കൂത്തുപറമ്പ്‌: കൂത്തുപറമ്പ്‌ ഉപജില്ലാ സ്‌കൂള്‍ ശാസ്‌ത്രമേളയ്‌ക്ക് കോട്ടയം മലബാര്‍ ഗവണ്‍മെന്റ്‌ ഹയര്‍ സെക്കന്‍ഡറി സ്‌കൂളില്‍ പ്രൗഢഗംഭീരമായ തുടക്കം.
വിദ്യാര്‍ഥികളിലെ ശാസ്‌ത്രാഭിരുചിയും സര്‍ഗാത്മക കഴിവുകളും പരിപോഷിപ്പിക്കുന്നതിനും ശാസ്‌ത്രീയ ചിന്തയും അന്വേഷണ മനോഭാവവും വളര്‍ത്തുന്നതിനും ലക്ഷ്യമിട്ടാണ്‌ മേള സംഘടിപ്പിക്കുന്നത്‌. പി.കെ. പ്രവീണ്‍ എം.എല്‍.എ ഉദ്‌ഘാടനം ചെയ്‌തു. കോട്ടയം ഗ്രാമപഞ്ചായത്ത്‌ പ്രസിഡന്റ്‌ കെ. ആരതി അധ്യക്ഷത വഹിച്ചു.
ശാസ്‌ത്രോത്സവത്തിന്റെ ലോഗോ രൂപകല്‍പ്പന ചെയ്‌ത നിതിന്‍ കിരണിനെ ചടങ്ങില്‍ ആദരിച്ചു. വിദ്യാര്‍ഥികളുടെ സര്‍ഗാത്മകതയ്‌ക്കും ശാസ്‌ത്രീയ മികവിനും പ്രാധാന്യം നല്‍കുന്ന മേളയില്‍ വിവിധ വിദ്യാലയങ്ങളില്‍ നിന്നായി 2500ഓളം കുട്ടികളാണ്‌ പങ്കെടുക്കുന്നത്‌. കൂത്തുപറമ്പ്‌ ഉപജില്ലാ വിദ്യാഭ്യാസ ഓഫീസര്‍ അബ്‌ദുല്‍ മുനീര്‍ മേളയുടെ പ്രവര്‍ത്തന വിശദീകരണം നടത്തി.
കൂത്തുപറമ്പ്‌ ബ്ലോക്ക്‌ പഞ്ചായത്ത്‌ അംഗം പി. രാഘവന്‍, കോട്ടയം ഗ്രാമപഞ്ചായത്ത്‌ വിദ്യാഭ്യാസ സ്‌റ്റാന്‍ഡിങ്‌ കമ്മിറ്റി അധ്യക്ഷ എ.കെ. സുഫീറ, പഞ്ചായത്ത്‌ അംഗം വി.കെ. മുഹമ്മദ്‌ സുമിനാസ്‌, ബി.പി.സി.അബ്‌ദുള്ള പുത്തൂര്‍, സ്‌കൂള്‍ ഹെഡ്‌മാസ്‌റ്റര്‍ പി. സനല്‍കുമാര്‍, പി.ടി.എ. പ്രസിഡന്റ്‌ ടി.കെ. ഷമീം എന്നിവര്‍ സംസാരിച്ചു.
സോഷ്യല്‍ സയന്‍സ്‌, ഗണിതശാസ്‌ത്രം, ഐ.ടി., ശാസ്‌ത്രം, പ്രവര്‍ത്തിപരിചയം എന്നിങ്ങനെ അഞ്ച്‌ വിഭാഗങ്ങളിലായാണ്‌ മത്സരങ്ങള്‍ നടക്കുന്നത്‌. വിദ്യാര്‍ഥികളുടെ അറിവും നിരീക്ഷണപാടവവും പ്രായോഗിക കഴിവുകളും പ്രകടിപ്പിക്കുന്നതിനുള്ള വേദിയായി മേള മാറും. പാഠപുസ്‌തകങ്ങളിലെ അറിവുകള്‍ക്കപ്പുറം പരീക്ഷണങ്ങളിലൂടെയും മാതൃകകളിലൂടെയും സ്വന്തം കഴിവുകള്‍ അവതരിപ്പിക്കാന്‍ കുട്ടികള്‍ക്ക്‌ അവസരം ലഭിക്കും. ശാസ്‌ത്രവിഭാഗത്തിലെ മത്സരങ്ങള്‍ കൂത്തുപറമ്പ്‌ യു.പി.
സ്‌കൂളില്‍ നടക്കും. മറ്റു വിഭാഗങ്ങളിലെ മത്സരങ്ങള്‍ കോട്ടയം മലബാര്‍ ഗവണ്‍മെന്റ്‌ ഹയര്‍ സെക്കന്‍ഡറി സ്‌കൂളിലാണ്‌ ക്രമീകരിച്ചിരിക്കുന്നത്‌. വിവിധ വിദ്യാലയങ്ങളില്‍ നിന്നുള്ള വിദ്യാര്‍ഥികളും അധ്യാപകരും രക്ഷിതാക്കളും വിദ്യാഭ്യാസ പ്രവര്‍ത്തകരും ഉള്‍പ്പെടെ നിരവധി പേരുടെ പങ്കാളിത്തത്തോടെ നടക്കുന്ന മേള ഉപജില്ലയിലെ വിദ്യാര്‍ഥികളുടെ ശാസ്‌ത്രീയവും അക്കാദമികവുമായ മികവ്‌ പ്രകടിപ്പിക്കുന്ന പ്രധാന വേദിയായി മാറുകയാണ്‌. ശാസ്‌ത്രം, ഗണിതം, വിവരസാങ്കേതികവിദ്യ, സാമൂഹികശാസ്‌ത്രം, പ്രവര്‍ത്തിപരിചയം തുടങ്ങിയ മേഖലകളില്‍ വിദ്യാര്‍ഥികള്‍ക്കുള്ള താല്‍പര്യം വര്‍ധിപ്പിക്കുന്നതിനും പുതിയ ആശയങ്ങള്‍ കണ്ടെത്തുന്നതിനും പരസ്‌പരം അറിവുകള്‍ പങ്കുവെക്കുന്നതിനും ശാസ്‌ത്രമേള സഹായകമാകും. വിദ്യാര്‍ഥികളുടെ കഴിവുകള്‍ കണ്ടെത്തി പ്രോത്സാഹിപ്പിക്കുന്നതിനൊപ്പം ശാസ്‌ത്രീയ മനോഭാവമുള്ള പുതുതലമുറയെ വളര്‍ത്തിയെടുക്കാനും ഇത്തരം മേളകള്‍ വഴിയൊരുക്കുന്നു.
