പോസ്റ്റ് ഓഫീസിൽ ജോലി ആഗ്രഹിക്കുന്നവർക്ക് സുവർണ്ണാവസരം. 2026ലെ ഗ്രാമീൺ ഡാക് സേവക് (ജി ഡി എസ്) തസ്തികകളിലേക്കുള്ള ഔദ്യോഗിക വിജ്ഞാപനം പുറത്തിറങ്ങി.
ബ്രാഞ്ച് പോസ്റ്റ്മാസ്റ്റർ, അസിസ്റ്റന്റ് ബ്രാഞ്ച് പോസ്റ്റ്മാസ്റ്റർ, ഡാക് സേവക് എന്നീ തസ്തികകളിലേക്കാണ് നിയമനം നടക്കുന്നത്.
രാജ്യത്തുടനീളമുള്ള വിവിധ പോസ്റ്റൽ സർക്കിളുകളിലായി 25,000ത്തിലധികം ഒഴിവുകളാണ് ഉള്ളത്. എഴുത്തു പരീക്ഷയില്ലാതെ നേരിട്ട് ജോലി നേടാൻ സാധിക്കുമെന്നതാണ് പ്രധാന പ്രത്യേകത.
പത്താം ക്ലാസ് വിജയിച്ചവർക്ക് ഈ തസ്തികകളിലേക്ക് അപേക്ഷിക്കാം. എന്നാൽ കണക്ക്, ഇംഗ്ലീഷ് എന്നീ വിഷയങ്ങളിൽ പാസ് മാർക്ക് നിർബന്ധമാണ്. കൂടാതെ പത്താം ക്ലാസ് വരെ പ്രാദേശിക ഭാഷ പഠിച്ചിരിക്കണം.
കേരള സർക്കിളിൽ അപേക്ഷിക്കാൻ ആഗ്രഹിക്കുന്നവർക്ക് മലയാളം അറിഞ്ഞിരിക്കേണ്ടത് അത്യാവശ്യമാണ്. കമ്പ്യൂട്ടർ പരിജ്ഞാനം, സൈക്കിൾ ചവിട്ടാനുള്ള കഴിവ്, മറ്റ് ഉപജീവന മാർഗ്ഗങ്ങൾ ഉള്ളവരായിരിക്കുക തുടങ്ങിയവയാണ് മറ്റ് യോഗ്യതകൾ.
ഉദ്യോഗാർത്ഥികളുടെ പ്രായപരിധി 18 വയസ്സിനും 40 വയസ്സിനും ഇടയിലായിരിക്കണം. എന്നാൽ സംവരണ വിഭാഗക്കാർക്ക് ചട്ടപ്രകാരമുള്ള വയസ്സിളവ് ലഭിക്കും.
കേന്ദ്ര സർക്കാർ ജീവനക്കാരുടെ രീതിയിലുള്ള അടിസ്ഥാന ശമ്പളത്തിന് പകരം ‘ടൈം റിലേറ്റഡ് കണ്ടിന്യൂയിറ്റി അലവൻസ്’ എന്ന രീതിയിലാണ് പ്രതിഫലം നൽകുന്നത്. ബ്രാഞ്ച് പോസ്റ്റ്മാസ്റ്റർ തസ്തികയ്ക്ക് പ്രതിമാസം 12,000 മുതൽ 29,380 രൂപ വരെയും, അസിസ്റ്റന്റ് ബ്രാഞ്ച് പോസ്റ്റ്മാസ്റ്റർ / ഡാക് സേവക് തസ്തികകൾക്ക് 10,000 മുതൽ 24,470 രൂപ വരെയുമാണ് പ്രതിഫലം ലഭിക്കുക.
പൊതുവിഭാഗത്തിലെ പുരുഷ ഉദ്യോഗാർത്ഥികൾ 100 രൂപ അപേക്ഷാ ഫീസ് അടയ്ക്കണം. എന്നാൽ വനിതകൾ, എസ് സി/എസ് ടി വിഭാഗക്കാർ, ഭിന്നശേഷിക്കാർ, ട്രാൻസ് വുമൺ എന്നിവർക്ക് ഫീസ് സൗജന്യമാണ്.
ജി ഡി എസ് ജീവനക്കാർ തപാൽ വകുപ്പിലെ സ്ഥിരം ജീവനക്കാരല്ലെങ്കിലും 65 വയസ്സ് വരെ ജോലിയിൽ തുടരാം. ദിവസേന 4 മുതൽ 5 മണിക്കൂർ വരെയാണ് ജോലി സമയം. ആഗസ്റ്റ് 31 മുതൽ സെപ്റ്റംബർ 19 വരെ വൺ-ടൈം രജിസ്ട്രേഷൻ നടത്താവുന്നതാണ്.
സെപ്റ്റംബർ 2 മുതൽ 21 വരെ ഓൺലൈനായി അപേക്ഷ സമർപ്പിക്കാനും ഫീസ് അടയ്ക്കാനും അവസരമുണ്ട്. തെറ്റുകൾ തിരുത്താനായി സെപ്റ്റംബർ 23, 24 തീയതികളിൽ തിരുത്തൽ വിൻഡോയും ലഭ്യമാകും. കൂടുതൽ വിവരങ്ങൾക്ക് ഇന്ത്യ പോസ്റ്റിന്റെ ഔദ്യോഗിക വെബ്സൈറ്റ് സന്ദർശിക്കുക.
