തിരുവനന്തപുരം: പ്രായപൂർത്തിയാകാത്ത സ്കൂള് വിദ്യാർഥിനിക്ക് നേരെയുണ്ടായ ലൈംഗികാതിക്രമക്കേസില് പ്രതിയായ യുവാവിനെ വെള്ളറട പൊലീസ് അറസ്റ്റ് ചെയ്തു.
പ്രാവച്ചമ്പലം പള്ളിച്ചല് വീട്ടില് റിയാസ് ഖാൻ (31) ആണ് അറസ്റ്റിലായത്.
ഒരു വർഷം മുമ്പാണ് കേസിനാസ്പദമായ സംഭവം നടന്നതെന്നാണ് പൊലീസ് നല്കുന്ന വിവരം. സംഭവത്തിന് ശേഷം സ്കൂള് വിദ്യാർഥിനി കൗണ്സിലിങ്ങിനിടെ അധ്യാപകരോട് വിവരം പറഞ്ഞതോടെയാണ് പുറത്തറിയുന്നത്. തുടർന്ന് ബന്ധപ്പെട്ട അധികൃതർ വെള്ളറട പൊലീസില് വിവരം അറിയിക്കുകയായിരുന്നു.
സർക്കിള് ഇൻസ്പെക്ടർ ശ്രീകുമാറിന്റെ നിർദേശപ്രകാരം വെള്ളറട എസ്ഐ മനോജിന്റെ നേതൃത്വത്തിലുള്ള പൊലീസ് സംഘമാണ് പ്രാവച്ചമ്പലത്തുനിന്ന് പ്രതിയെ പിടികൂടിയത്. സിവില് പൊലീസ് ഉദ്യോഗസ്ഥരായ അനില് കുമാർ, ഷിനു എന്നിവരും സംഘത്തിലുണ്ടായിരുന്നു. കോടതിയില് ഹാജരാക്കിയ പ്രതിയെ റിമാൻഡ് ചെയ്തു.
