തിരുവനന്തപുരം : കേരള പോലീസ് സേനയിലെ സംഘടനാ സംവിധാനത്തിന്റെ ഭരണക്രമത്തെ ആകെ മാറ്റിമറിക്കുന്ന വിപ്ലവകരമായ പുനഃസംഘടനയ്ക്കാണ് കഴിഞ്ഞ ദിവസം ആഭ്യന്തര വകുപ്പ് ഉത്തരവിട്ടത്. നിലവിലുണ്ടായിരുന്ന മൂന്ന് അസോസിയേഷനുകളെ പുനഃസംഘടിപ്പിച്ച് രണ്ടെണ്ണമാക്കി ചുരുക്കാനാണ് ആഭ്യന്തര വകുപ്പിന്റെ അന്തിമ തീരുമാനം. വര്ഷങ്ങളായി പോലീസ് അസോസിയേഷനില് പ്രബലമായി നിലനിന്നിരുന്ന സിപിഎം അനുഭാവ സംഘടനകളുടെ എകാധിപത്യത്തിനും സ്വാധീനത്തിനും കനത്ത തിരിച്ചടിയേകുന്നതാണ് പുതിയ തീരുമാനം.
യുഡിഎഫ് അനുകൂല സംഘടനാ നേതാവായ അജിത് കുമാര് മുന്നോട്ടുവെച്ച തന്ത്രപരമായ ഫോര്മുല പൂര്ണ്ണമായും അംഗീകരിച്ചാണ് സര്ക്കാര് ഈ ചരിത്രപരമായ അഴിച്ചുപണിക്ക് വഴിയൊരുക്കിയത്. ഇതോടെ സേനാംഗങ്ങള്ക്കിടയിലെ സംഘടനാ തര്ക്കങ്ങള്ക്ക് വിരാമമാകുകയും, ദീര്ഘകാലമായി പ്രവര്ത്തിച്ചിരുന്ന 'കേരള പോലീസ് ഓഫീസേഴ്സ് അസോസിയേഷന്' ഇല്ലാതാകുകയും ചെയ്യും.
ഡിജിപി റവാഡാ ചന്ദ്രശേഖര് മുന്നോട്ടുവെച്ച ശുപാര്ശ തള്ളിയാണ് ആഭ്യന്തര വകുപ്പ് ഈ അന്തിമ തീരുമാനത്തിലേക്ക് എത്തിയത്. സേനയില് മൂന്ന് അസോസിയേഷനുകള് വേണമെന്നായിരുന്നു സംസ്ഥാന പോലീസ് മേധാവിയുടെ നിലപാട്. എന്നാല് ആഭ്യന്തരമന്ത്രി രമേശ് ചെന്നിത്തലയുടെ കൃത്യമായ ഇടപെടലിനെത്തുടര്ന്ന്, ആഭ്യന്തര വകുപ്പ് അഡീഷണല് ചീഫ് സെക്രട്ടറി മിന്ഹാജ് അലം അജിത് കുമാറിന്റെ നിര്ദ്ദേശം അംഗീകരിച്ച് ഉത്തരവ് പുറപ്പെടുവിക്കുകയായിരുന്നു.
സിപിഒ മുതല് ഗ്രേഡ് എഎസ്ഐ, എഎസ്ഐ, ഗ്രേഡ് എസ്ഐ വരെയുള്ള താഴെത്തട്ടിലെ മുഴുവന് ജീവനക്കാരെയും ഉള്പ്പെടുത്തി 'കേരള പോലീസ് അസോസിയേഷന്' പുനഃസംഘടിപ്പിക്കും. ഡയറക്ട് എസ്ഐ (സബ് ഇന്സ്പെക്ടര്) മുതല് നോണ്-ഐപിഎസ് എസ്പി വരെയുള്ള ഉദ്യോഗസ്ഥരെ ഉള്ക്കൊള്ളിച്ചുകൊണ്ടാണ് രണ്ടാമത്തെ സംഘടനയായ 'കേരള പോലീസ് സീനിയര് ഓഫീസേഴ്സ് അസോസിയേഷന്' രൂപീകരിച്ചിരിക്കുന്നത്.
ഇടതുമുന്നണി ഭരണകാലത്ത് കടുത്ത പ്രതികാര നടപടികള്ക്കും രാഷ്ട്രീയ വേട്ടയാടലുകള്ക്കും ഇരയായിട്ടും പതറാതെ നിലകൊണ്ട അജിത് കുമാറിന്റെ ജനപ്രീതിയും സംഘടനാ മികവുമാണ് ഈ തീരുമാനത്തിന് പിന്നിലെ പ്രധാന ഘടകം. അജിത് കുമാര് മുന്നോട്ടുവെച്ച ആവശ്യത്തിലെ യുക്തിയും താഴെത്തട്ടിലെ ഉദ്യോഗസ്ഥരുടെ പിന്തുണയും തള്ളിക്കളയാന് ആഭ്യന്തര വകുപ്പിന് സാധിച്ചില്ല. ഡി.ജി.പിയുടെ എതിര്പ്പുകളെ മറികടന്ന് ഈ ഫോര്മുല അംഗീകരിക്കപ്പെട്ടത് അദ്ദേഹത്തിന്റെ സംഘടനാ കരുത്തിന്റെ തെളിവാണ്.
പിരിച്ചുവിട്ട കേരള പോലീസ് ഓഫീസേഴ്സ് അസോസിയേഷന്റെ കോടിക്കണക്കിന് രൂപ വിലമതിക്കുന്ന സാമ്പത്തിക ആസ്തികളും നിക്ഷേപങ്ങളും വിഭജിക്കാനും ഉത്തരവില് വ്യക്തമായ മാനദണ്ഡമുണ്ട്. ആകെ ആസ്തിയുടെ 60 ശതമാനം കേരള പോലീസ് അസോസിയേഷനും 40 ശതമാനം സീനിയര് ഓഫീസേഴ്സ് അസോസിയേഷനും പങ്കിടും.
പുതിയ ഘടനയനുസരിച്ചുള്ള സംഘടനാ തിരഞ്ഞെടുപ്പുകള് കൃത്യസമയത്ത് പൂര്ത്തിയാക്കാനുള്ള നടപടികള് വേഗത്തിലാക്കിയിട്ടുണ്ട്. 2026 സെപ്റ്റംബര് 30നകം തിരഞ്ഞെടുപ്പ് പ്രക്രിയകള് മുഴുവന് പൂര്ത്തിയാക്കാന് ഡിജിപിയെ ആഭ്യന്തര വകുപ്പ് ചുമതലപ്പെടുത്തി. പുതുതായി തിരഞ്ഞെടുക്കപ്പെടുന്ന കമ്മിറ്റികളുടെ കാലാവധി രണ്ട് വര്ഷമായിരിക്കുമെന്നും ഉത്തരവില് പറയുന്നു.
