പാലാ: ശബരിമല തീര്ത്ഥാടനകാലം ആരംഭിച്ചിട്ടും ഇതര സംസ്ഥാനങ്ങളില്നിന്ന് മലയാളഭാഷയും വഴികളും കൃത്യമായി അറിയാതെ എത്തുന്ന അയ്യപ്പ ഭക്തര് പാലാ മേഖലയില് കടുത്ത യാത്രാക്ലേശവും ആശയക്കുഴപ്പവും നേരിടുന്നു.
പ്രധാന ഹൈവേകളിലും ജംഗ്ഷനുകളിലും പൊതുമരാമത്ത് വകുപ്പിന്റെയും തദ്ദേശ ഭരണ സ്ഥാപനങ്ങളുടെയും കീഴിലുള്ള ദിശാസൂചികകള് വ്യക്തമല്ലാത്തതുംതകര്ന്നുകിടക്കുന്നതുമാണ്.
പാലാ സെന്റ് തോമസ് സ്കൂളിന് സമീപമുള്ള പി.ഡബ്ല്യു.ഡി ബോര്ഡുകള് ഉള്പ്പെടെ പലതും മാഞ്ഞും പൊളിഞ്ഞും ദിശകള് അവ്യക്തമായ വിധത്തിലുമാണ്.
പോലീസ് വകുപ്പിന്റെ ഭാഗത്തുനിന്നാണ് ഏതാനും സൈന്ബോര്ഡുകള് സ്ഥാപിച്ചിട്ടുള്ളത് ദൂരെനിന്ന് വേഗത്തില് വരുന്ന വാഹനങ്ങളിലെ ഡ്രൈവര്മാര്ക്ക് ഇവ പെട്ടെന്ന് ശ്രദ്ധയില്പ്പെടില്ല.കടപ്പാട്ടൂര്, രാമപുരം, മരങ്ങാട്ടുപിള്ളി തുടങ്ങിയ ഭാഗങ്ങളില് നിന്ന് പൊന്കുന്നം,എരുമേലി ഭാഗത്തേക്ക് പോകുന്ന തീര്ത്ഥാടകര് കൃത്യമായ ദിശാസൂചികകളില്ലാതെ ഇടുങ്ങിയ ടൗണ് റോഡുകളിലും ജംഗ്ഷനുകളിലും കുടുങ്ങി മണിക്കൂറുകളോളം കഷ്ടപ്പെടുന്ന സ്ഥിതിയാണുള്ളത്.
വിഷയത്തിന്റെ ഗൗരവം അധികൃതരെ അറിയിച്ചിട്ടും പോലീസിന്റെ അഭ്യര്ത്ഥനകള്ക്ക് പോലും പരിഗണിക്കാതെ പി.ഡബ്ല്യു.ഡി അധികൃതരില് നിന്ന് അനുയോജ്യമായ നടപടികള് ഉണ്ടാകുന്നില്ലെന്ന ആക്ഷേപം ശക്തമാണ്.
ശബരിമല തീര്ത്ഥാടനം മുന്നില്ക്കണ്ട് പാലാ മേഖലയില് വലിയതും വ്യക്തവുമായ ദിശാസൂചികകള് അടിയന്തരമായി സ്ഥാപിക്കണമെന്നും തിരക്കേറിയ വേളകളില് വാഹന തിരക്കില്ലാത്ത ബൈപാസ് വഴി തിരിച്ചുവിടുന്നതിനുള്ള ഗതാഗത ക്രമീകരണങ്ങള് ഏര്പ്പെടുത്തണമെന്നആവശ്യവും ശക്തമാണ്. തീര്ത്ഥാടകരുടെ ദുരിതം ഒഴിവാക്കാന് ബന്ധപ്പെട്ട ഉദ്യോഗസ്ഥരും സര്ക്കാരും യുദ്ധകാലാടിസ്ഥാനത്തില് ഇടപെടണം.





