പാലാ: നഗരസഭാ ചെയർപേഴ്സണ് സ്ഥാനം അവിശ്വാസപ്രമേയത്തിലൂടെ നഷ്ടമായതിന്റെ ചൂട് കെട്ടടങ്ങും മുമ്പേ, മുൻ ചെയർപേഴ്സണ് ദിയ ബിനു പുളിക്കക്കണ്ടവും അവിശ്വാസപ്രമേയത്തെ അനുകൂലിച്ച് വോട്ട് ചെയ്ത കൗണ്സിലർ സനില് രാഘവനും ഒരേ വേദിയില് ഗാനം ആലപിച്ചു.
ഇന്നലെ പാലാ തെക്കേക്കര സർഗ്ഗ മ്യൂസിക് ക്ലബ്ബിന്റെ പത്താമത് വാർഷികസമ്മേളനത്തിലും നിത്യവസന്ത ഗാനസംഗമത്തിലും എസ്.ജാനകി അനുസ്മരണത്തിലും പങ്കെടുക്കാനെത്തിയതായിരുന്നു ദിയ ബിനുവും സനില് രാഘവനും. 17ാം വാർഡ് അംഗമായ സനില് രാഘവൻ കേരളാ കോണ്ഗ്രസ്(എം) പ്രതിനിധിയാണ്. ദിയയ്ക്കെതിരെ അവിശ്വാസം കൊണ്ടുവന്നത് കേരളാ കോണ്ഗ്രസ്(എം) നേതൃത്വം നല്കുന്ന നഗരസഭയിലെ ഇടതുമുന്നണി കൗണ്സിലർമാരാണ്.
എന്നാല് രാഷ്ട്രീയപരമായി അഭിപ്രായ വ്യത്യാസമൊക്കെ മാറ്റിവച്ചുകൊണ്ടാണ് ഇരുവരും ചേർന്ന് 'തുമ്പിവാ തുമ്പക്കുടത്തിൻ തുഞ്ചത്തായ് ഊഞ്ഞാലിടാം' എന്ന ഗാനം ആലപിച്ചത്. സമ്മേളനം മാണി സി.കാപ്പൻ എം.എല്.എ. ഉദ്ഘാടനം ചെയ്തു. എസ്.എൻ.ഡി.പി.യോഗം തെക്കേക്കര ശാഖാ സെക്രട്ടറി ഷിബു കല്ലറക്കല്, ഗായകൻ ജിജൻ നെടുങ്കുന്നം തുടങ്ങിയവരും ആശംസകള് നേർന്നു.
സർഗ്ഗ രക്ഷാധികാരി ജോഷി പരമലയുടെ അദ്ധ്യക്ഷതയില് ചേർന്ന യോഗത്തില് കൂപ്പണ് നറുക്കെടുപ്പ് ഉദ്ഘാടനം ദിയ ബിനു പുളിക്കക്കണ്ടം നിർവഹിച്ചു. ബിജു ജോസ് ജാനകിയമ്മ അനുസ്മരണം നടത്തി. രാജേഷ് എം.കെ.പ്രാർത്ഥനാഗീതം ആലപിച്ചു. ബിജു ജോസ് സ്വാഗതവും സതീഷ് കെ.വി.നന്ദിയും പറഞ്ഞു. ജിജൻ നെടുങ്കുന്നം നയിച്ച ഗാനസംഗമവും ഉണ്ടായിരുന്നു.
