കോട്ടയം: പുണ്യപാപങ്ങളുടെ ഇരുമുടിക്കെട്ടുമേന്തി ശരണം വിളിച്ച് തീർത്ഥാടകലക്ഷങ്ങളാണ് ഇനി മതമൈത്രിയുടെ മണ്ണായ എരുമേലിയിലെത്തുക.
ഇന്നലെ മുതൽ തിരക്ക് തുടങ്ങി. മഹിഷി നിഗ്രഹത്തിന്റെ സ്മരണ പുതുക്കി എരുമേലിയിൽ പേട്ടതുള്ളിയശേഷമാണ്
പമ്പയിലേക്കും തുടർന്ന് സന്നിധാനത്തിലേക്കും ഭക്തർ യാത്രയാകുന്നത്.
കൊച്ചമ്പലത്തിൽ നിന്ന് ശരക്കോലുകളും വാളുകളും ഗദകളുമേന്തി വാദ്യമേളങ്ങളുടെ അകമ്പടിയോടെ വാവരുപള്ളിയിലെത്തി
വലം വച്ചശേഷമാണ് പ്രധാന പാതയിലൂടെ വലിയമ്പലത്തിലേക്കു പോകുക.
പേട്ടതുള്ളലിനുശേഷം അഴുത, കാളകെട്ടി കാനനപാതയിലൂടെ നടന്നു പോകുന്നവരുമുണ്ട്.
ഏറെപ്പേരും കണമല, നിലയ്ക്കൽ വഴി പമ്പയിലേക്ക് വാഹനങ്ങളിലെത്തുകയാണ് പതിവ്.
രാപ്പകൽ തീർത്ഥാകടരുടെ വരവും, പാർക്കിംഗ്, വ്യാപാരത്തിരക്കുമൊക്കെയായി എരുമേലി ഇനി ജനനിബിഡമാകും.
ആയിരക്കണക്കിന് തീർഥാടകരാണ് ഇന്നലെ എരുമേലിയിലെത്തി പേട്ടതുള്ളി ആചാരാനുഷ്ഠാനങ്ങളോടെ ശബരിമലയിലേക്ക് യാത്ര തിരിച്ചത്.
വലിയമ്പലത്തിന് അടുത്ത് ഒരേസമയം 1,000 തീർഥാടകർക്ക് വിരിവച്ച് വിശ്രമിക്കാനുള്ള സൗകര്യവും 25 കുളിമുറികളും സൗജന്യമായി ഒരുക്കിയിട്ടുണ്ട്.
ഇതിനടുത്ത് അന്നദാന കേന്ദ്രവും പ്രവർത്തനം തുടങ്ങി.
ടൗണിൽ ശുചീകരണ പ്രവർത്തനങ്ങൾക്കായി 125 അംഗ സംഘത്തെ നിയോഗിച്ചിട്ടുണ്ട്.
കെഎസ്ആർടിസി ഇന്നലെ വൈകുന്നേരം വരെ 50 സർവീസുകൾ പമ്പയ്ക്ക് നടത്തി.
എരുമേലി-പമ്പ ടിക്കറ്റ് ചാർജ് 84 രൂപയായിരുന്നത് ഇന്നലെ അർധ രാത്രി മുതൽ 114 രൂപയാക്കി സ്പെഷൽ ചാർജായി വർധിപ്പിച്ചിട്ടുണ്ട്.
അതേസമയം നിലയ്ക്കൽ-പമ്പ ടിക്കറ്റ് നിരക്ക് പഴയ ചാർജായ 50 രൂപയാണ് ഈടാക്കുന്നത്.
ശബരിമലയിലേക്കുള്ള പരമ്പരാഗത കാനനപാത ഇന്നു തുറക്കും. പേരൂർത്തോട്, കോയിക്കക്കാവ്, കാളകെട്ടി, അഴുതക്കടവ്, കരിമല വഴിയാണ് ഈ പാത കടന്നുപോകുന്നത്.
എരുമേലിയിലെ പ്രവേശന ഭാഗമായ കോയിക്കക്കാവിലൂടെ ഇന്നു രാവിലെ ആറുമുതൽ തീർഥാടകരെ കടത്തിവിടും.
വൈകുന്നേരം അഞ്ച് വരെയാണ് ഇതുവഴി കടത്തിവിടുക. കടന്നുപോകുന്ന തീർഥാടകരുടെ എണ്ണം ഇവിടെ രേഖപ്പെടുത്തുന്നുണ്ട് എന്നാൽ, അഴുതക്കടവിൽനിന്ന് കാളകെട്ടിയിലെത്തുന്ന ഭക്തർ പ്രവേശിക്കുന്ന സമയം രാവിലെ ഏഴു മുതൽ ഉച്ചകഴിഞ്ഞ് 2.30 വരെയാണ്.
കാനനപാത വഴി ഒരു ദിവസം ആകെ 5,000 തീർഥാടകർക്ക് മാത്രമേ പ്രവേശനമുണ്ടായിരിക്കുകയുള്ളൂ.
ഇതിൽ 3,000 പേർക്ക് ഓൺലൈൻ വെർച്വൽ ക്യൂ വഴിയും 2,000 പേർക്ക് സ്പോട്ട് ബുക്കിംഗ് വഴിയും പ്രവേശനം ലഭിക്കും.
തീർഥാടക വാഹനങ്ങളുടെ തിരക്കുമൂലം എരുമേലി നഗരത്തിലെ പാർക്കിംഗ് മൈതാനങ്ങൾ നിറഞ്ഞു.
ഗതാഗത നിയന്ത്രണങ്ങൾക്കും സുരക്ഷാ ക്രമീകരണങ്ങൾക്കുമായി 530 പൊലിസ് ഉദ്യോഗസ്ഥരെയാണ് എരുമേലിയിലും ശബരിമല പാതയിലും നിയോഗിച്ചിട്ടുള്ളത്.
എരുമേലി ടൗണിലെ പേട്ടതുള്ളൽ പാതയിൽ ഇന്നലെ രാവിലെ മുതൽ ഒറ്റവരി ഗതാഗതം തുടങ്ങി.
റാന്നി ഭാഗത്തുനിന്ന് വരുന്ന വാഹനങ്ങൾ രാജാപ്പടിയിൽ നിന്ന് തിരിഞ്ഞ് കെഎസ്ആർടിസി, ടിബി റോഡ് വഴി ടൗണിൽ എത്തണം.ഓട്ടോറിക്ഷകൾ, ടാക്സികൾ ഉൾപ്പടെയുള്ള വാഹനങ്ങൾക്കും വരി തെറ്റിച്ച് കടന്നുപോകാൻ അനുമതിയില്ല.
പൊലിസ് കൺട്രോൾ റൂം കഴിഞ്ഞ ദിവസം മുതൽ പ്രവർത്തനം തുടങ്ങി.
വകുപ്പുകളുടെ ഏകോപനത്തിനായി റവന്യു കൺട്രോൾ റൂം ഇന്നലെഎരുമേലി ശബരി ഹോമിൽ പ്രവർത്തനം ആരംഭിച്ചു.
ഇതിനടുത്തുതന്നെ മോട്ടോർ വാഹന വകുപ്പിന്റെ റോഡ് സേഫ് സോൺ കൺട്രോൾ റൂമും ഇന്നലെ പ്രവർത്തനം തുടങ്ങി.
ആരോഗ്യ വകുപ്പിന്റെ സേവന പ്രവർത്തനങ്ങളുടെയും താത്കാലിക ഡിസ്പെൻസറികളുടെയും ഉദ്ഘാടനം ഇന്ന് നടക്കും.






