തൃശൂർ : നാലു മാസമായി തുടരുന്ന നഴ്സസ് സമരത്തിനോട് മുഖം തിരിക്കുന്ന ജൂബിലി മിഷൻ ആശുപത്രി മാനേജ്മെന്റിനെതിരെ സമരം കടുപ്പിച്ച് നഴ്സുമാർ. ആശുപത്രിയുടെ അത്യാഹിത വിഭാഗം ഗേറ്റ് യുഎൻഎയുടെ നേതൃത്വത്തിൽ ഉപരോധിക്കുകയാണ്. അത്യാഹിത വിഭാഗത്തിലേക്ക് വരുന്ന ആംബുലൻസുകൾ അടക്കമുള്ളവ മറ്റു ഗേറ്റുകൾ വഴി തിരിച്ചു വിടുകയാണ്.
സമരം നടത്തിയിട്ടും നഴ്സുമാരുടെ ആവശ്യങ്ങൾ പരിഗണിക്കാൻ ജൂബിലി മിഷൻ മെഡിക്കൽ കോളേജ് മാനേജ്മെൻറ് തയ്യാറായില്ല. ഇന്നലെ മുതൽ ആശുപത്രിക്ക് മുൻപിൽ ആരംഭിച്ച രാപ്പകൽ സമരം ഇന്ന് ഉച്ചതിരിഞ്ഞതോടെ അത്യാഹിത വിഭാഗം ഗേറ്റ് ഉപരോധ സമരത്തിലേക്ക് വഴിമാറി.
ആശുപത്രി മാനേജ്മെൻറ് ഓരോ തവണയും തങ്ങളെ കബളിപ്പിക്കുകയാണെന്നും സമരം ജൂബിലി മിഷൻ ആശുപത്രിയുടെ മറ്റു ഗേറ്റുകളിലേക്ക് കൂടി വ്യാപിപ്പിക്കുമെന്നും യുഎൻഎ വ്യക്തമാക്കി. സ്ഥിതിഗതികൾ രൂക്ഷമായതോടെ ഉന്നത പൊലീസ് ഉദ്യോഗസ്ഥർ സ്ഥലത്തെത്തി. ആശുപത്രി മാനേജ്മെന്റുമായുള്ള ചർച്ച തുടരുകയാണ്.
