കൊച്ചി: വടക്കേക്കര പൊലിസ് സ്റ്റേഷനിലെ സിവില് പൊലിസ് ഓഫീസറെ രണ്ടു ദിവസമായി കാണാതായ സംഭവത്തില് അന്വേഷണം ഊര്ജിതമാക്കി.
മുനമ്പം കുഴുപ്പിള്ളി തുണ്ടിപ്പുറം സ്വദേശിയായ അന്ജിത്തിനെ (41)യാണ് ശനിയാഴ്ച മുതല് കാണാതായത്. കുടുംബവഴക്കിനെ തുടര്ന്ന് വീട് വിട്ടതാകാമെന്നാണ് പൊലിസിന്റെ പ്രാഥമിക നിഗമനം. സംഭവത്തില് മുനമ്പം പൊലിസ് അന്വേഷണം തുടരുകയാണ്.
ശനിയാഴ്ച രാവിലെ ഒമ്പത് മണിയോടെയാണ് അന്ജിത്ത് വീട്ടില് നിന്ന് പുറത്തിറങ്ങിയത്. തുടര്ന്ന് വീട്ടുകാരുമായി ബന്ധപ്പെടുകയോ തിരിച്ചെത്തുകയോ ചെയ്തില്ല. ഇതോടെ ഭാര്യ ഗ്രീഷ്മ മുനമ്പം പൊലിസില് പരാതി നല്കുകയായിരുന്നു.
മുമ്പും കുടുംബവഴക്കിനെ തുടര്ന്ന് അന്ജിത്ത് കുറച്ചുസമയം വീട്ടില് നിന്ന് മാറിനില്ക്കാറുണ്ടായിരുന്നുവെങ്കിലും മൊബൈല് ഫോണ് സ്വിച്ച് ഓഫ് ചെയ്യാറില്ലായിരുന്നുവെന്ന് പൊലിസ് അറിയിച്ചു. എന്നാല് ഇത്തവണ ഫോണില് ബന്ധപ്പെടാനാകാതിരുന്നതോടെയാണ് വീട്ടുകാര് ആശങ്കപ്പെട്ടത്.
അന്ജിത്ത് ആദ്യം കൊടുങ്ങല്ലൂര് ഭാഗത്തേക്കാണ് പോയതെന്ന് അന്വേഷണത്തില് കണ്ടെത്തി. അദ്ദേഹം സഞ്ചരിച്ച ഓട്ടോറിക്ഷയുടെ ഡ്രൈവറെ കണ്ടെത്തി പൊലിസ് വിവരങ്ങള് ശേഖരിച്ചു. യാത്രയ്ക്കിടെ മറ്റൊരാളുടെ ഫോണ് വാങ്ങി സഹോദരനെയും സുഹൃത്തുക്കളെയും വിളിച്ച് താന് സുരക്ഷിതനാണെന്ന് അറിയിച്ചതായും പൊലിസ് പറഞ്ഞു.
ഇന്നലെ ഉച്ചയോടെ ബന്ധുക്കളെ വിളിച്ച അന്ജിത്ത് തിങ്കളാഴ്ച തിരിച്ചെത്തുമെന്ന് അറിയിച്ചിരുന്നു. എന്നാല് അതിനുശേഷം വീണ്ടും ബന്ധപ്പെടാന് സാധിക്കാത്ത സാഹചര്യത്തില് ഇന്ന് രാവിലെ മുതല് അദ്ദേഹത്തെ കണ്ടെത്താനുള്ള അന്വേഷണം പൊലിസ് പുനരാരംഭിച്ചു.
