പാലാ: നഗരസഭ മൂന്നാം വാർഡില് മാർക്കറ്റിംഗ് സൊസൈറ്റി ബില്ഡിംഗിന് സമീപത്തെ അനധികൃത പാടം നികത്തല് വിവാദത്തില് പരസ്പരം പഴിചാരി റവന്യൂ വകുപ്പ് ഉദ്യോഗസ്ഥർ.
അനധികൃത മണ്ണിടീല് സംബന്ധിച്ച് കഴിഞ്ഞ ജൂണില് തന്നെ മേലുദ്യോഗസ്ഥർക്ക് റിപ്പോർട്ട് നല്കിയിരുന്നുവെന്നാണ് ളാലം വില്ലേജ് ഓഫീസറുടെ വിശദീകരണം. ലാൻഡ് റവന്യൂ തഹസില്ദാരും റിപ്പോർട്ട് കൈമാറിയിരുന്നുവെന്ന് സ്ഥിരീകരിക്കുന്നു.
എന്നാല് കൃഷി ഓഫീസറില് നിന്നും വില്ലേജ് ഓഫീസറില് നിന്നും റിപ്പോർട്ട് ഇതുവരെ ലഭിച്ചിട്ടില്ലെന്നാണ് പാലാ ആർ.ഡി.ഒയുടെ പ്രതികരണം. ളാലം വില്ലേജ് ഓഫീസിന് ഒരു മതിലിനപ്പുറം സിവില് സ്റ്റേഷനിലാണ് ആർ.ഡി.ഒ ഓഫീസ് പ്രവർത്തിക്കുന്നത്.
നാലുമാസം മുമ്പ് ഗുരുതര നിയമലംഘനം ചൂണ്ടിക്കാട്ടി റിപ്പോർട്ട് നല്കിയിരുന്നുവെന്ന വില്ലേജ് അധികൃതരുടെയും എല്.ആർ തഹസില്ദാരുടെയും വിശദീകരണം മുഖവിലയ്ക്കെടുത്താല് ഇത് ആർ.ഡി.ഒ.യുടെ നിലപാടുമായി ചേരുന്നതല്ലെന്ന് വ്യക്തം.
