കാഞ്ഞിരപ്പള്ളി: കാഞ്ഞിരപ്പള്ളി സെന്റ് ഡൊമിനിക്‌സ് കോളേജ് ഗ്രൗണ്ടില്‍ ആരംഭിച്ച
കോട്ടയം റവന്യൂ ജില്ലാ സ്‌കൂള്‍ കായികമേളയുടെ
ആദ്യദിനത്തിലെ മത്സരങ്ങള്‍ പൂർത്തിയായപ്പോള്‍ 89 പോയിന്റുമായി കാഞ്ഞിരപ്പള്ളി ഉപജില്ല ബഹുദൂരം മുന്നില്‍. പ്രതാപത്തിലേക്ക് തിരിച്ചു വന്ന കോരുത്തോട് സി.കെ.എം.എച്ച്‌.എസ്.എസിന്റെ ചിറകിലേറി 11 സ്വർണവും 10 വെള്ളിയും നാല് വെങ്കലവുമുള്‍പ്പെടെ 25 മെഡലുകളുമായാണ് കാഞ്ഞിരപ്പള്ളി ഒന്നാംസ്ഥാനത്ത് കുതിക്കുന്നത്. 27 പോയിന്റുമായി പാലാ ഉപജില്ല രണ്ടാംസ്ഥാനത്തും 23 പോയിന്റുമായി കോട്ടയം ഈസ്റ്റ് മൂന്നാംസ്ഥാനത്തുമുണ്ട്. മൂന്ന് ദിവസം നീളുന്ന കായികമേളയില്‍ ജില്ലയിലെ 13 ഉപജില്ലകളില്‍ നിന്നായി 2500ഓളം താരങ്ങളാണ് വിവിധ ഇനങ്ങളില്‍ മാറ്റുരയ്ക്കുന്നത്. ഇന്നലെ രാവിലെ കോട്ടയം വിദ്യാഭ്യാസ ഉപഡയറക്ടർ ഹണി ജി. അലക്‌സാണ്ടർ പതാക ഉയർത്തി. തുടർന്ന് ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പ് കായികമേള ഉദ്ഘാടനം ചെയ്തു. കാഞ്ഞിരപ്പള്ളി ബ്ലോക്ക് പഞ്ചായത്ത് പ്രസിഡന്റ് അഡ്വ.പി.എ ഷെമീർ അദ്ധ്യക്ഷത വഹിച്ചു. ജില്ലാ പഞ്ചായത്തംഗം അഡ്വ. ജീരാജ് മുഖ്യപ്രഭാഷണം നടത്തി.
കോരുത്തോട്
റിട്ടേണ്‍സ്
സ്‌കൂള്‍ തലത്തില്‍ 51 പോയിന്റുമായി കോരുത്തോട് സി.കെ.എം.എച്ച്‌.എസ്.എസാണ് ഒന്നാംസ്ഥാനത്ത്. എട്ട് സ്വർണം, മൂന്ന് വെള്ളി, രണ്ട് വെങ്കലം ഉള്‍പ്പെടെ 13 മെഡലുകളാണ് കോരുത്തോട് സ്‌കൂള്‍ താരങ്ങള്‍ നേടിയത്. 21 പോയിന്റുമായി മുരിക്കുംവയല്‍ വി.എച്ച്‌.എസ്.എസ് രണ്ടാംസ്ഥാനത്തും 15 പോയിന്റുമായി പാലാ സെന്റ് തോമസ് മൂന്നാംസ്ഥാനത്തുമാണ്.
പ്രായത്തെച്ചൊല്ലി
തർക്കം:വിദ്യാർത്ഥികളുടെ
പ്രതിഷേധം,
മത്സരം നിറുത്തി വച്ചു
റവന്യു ജില്ലാ കായികമേളയ്ക്കിടെ മത്സരാർത്ഥികളുടെ പ്രായപരിധിയെച്ചൊല്ലി ഉയർന്ന ആരോപണം പ്രതിഷേധത്തിലേക്ക് നയിച്ചു. ചില താരങ്ങള്‍ നിശ്ചിത പ്രായപരിധി ലംഘിച്ച്‌ മത്സരിക്കുന്നെന്ന് ആരോപിച്ച്‌ വിദ്യാർത്ഥികള്‍ ട്രാക്കിലിറങ്ങി പ്രതിഷേധിച്ചതോടെ മത്സരങ്ങള്‍ അല്‍പസമയം നിറുത്തിവച്ചു.
കോരുത്തോട് സി.കെ.എം.എച്ച്‌.എസ്.എസിലെ അന്യസംസ്ഥാന വിദ്യാർത്ഥികളെ പ്രായപരിധി ലംഘിച്ച്‌ മത്സരിപ്പിക്കുന്നു എന്നാരോപിച്ചായിരുന്നു പ്രതിഷേധം. പ്രതിഷേധത്തെ തുടർന്ന് കാഞ്ഞിരപ്പള്ളി പൊലീസും വിദ്യാഭ്യാസ ഉപഡയറക്ടർ ഹണി അലക്‌സാണ്ടറും വിദ്യാർത്ഥികളുമായി ചർച്ച നടത്തി. അന്യസ്ഥാനങ്ങളില്‍ നിന്നുള്ള വിദ്യാർത്ഥികള്‍ക്ക് കായികമേളയില്‍ പങ്കെടുക്കുന്നതിന് വിലക്കില്ലെന്ന് വിദ്യാഭ്യാസ ഉപഡയറക്ടർ വ്യക്തമാക്കി. അതേസമയം, ഏതെങ്കിലും മത്സരാർത്ഥിയുടെ പ്രായം സംബന്ധിച്ച്‌ പരാതിയുണ്ടെങ്കില്‍ ബന്ധപ്പെട്ട രേഖകള്‍ പരിശോധിച്ച്‌ നടപടി സ്വീകരിക്കുമെന്നും അറിയിച്ചു. വിദ്യാർത്ഥികള്‍ പ്രതിഷേധം പിൻവലിച്ചതോടെയാണ് മത്സരങ്ങള്‍ പുനരാരംഭിച്ചത്. കഴിഞ്ഞ വർഷം ദേശീയതലത്തില്‍ ഉള്‍പ്പെടെ മത്സരിച്ച്‌ വിജയിച്ചവരും ആവശ്യമായ രേഖകളുള്ളവരുമായ വിദ്യാർത്ഥികളാണ് കോരുത്തോട് സ്‌കൂളിനെ പ്രതിനിധീകരിച്ച്‌ മത്സരിക്കുന്നതെന്ന് സ്‌കൂള്‍ മാനേജർ എ.എൻ സാബു പറഞ്ഞു.
മത്സരം മണ്‍ട്രാക്കില്‍,
മികച്ച താരങ്ങളുടെ പ്രകടനത്തെയും ബാധിച്ചു.
എട്ട് വർഷമായി സിന്തറ്റിക് ട്രാക്കില്‍ നടന്നു വന്ന ജില്ലാ സ്‌കൂള്‍ കായികമേളയില്‍ ഇത്തവണ താരങ്ങള്‍ ഇറങ്ങിയത് മണ്‍ട്രാക്കില്‍. ജില്ലയിലെ ഏക സിന്തറ്റിക് ട്രാക്കായ പാലാ മുനിസിപ്പല്‍ സ്റ്റേഡിയത്തിലെ ട്രാക്കിന്റെ നവീകരണം അനന്തമായി നീളുന്നതാണ് കായികമേള മണ്‍ട്രാക്കില്‍ നടത്തേണ്ട ഗതികേടിലാക്കിയത്. കാഞ്ഞിരപ്പള്ളി എസ്.ഡി കോളേജിലെ മണ്‍ട്രാക്കിലെ പുല്ലും മറ്റും വെട്ടിയൊരുക്കിയെങ്കിലും, 100 മീറ്റർ ഭാഗം ഒഴികെ ബാക്കി ട്രാക്കില്‍ കുണ്ടും കുഴിയുമാണെന്ന ആക്ഷേപവും ഉയരുന്നു. എന്നാല്‍, മണ്‍ട്രാക്കിലെ മത്സരങ്ങള്‍ മികച്ച താരങ്ങളുടെ പ്രകടനത്തെയും ബാധിച്ചു.
