മുണ്ടക്കയം: നിരവധി വാഹനങ്ങള് ദിവസേന കടന്നുപോകുന്ന കോട്ടയം - ഇടുക്കി ജില്ലകളെ തമ്മില് ബന്ധിപ്പിക്കുന്ന മുണ്ടക്കയം വലിയ പാലത്തിന്റെ കോണ്ക്രീറ്റ് പാളികള് തകർന്ന് കുഴികള് രൂപപ്പെട്ടത് അപകടഭീഷണിയായി മറുന്നു.
പാലത്തിന്റെ തുടക്കഭാഗത്തും മധ്യഭാഗത്തുമാണ് കോണ്ക്രീറ്റ് തകർന്ന് കുഴികള് രൂപപ്പെട്ടിരിക്കുന്നത്. പാലത്തിന്റെ മധ്യഭാഗത്ത് കോണ്ക്രീറ്റ് പാളികള് അടർന്നുമാറിയാണ് ഗർത്തം രൂപപ്പെട്ടിരിക്കുന്നത്. ഭാരമേറിയ വാഹനങ്ങളുടെ ടയറുകള് ഈ കുഴിയില് ചാടുന്നതു മൂലമുണ്ടാകുന്ന ആഘാതത്തില് ബാക്കിയുള്ള ഭാഗങ്ങളിലെ കോണ്ക്രീറ്റും അതിവേഗം ഇളകിമാറിക്കൊണ്ടിരിക്കുകയാണ്. കുഴിയില് ചാടാതെ വാഹനങ്ങള് വെട്ടിച്ചുമാറ്റാൻ ശ്രമിക്കുന്നത് അപകടങ്ങള്ക്ക് വഴിവയ്ക്കുന്നുണ്ട്. ഇരുചക്ര വാഹനങ്ങള് കുഴിയില് ചാടി നിയന്ത്രണംവിട്ട് മറിയുന്നതും പതിവായിരിക്കുകയാണ്.
കുഴികള് രൂപപ്പെടുമ്പോള് ദേശീയപാതാ വിഭാഗമെത്തി താത്കാലികമായി ഓട്ടയടയ്ക്കല് മാത്രമാണ് നടത്തുന്നത്. വർഷങ്ങളുടെ പഴക്കമുള്ള ഈ പാലത്തിലൂടെ വലിയ വാഹനങ്ങള് കടന്നുപോകുമ്പോള് ഉണ്ടാകുന്ന കുലുക്കവും കമ്പനങ്ങളും തടയുന്നതിനായി നിർമാണ കാലഘട്ടത്തില് കോണ്ക്രീറ്റ് സ്ലാബുകള്ക്കിടയില് സ്ഥാപിച്ചിരുന്ന ഇരുമ്പ് ഗർഡറുകള് കോവിഡ് കാലഘട്ടത്തില് മോഷണം പോയിരുന്നു. ഇത് പുനഃസ്ഥാപിക്കുന്നതിനു പകരം ഇവിടെ കോണ്ക്രിറ്റിട്ട് നികത്തിയതായും പരാതിയുണ്ട്. പാലം സംരക്ഷിക്കുന്നതിനും പാലത്തിലൂടെയുള്ള യാത്ര സുരക്ഷിതമാക്കുന്നതിനും അടിയന്തര നടപടി സ്വീകരിക്കണമെന്ന ആവശ്യം ശക്തമായി.





