍ പ്രതിഷേധം കൂടുതല്‍ ശക്തമായി.
