തലനാട് : 25 മുട്ടക്കോഴികള്‍ വിഷം കലർന്ന തീറ്റ കഴിച്ച്‌ ചത്തെന്ന പരാതിയില്‍ അന്വേഷണം നടത്താൻ തയ്യാറാകാത്ത ഈരാറ്റുപേട്ട പൊലീസിന്റെ നടപടി വിവാദത്തില്‍.
വിഷയം ചർച്ചയായതോടെ സംഭവത്തെക്കുറിച്ച്‌ അന്വേഷിക്കുമെന്ന് പാലാ ഡിവൈ.എസ്.പി. ടി.എം.വർഗീസ് പറഞ്ഞു. കഴിഞ്ഞ രണ്ടുമാസത്തിനിടെ 25 ഓളം മുട്ടക്കോഴികള്‍ ചത്തെന്നാണ് തലനാട് ആരോലിക്കല്‍ എ.ആർ.ലെനിൻമോന്റെ പരാതി. സംശയത്തെ തുടർന്ന് വീട്ടിലെ സി.സി.ടി.വി ദൃശ്യങ്ങള്‍ പരിശോധിച്ചപ്പോഴാണ് അയല്‍വാസി കോഴികള്‍ക്ക് ഭക്ഷണസാധനം നല്‍കുന്നത് കണ്ടതെന്നും പരാതിയില്‍ പറയുന്നു.
മൃഗത്തെ കൊലപ്പെടുത്തുന്നത് കുറ്റകരമാക്കുന്ന ഭാരതീയ ന്യായസംഹിതയിലെ 325-ാം വകുപ്പ് നിലവിലിരിക്കെയാണ് കേസെടുക്കാൻ വകുപ്പില്ലെന്ന എസ്.ഐയുടെ വിചിത്ര നിലപാടെന്ന് പരാതിക്കാരന്റെ വാദം. 325 പ്രകാരം മൃഗത്തെ കൊല്ലുകയോ അംഗഭംഗം വരുത്തുകയോ ചെയ്താല്‍ അഞ്ചുവർഷം വരെ തടവോ പിഴയോ രണ്ടും കൂടിയോ ലഭിക്കാം. കോഴികള്‍ തന്റെ പുരയിടത്തില്‍ നാശനഷ്ടം വരുത്തിയതിനെ തുടർന്നാണ് വിഷം വച്ചതെന്നാണ് അയല്‍വാസിയുടെ വാദം
അന്വേഷിക്കാൻ തടസമെന്ത്
വിഷം നല്‍കിയെന്ന ആരോപണം, സി.സി.ടി.വി. ദൃശ്യങ്ങള്‍, ആരോപണവിധേയനായ വ്യക്തിയുടെ സാന്നിദ്ധ്യം തുടങ്ങിയ കാര്യങ്ങള്‍ പരിശോധിക്കാതെ തന്നെ ''കേസെടുക്കാൻ വകുപ്പില്ല'' എന്ന് പറയുന്നത് എങ്ങനെയാണെന്ന ചോദ്യമാണ് ഉയരുന്നത്. പരാതിയില്‍ കഴമ്പില്ലെങ്കില്‍ അന്വേഷണം നടത്തി അത് വ്യക്തമാക്കാം. എന്നാല്‍ അന്വേഷണം നടത്താതിരിക്കാൻ നിയമപരമായ കാരണം എന്താണെന്ന് ഈരാറ്റുപേട്ട പൊലീസ് വ്യക്തമാക്കുന്നില്ല.
