പമ്പ: ശബരിമല തീര്‍ഥാടകര്‍ക്ക് സുരക്ഷിത യാത്ര ഉറപ്പാക്കാന്‍ കെഎസ്‌ആര്‍ടിസിയുടെ പദ്ധതി. കുടുംബങ്ങള്‍ക്കും ഭക്തരുടെ സംഘങ്ങള്‍ക്കും കെഎസ്‌ആര്‍ടിസി ബുക്ക് ചെയ്ത് മണ്ഡല-മകര വിളക്ക് കാലത്ത് ശബരിമല യാത്ര ചെയ്യാം.
ബുക്ക് ചെയ്യുന്നവരുടെ തൊട്ടടുത്ത ക്ഷേത്രത്തില്‍ നിന്ന് പമ്പയിലേക്ക് ആയിരിക്കും സര്‍വീസ്. ഇടയ്ക്ക വിശ്രമത്തിന് നിര്‍ത്തിയാകും യാത്ര. ഓണ്‍ലൈന്‍ വഴിയാണ് ബുക്ക് ചെയ്യേണ്ടത്.
മുന്‍കൂട്ടി ബുക്ക് ചെയ്ത് നാട്ടില്‍ നിന്ന് പമ്പയിലേക്ക് യാത്ര ചെയ്യാമെന്നതാണ് നേട്ടം. കെഎസ്‌ആര്‍ടിസി ബജറ്റ് ടൂറിസം സെല്‍ മുഖേനയാണ് ചാര്‍ട്ടേഡ് ട്രിപ്പുകള്‍ ക്രമീകരിക്കുന്നത് എന്ന് ഗതാഗത മന്ത്രി സിപി ജോണ്‍ അറിയിച്ചു. ഓണ്‍ലൈന്‍ റിസര്‍വേഷന്‍ സൗകര്യം ഒരുക്കിയിട്ടുണ്ട്. നാട്ടില്‍ നിന്ന് പമ്പയിലേക്കും തിരിച്ച്‌ നാട്ടിലേക്കുമായിരിക്കും യാത്ര.
ഈ മണ്ഡല-മകരവിളക്ക് കാലത്ത് ശബരിമലയിലേക്ക് എത്തുന്ന അയ്യപ്പഭക്തര്‍ക്ക് കൂടുതല്‍ സുരക്ഷിതവും സൗകര്യപ്രദവുമായ യാത്ര ഉറപ്പാക്കാന്‍ കെഎസ്‌ആര്‍ടിസി കൂടെയുണ്ടെന്ന് മന്ത്രി പറഞ്ഞു. ഇതിനായി കെഎസ്‌ആര്‍ടിസിയുടെ പ്രത്യേക ചാര്‍ട്ടേഡ് ട്രിപ്പ് സൗകര്യങ്ങള്‍ ഒരുക്കി. തിരുവിതാംകൂര്‍ ദേവസ്വം ബോര്‍ഡ് ആസ്ഥാനത്ത് 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂമിലെ കെഎസ്‌ആര്‍ടിസി ബുക്കിങ് കൗണ്ടര്‍ ഉദ്ഘാടനം ചെയ്തു.
മുന്‍കൂട്ടി ബുക്ക് ചെയ്യാം: വ്യക്തികള്‍ക്കും കുടുംബങ്ങള്‍ക്കും ഭക്തസംഘങ്ങള്‍ക്കും വിവിധ സംഘടനകള്‍ക്കും തങ്ങളുടെ യാത്രാ ആവശ്യങ്ങള്‍ക്കനുസരിച്ച്‌ കെഎസ്‌ആര്‍ടിസി ബസുകള്‍ ഇനി മുന്‍കൂട്ടി ബുക്ക് ചെയ്യാം.
നിങ്ങളുടെ നാട്ടില്‍ നിന്ന് പമ്പയിലേക്ക്: യാത്രക്കാരുടെ എണ്ണം, യാത്ര തുടങ്ങുന്ന സ്ഥലം, തീയതി, സമയം, യാത്രയുടെ ദൈര്‍ഘ്യം എന്നിവ നിങ്ങള്‍ക്ക് തന്നെ തീരുമാനിക്കാം. നിങ്ങളുടെ പ്രദേശത്ത് നിന്ന് പമ്പയിലേക്കും തിരിച്ചും നേരിട്ട് യാത്ര ചെയ്യാന്‍ ഇതിലൂടെ സാധിക്കും.
ഓണ്‍ലൈന്‍ റിസര്‍വേഷന്‍: കെഎസ്‌ആര്‍ടിസി ബജറ്റ് ടൂറിസം സെല്‍ മുഖേനയാണ് ചാര്‍ട്ടേഡ് ട്രിപ്പുകള്‍ ക്രമീകരിക്കുന്നത്. ഇതിനായി ഓണ്‍ലൈന്‍ റിസര്‍വേഷന്‍ സൗകര്യവും ഏര്‍പ്പെടുത്തിയിട്ടുണ്ട്.
ക്ഷേത്രങ്ങള്‍ കേന്ദ്രീകരിച്ച്‌ സര്‍വീസ്: വിവിധ ഡിപ്പോകള്‍ക്കും പ്രത്യേക സര്‍വീസ് കേന്ദ്രങ്ങള്‍ക്കും സമീപമുള്ള ക്ഷേത്രങ്ങളെ കേന്ദ്രീകരിച്ച്‌ ആവശ്യാനുസരണം പമ്പയിലേക്ക് പ്രത്യേക സര്‍വീസുകള്‍ നടത്തും.
