കോഴിക്കോട്: കോഴിക്കോട് ബീച്ചില് ഉപേക്ഷിക്കപ്പെട്ട നിലയില് നവജാത ശിശുവിന്റെ മൃതദേഹം കണ്ടെത്തിയ സംഭവത്തില് നിർണ്ണായക വിവരങ്ങള് പുറത്ത്.
പ്രസവത്തിന് മുമ്പ് തന്നെ കുഞ്ഞ് മരിച്ചിരുന്നതായാണ് പ്രാഥമിക പോസ്റ്റ്മോർട്ടം റിപ്പോർട്ടിലെ കണ്ടെത്തല്.
കോഴിക്കോട് ബീച്ച് ആശുപത്രിയിലായിരുന്നു പോസ്റ്റ്മോർട്ടം നടപടികള് നടന്നത്. ബുധനാഴ്ച രാവിലെ ആറുമണിയോടെ കോഴിക്കോട് നോർത്ത് ബീച്ചിലെ ഓപ്പണ് സ്റ്റേജിന് സമീപമാണ് നവജാത പെണ്കുഞ്ഞിന്റെ മൃതദേഹം കണ്ടെത്തിയത്.
പ്രഭാതനടത്തത്തിന് എത്തിയവരാണ് മണലില് കമഴ്ന്നു കിടക്കുന്ന നിലയില് മൃതദേഹം ആദ്യം കണ്ടത്. ആദ്യം ബൊമ്മയോ കളിപ്പാട്ടമോ ആണെന്നാണ് കരുതിയതെങ്കിലും പിന്നീട് സുരക്ഷാ ജീവനക്കാരും നാട്ടുകാരും അടുത്തെത്തി പരിശോധിച്ചപ്പോഴാണ് പൊക്കിള്ക്കൊടി വേർപെടാത്ത നിലയിലുള്ള നവജാത ശിശുവിന്റെ മൃതദേഹമാണെന്ന് തിരിച്ചറിഞ്ഞത്. ഉടൻ തന്നെ വിവരം പൊലീസില് അറിയിക്കുകയായിരുന്നു.






