ശബരിമല: മണ്ഡല-മകരവിളക്ക് തീർഥാടനകാലത്ത് ലഹരിവസ്തുക്കളുടെ കടത്തും ഉപയോഗവും തടയുന്നതിനും പരിശോധനകളും എൻഫോഴ്സ്മെന്റ് പ്രവർത്തനങ്ങളും കൂടുതല് കാര്യക്ഷമമാക്കുന്നതിനും ശക്തമായ നടപടികള് സ്വീകരിക്കുമെന്ന് മന്ത്രി എം.ലിജു.
പമ്പയില് നടന്ന അവലോകന യോഗത്തിലാണ് മന്ത്രി ഇതുസംബന്ധിച്ച നിർദേശങ്ങള് നല്കിയത്.
ഇതിന്റെ ഭാഗമായി പമ്പ, നിലയ്ക്കല്, സന്നിധാനം എന്നിവിടങ്ങളിലെ എക്സൈസ് സംവിധാനങ്ങള് കൂടുതല് ശക്തിപ്പെടുത്തുകയും പത്തനംതിട്ട, ഇടുക്കി, കോട്ടയം ജില്ലകളിലെ എക്സൈസ് വിഭാഗങ്ങളുടെ പ്രവർത്തനങ്ങള് ഏകോപിപ്പിക്കുകയും ചെയ്യുമെന്നും മന്ത്രി പറഞ്ഞു.
തീർഥാടന പാതകളിലും ലഹരിവസ്തുക്കളുടെ സാന്നിധ്യത്തിന് സാധ്യതയുള്ള മേഖലകളിലും പ്രത്യേക നിരീക്ഷണവും പരിശോധനയും നടത്തും. ഇതിനായി ആവശ്യമായ ഉദ്യോഗസ്ഥർ, വാഹനങ്ങള്, മറ്റ് അടിസ്ഥാന സൗകര്യങ്ങള് എന്നിവ ഉറപ്പാക്കണം. പമ്പ, നിലയ്ക്കല്, സന്നിധാനം എന്നിവിടങ്ങളിലെ താത്കാലിക എക്സൈസ് റേഞ്ച് ഓഫീസുകളുടെ പ്രവർത്തനം കൂടുതല് കാര്യക്ഷമമാക്കുന്നതിനും ലഹരിവിരുദ്ധ പ്രവർത്തനങ്ങള് ശക്തിപ്പെടുത്തുന്നതിനും പ്രത്യേക ശ്രദ്ധ നല്കണമെന്നും മന്ത്രി നിർദേശിച്ചു.
ഉദ്യോഗസ്ഥർക്ക് ആവശ്യമായ അടിസ്ഥാന സൗകര്യങ്ങള് മെച്ചപ്പെടുത്തുന്നതിനൊപ്പം വരും വർഷങ്ങളില് എക്സൈസ് വകുപ്പിന് സ്ഥിരം ബാരക്ക് സംവിധാനം ഒരുക്കുമെന്ന് തിരുവിതാംകൂർ ദേവസ്വം ബോർഡ് പ്രസിഡന്റ് കെ. ജയകുമാർ യോഗത്തില് പറഞ്ഞു.
നിലയ്ക്കല്, പമ്പ, സന്നിധാനം എന്നിവിടങ്ങളിലെ പ്രവർത്തനങ്ങള് ഏകോപിപ്പിക്കുന്നതിനായി ഇന്റഗ്രേറ്റഡ് കണ്ട്രോള് റൂം സംവിധാനം ആരംഭിച്ചു. ബന്ധപ്പെട്ട ജില്ലകളിലെ എക്സൈസ് ഉദ്യോഗസ്ഥർ പരസ്പര ഏകോപനത്തോടെ പ്രവർത്തിച്ച് ശബരിമല തീർത്ഥാടനകാലത്ത് ലഹരിമുക്തമായ അന്തരീക്ഷം ഉറപ്പാക്കണമെന്ന് എക്സൈസ് കമ്മിഷണർ നിർദേശിച്ചു.
താത്കാലിക എക്സൈസ് ഓഫീസുകളുടെ പ്രവർത്തനം കൂടുതല് കാര്യക്ഷമമാക്കുന്നതിനും ഉദ്യോഗസ്ഥർക്കുള്ള ഭൗതിക സൗകര്യങ്ങള് മെച്ചപ്പെടുത്തുന്നതിനും ആവശ്യമായ നടപടികള് സ്വീകരിക്കണമെന്ന് എക്സൈസ് സ്റ്റാഫ് അസോസിയേഷൻ പ്രതിനിധികള് യോഗത്തില് ആവശ്യപ്പെട്ടു.
യോഗത്തില് എക്സൈസ് കമ്മിഷണർ എസ്. കാർത്തികേയൻ, പമ്പ എഡിഎം ദിലീപ് കെ. കൈനിക്കര, അഡീഷണല് എക്സൈസ് കമ്മിഷണർ (അഡ്മിനിസ്ട്രേഷൻ) . ബി. കൃഷ്ണകുമാർ, അഡീഷണല് എക്സൈസ് കമ്മിഷണർ (എൻഫോഴ്സ്മെന്റ്) ജയശങ്കർ, പത്തനംതിട്ട, കോട്ടയം, ഇടുക്കി ഡെപ്യൂട്ടി എക്സൈസ് കമ്മിണർമാർ, എക്സൈസ് സ്റ്റാഫ് അസോസിയേഷൻ പ്രതിനിധികള് എന്നിവർ പങ്കെടുത്തു.






