കോട്ടയം: രണ്ടു കുട്ടികള്ക്കു ചിക്കന് പോക്സ് ബാധിച്ചതിന്റെ പേരില് എം.ജി. സര്വകലാശാലയിലെ ഹോസറ്റലുകള് രണ്ടാഴ്ചയിലേറെ അടച്ചിടാനുള്ള നീക്കം വിവാദത്തില്.
സര്വകലാശാലയിലെ ആണ്കുട്ടികളുടെ ഹോസ്റ്റലിലാണ് ഏതാനും ദിവസങ്ങള്ക്കു മുമ്പു രണ്ടു കുട്ടികള്ക്കു ചിക്കന് പോക്സ് ബാധിച്ചത്. ഉടനെ തന്നെ ഹോസ്റ്റലുകളെല്ലാം ഒരാഴ്ചത്തേക്ക് അടച്ചിടുകയും ക്ലാസുകള് ഓണ്ലൈനായി നടത്തുന്നതിനും ഉത്തരവിട്ടു. ഇതോടെ അന്യ സംസ്ഥാനത്തു നിന്നടക്കമുള്ള വിദ്യാര്ഥികള് താമസിക്കാനിടമില്ലാതെ ബുദ്ധിമുട്ടിലായി. ഒരാഴ്ച്ച കഴിഞ്ഞപ്പോള് അടച്ചിടല് 22 വരെ നീട്ടിയിരിക്കയാണ്. എന്നാല്, ആദ്യ ആഴ്ച്ച അടച്ചിട്ടതിനു ശേഷം കാര്യമായ രോഗവ്യാപനമില്ലാത്തതിനാല് ഹോസ്റ്റല് തുറക്കാമെന്നു വാര്ഡന്മാര് റിപ്പോര്ട്ടു സമര്പ്പിച്ചിരുന്നു. എന്നാല്, വാര്ഡന്മാരുടെ റിപ്പോര്ട്ട് പരിഗണിച്ച് അടച്ചിടല് ഒരാഴ്ച്ച കൂടി നീട്ടുന്നു എന്ന വിചിത്രമായ ഉത്തരവാണു കഴിഞ്ഞ ദിവസം പുറത്തിറങ്ങിയത്. ഹോസ്റ്റല് അടച്ചിട്ടെങ്കിലും യാതൊരു ശുചീകരണ പ്രവര്ത്തനങ്ങളും ഹോസ്റ്റലില് നടത്തിയിട്ടില്ലെന്നും വിദ്യാര്ഥികള്ക്കു പരാതിയുണ്ട്.
19 മുതല് നടത്തേണ്ടിയിരുന്ന അഞ്ച്, മൂന്ന് സെമസ്റ്റര് മാറ്റിവെക്കേണ്ടിവന്നു. ഡിസംബര് ആദ്യവാരം ആരംഭിക്കുന്ന പി.ജി. ഒന്ന്, മൂന്ന് സെമസ്റ്ററുകളുടെ നടത്തിപ്പും അവതാളത്തിലാകും.
ഏതാനും കുട്ടികളെ മാത്രം രോഗം ബാധിച്ചതിനാല് അവരെ മാത്രം ക്വാറന്റൈന് ചെയ്യുന്നതിനു പകരം ഹോസ്റ്റലുകള് മുഴുവന് അടച്ചിടുന്നത് അക്കാദമിക പ്രവര്ത്തനങ്ങളെ അകെ ബാധിച്ചിരിക്കുകയാണ്. ഇക്കാര്യത്തില് ആരോഗ്യ വകുപ്പിന്റെ ഏതെങ്കിലും റിപ്പോര്ട്ട് ലഭിച്ചതായും അറിവില്ല.
മഹാത്മാ ഗാന്ധി സര്വ്വകലാശാല ഹോസ്റ്റല് ചിക്കന് പോക്സിന്റെ പേരില് ഭീതി പടര്ത്തി രണ്ടാഴ്ച്ചത്തേക്ക് അടച്ചിട്ടതില് മഹാത്മാ ഗാന്ധി യൂണിവേഴ്സിറ്റി ടീച്ചേഴ്സ് അസോസിയേഷന് പ്രതിഷേധിച്ചു.





