കോട്ടയം : സാധാരണക്കാരായ ജനങ്ങള്ക്ക് പ്രാഥമിക ആരോഗ്യസേവനം ഉറപ്പാക്കുക എന്ന ലക്ഷ്യത്തോടെയാണ് പെരുവന്താനം പഞ്ചായത്തിലെ തെക്കേമല വാർഡില് ആരോഗ്യ ഉപകേന്ദ്രത്തിന്റെ നിർമാണം ആരംഭിച്ചത്. എന്നാൽ ഇന്ന് നിർമാണം പാതിവഴിയിൽ ഉപേക്ഷിക്കപ്പെട്ട് ഈ ആരോഗ്യ ഉപകേന്ദ്രത്തിന്റെ നിർമാണം നിലച്ചിരിക്കുകയാണ്.
കഴിഞ്ഞ ഭരണസമിതിയുടെ കാലത്താണ് കേന്ദ്രാവിഷ്കൃത ഫണ്ട് 55 ലക്ഷം രൂപ ഉപയോഗിച്ച് ഈ കെട്ടിടത്തിന്റെ നിർമ്മാണ ജോലികള് ആരംഭിച്ചത്. എന്നാല്, ഇപ്പോള് നിർമാണം പാതിവഴിയില് ഉപേക്ഷിച്ച നിലയിലാണ്. പ്രദേശത്തെ ആളുകള്ക്ക് കിലോമീറ്ററുകള് സഞ്ചരിച്ച് മുണ്ടക്കയത്തെ സർക്കാർ, സ്വകാര്യ ആശുപത്രികളില് സേവനം ലഭിക്കേണ്ട സാഹചര്യത്തിലാണ് ഇവിടെ ആരോഗ്യ ഉപകേന്ദ്രം സ്ഥാപിക്കാൻ തീരുമാനിച്ചത്.
എന്നാല്, കെട്ടിടത്തിന്റെ നിർമാണം ആരംഭിച്ച് ഏതാനും മാസങ്ങള്ക്ക് ശേഷം പെരുവന്താനം പഞ്ചായത്തില് പുതിയ ഭരണസമിതി നിലവില് വന്നതോടെ ഇതിന്റെ നിർമാണം നിലയ്ക്കുകയായിരുന്നു. നിർമാണം എത്രയും വേഗം പൂർത്തിയാക്കി ആശുപത്രി ഉപകേന്ദ്രം പൊതുജനങ്ങള്ക്ക് തുറന്നുകൊടുക്കാൻ അധികൃതർ തയാറായില്ലെങ്കില് ശക്തമായ സമരപരിപാടികള് സംഘടിപ്പിക്കാനാണ് നാട്ടുകാരുടെ തീരുമാനം.
