ന്യൂയോർക്ക്: ഗ്രാൻഡ് ചെസ്സ് ടൂർ ചാമ്പ്യനായി ഇന്ത്യൻ ഗ്രാൻഡ് മാസ്റ്റർ ആർ. പ്രഗ്നാനന്ദ. സെയിന്റ് ലൂയിസില് നടന്ന ഗ്രാൻഡ് ചെസ്സ് ടൂർ ഫൈനലില് ഫാബിയോ കരുവാനയെയാണ് പ്രഗ്നാനന്ദ പരാജയപ്പെടുത്തിയത്.
ഇതോടെ ഗ്രാൻഡ് ചെസ്സ് ടൂർ ചാമ്പ്യനാകുന്ന ആദ്യ ഇന്ത്യൻ താരമെന്ന ചരിത്രനേട്ടവും പ്രഗ്നാനന്ദ സ്വന്തമാക്കി.
2,00,000 യുഎസ് ഡോളറാണ്(ഏകദേശം 1.91 കോടി രൂപ) സമ്മാനത്തുകയായി ലഭിക്കുക.
സെയിന്റ് ലൂയിസ് ചെസ്സ് ക്ലബില് നടന്ന ഫൈനല് മത്സരത്തില് അവസാനദിവസത്തിന്റെ തുടക്കത്തില് ഫാബിയോ കരുവാനയ്ക്ക് ആറ് പോയിന്റിന്റെ ലീഡുണ്ടായിരുന്നു.
എന്നാല്, രണ്ട് റാപ്പിഡ് ഗെയിമുകളും ജയിച്ച് പ്രഗ്നാനന്ദ മത്സരത്തിലേക്ക് തിരിച്ചുവന്നു. തുടർന്ന് 15-13 എന്ന സ്കോറിനാണ് പ്രഗ്നാനന്ദ കിരീടം ചൂടിയത്. ഫിലിപ്പിനോ- അമേരിക്കൻ ഗ്രാൻഡ് മാസ്റ്റർ വെസ്ലി സോയ്ക്കാണ് ഗ്രാൻഡ് ചെസ്സ് ടൂറില് മൂന്നാംസ്ഥാനം. ജർമൻ ഗ്രാൻഡ് മാസ്റ്റർ വിൻസെന്റ് കെയ്മറിനെയാണ് വെസ്ലി സോ പരാജയപ്പെടുത്തിയത്.
