കണ്ണൂര്‍: കണ്ണൂര്‍ ജില്ലാ പഞ്ചായത്തിലെ ക്രമക്കേടില്‍ സിപിഎം നേതാവ് പി പി ദിവ്യക്കെതിരെ വിജിലൻസ് അന്വേഷണത്തിന് സർക്കാർ ഉത്തരവിട്ടതില്‍ പ്രതികരിച്ച്‌ കെഎസ്യു . വൈസ് പ്രസിഡന്‍റ് മുഹമ്മദ് ഷമ്മാസ്.
സത്യം തെളിയുമെന്ന് പ്രതീക്ഷിക്കുന്നതായി പരാതിക്കാരനായ കെഎസ്യു നേതാവ് പറഞ്ഞു.
ദിവ്യ നടത്തിയത് കോടിക്കണക്കിന് രൂപയുടെ ബെനാമി ഇടപാടുകളാണ്. ദിവ്യയെ സംരക്ഷിക്കുന്ന നിലപാടാണ് എല്‍ഡിഎഫ് സർക്കാർ സ്വീകരിച്ചുന്നതെന്നും ഷമ്മാസ് ആരോപിച്ചു.
പി പി ദിവ്യ കണ്ണൂർ ജില്ലാ പഞ്ചായത്ത് പ്രസിഡന്‍റായിരിക്കെ നടന്ന ക്രമക്കേടുകളിലാണ് അന്വേഷണം പ്രഖ്യാപിച്ചത്. ടെൻഡർ ഇല്ലാതെ കാർട്ടണ്‍ ഇന്ത്യ കമ്പനിക്ക് നിർമ്മാണ കരാർ നല്‍കി എന്നാണ് ആരോപണം.
കമ്പനി ദിവ്യയുടെ ബെനാമിയുടെതെന്നായിരുന്നു പരാതി. ദിവ്യയുടെയും ഭർത്താവിന്‍റെയും സ്വത്തും വിജിലൻസ് അന്വേഷിക്കും.
കെഎസ്യു ഉപാധ്യക്ഷൻ മുഹമ്മദ് ഷമ്മാസിന്റെ പരാതിയിലാണ് അന്വേഷണം. 17(A) പ്രകാരം അന്വേഷണത്തിനുള്ള അനുമതി സർക്കാർ നല്‍കി.
കഴിഞ്ഞ സർക്കാരിന്‍റെ കാലത്ത് അനുമതി നല്‍കിയിരുന്നില്ല. കണ്ണൂർ ജില്ലാ പഞ്ചായത്ത് മുൻ സെക്രട്ടറി അബ്ദുല്‍ ലത്തീഫിനെതിരെയും അന്വേഷണം നടത്തും.
